ముంబైలో సినీ డైరక్టర్ దందా
ముంబై, జనవరి 16
ముంబై మహా నగరంలో  ఐదేళ్లుగా వ్యభిచార గృహాన్ని నడుపుతున్న సినీ డైరెక్టర్‌ దందా వెలుగులోకి వచ్చింది. జూనియర్‌ ఆర్టిస్ట్‌లతో సెక్స్ రాకెట్ నడుపుతున్న ఓ క్యాస్టింగ్‌ డైరెక్టర్‌ను ముంబై పోలీసులు సినీ ఫక్కీలో అరెస్టు చేసిన విషయం తెలిసిందే. అయితే ఇతగాడి సెక్స్ రాకెట్ దందాలో విస్తుపోయే నిజాలు వెలుగులోకి వస్తున్నాయి. నవీన్‌ కుమార్‌ ప్రేమ్‌లాల్‌ ఆర్య (32) అనే వ్యక్తి బాలీవుడ్‌లోని పలు సినిమాలకు క్యాస్టింగ్‌ డైరెక్టర్‌గా పని చేస్తున్నాడు. ఈజీ మనీ కోసం అలవాటు పడి స్నేహితులు అజయ్‌ శర్మ, విజయ్‌లతో కలిసి గత ఐదేళ్లుగా వ్యభిచార గృహాన్ని నిర్వహిస్తున్నాడు.సినిమాల్లో నటించాలనే ఆశతో ముంబైకి వచ్చే యువతులనే వీరు టార్గెట్‌గా చేసుకుని పరిచయం చేసుకుంటారు. తర్వాత సినిమాల్లో అవకాశాలు ఇప్పిస్తామంటూ యువతులకు నమ్మించి వ్యభిచార రొంపిలోకి దింపుతున్నారు. చివరకు సినీ అవకాశాలు ఇప్పించకుండా వంచనకు దిగుతున్నారు. ఇలా అనేక మందిని వీరు దారుణంగా మోసం చేసినట్లు తెలుస్తోంది. దీనిపై ఫిర్యాదులు రావడంతో పోలీసులు రంగంలోకి దిగారు.విటులు మాదిరిగా పోలీసులు నవీన్‌కు ఫోన్‌చేసి అమ్మాయిలు కావాలంటూ అడిగారు. దీంతో సినీ పరిశ్రమకు చెందిన ఇద్దరిని పంపుతున్నట్లు వారికి తెలిపాడు. వారిలో ఒక్కో మహిళకు రూ.60 వేల చొప్పున ఇవ్వడంతో పాటు, హోటల్‌ ఖర్చులను కూడా భరించాలని తెలిపాడు. అతగాడు చెప్పిన అన్ని షరతులకూ ఒప్పుకున్నారు. చివరకు యువతులతో కలిసి హోటల్‌కు వచ్చిన నవీన్‌ కుమార్‌ను పోలీసులు రెడ్‌హ్యాండెట్‌గా పట్టుకున్నారు. ఇద్దరు యువతుల నుంచి వాంగ్మూలం తీసుకున్నారు. అనంతరం నిందితులపై కేసు నమోదు చేసి దర్యాప్తు ప్రారంభించారు. ఈ దర్యాప్తులో బాలీవుడ్‌లోని అనేక చీకటి వ్యవహారాలు వెలుగులోకి వస్తున్నట్లు తెలుస్తోంది.