జోరుగా ముక్కు పుడకలు పంపిణీ
నిజామాబాద్, జనవరి 23,
తెలంగాణ మున్సిపల్ ఎన్నికలు జరుగుతుండగా, అభ్యర్థులకు చెందిన మద్దతుదారులు ఓటర్లను ప్రభావితం చేసే ఘటనలు వెలుగు చూస్తున్నాయి. ఒక్కో చోట ఒక్కో విధంగా ఓటర్లను తమ వైపునకు తిప్పుకొనేలా ఆయా పార్టీల మద్దతుదారులు ప్రయత్నిస్తున్నారు. కామారెడ్డి పరిధిలోని ఎల్చిపూర్‌లో ముక్కు పుడకలు పంచుతున్న వ్యవహారం వెలుగు చూసింది. ప్రత్యర్థి వర్గానికి చెందిన కార్యకర్తలు ఆ వ్యక్తిని గుర్తించి అధికారులకు సమాచారం ఇవ్వగా, ఆ వ్యక్తిని పోలీసులు అరెస్టు చేశారు. ఈ వ్యక్తి కాంగ్రెస్ పార్టీ అభ్యర్థి తరపున ముక్కు పుడకలు పంచుతున్నట్లు అధికారులు తెలిపారు.ఇక నల్గొండ జిల్లా చిట్యాలలో ఓటర్లకు డబ్బు పంచుతూ అభ్యర్థి భార్య పట్టుబడ్డారు. ఆ అభ్యర్థి కుమారుడు కూడా ఓటర్లకు ప్రలోభ పెడుతూ చిక్కడం గమనార్హం. 7వ వార్డు నుంచి స్వతంత్ర అభ్యర్థిగా పోటీ చేస్తున్న వ్యక్తి భార్య డబ్బు పంపిణీ చేస్తున్నారని, ఆమెను అదుపులోకి తీసుకున్నట్లు పోలీసులు తెలిపారు. మరోవైపు 10వ వార్డులో డబ్బులు పంపిణీ చేస్తూ అభ్యర్థి కుమారుడు పట్టుబడ్డాడు.వికారాబాద్ జిల్లా తాండూరులో బీజేపీ నేతలు ఆందోళన చేపట్టారు. తాండూరులోని మూడు పోలింగ్ కేంద్రాల్లో టీఆర్ఎస్, కాంగ్రెస్ నాయకులు దొంగ ఓట్లు వేస్తున్నారని బీజేపీ నాయకులు ఆరోపించారు. ఆయా కేంద్రాల్లో ఓటింగ్‌ను నిలిపివేయాలని నేతలు డిమాండ్ చేశారు. దీంతో తాండూరు వ్యాప్తంగా టీఆర్ఎస్, బీజేపీ నేతల మధ్య తీవ్ర వాగ్వివాదం చోటు చేసుకుంది. మరోవైపు, మెదక్ జిల్లా నర్సాపూర్‌లోని ఆరో వార్డులో ఘర్షణ నెలకొంది. టీఆర్ఎస్ అభ్యర్థి, స్వతంత్ర అభ్యర్థుల వర్గాల మధ్య పరస్ఫరం ఉద్రిక్తతలు చోటు చేసుకున్నాయి. పోలీసులు వచ్చి ఇరు వర్గాలను అక్కడి నుంచి పంపివేశారు