జనసేనలో ఏం జరుగుతోంది
హైద్రాబాద్, జనవరి 31 
తన కుటుంబం కోసం, పార్టీ ఆర్థిక పుష్టి కోసం తాను సినిమాలు చేయడం తప్పనిసరి అని జనసేన అధ్యక్షుడు, ప్రముఖ సినీ నటుడు తేల్చిచెప్పారు. తద్వారా గత కొన్నాళ్లుగా పవన్ పలు సినిమాల్లో నటిస్తున్నారంటూ వస్తున్న వరుస వార్తలకు ఫల్‌స్టాప్ చెప్పేశారు. రాబోయే రోజుల్లో మరిన్ని సినిమాల్లో నటించనున్నట్లు నర్మగర్భంగా చెప్పేశారు. గత ఎన్నికల్లో జనసేన ఘోర పరాజయం తర్వాత రాజకీయంగా కొన్నాళ్లు స్తబ్దుగా ఉన్న పవన్.. ఇటీవలే పార్టీ కార్యకలాపాలు పెంచారు. ఢిల్లీ వెళ్లి బీజేపీ కేంద్ర పెద్దలను కలిసి పొత్తు కుదుర్చుకున్నారు.ఓవైపు పవన్ రాజకీయంగా యాక్టివ్‌గా కనిపిస్తున్నా.. మరోవైపు ఆయన వరుస సినిమాలకు ఒప్పుకుంటున్నట్లు వార్తలు గుప్పుమన్నాయి. ఈ నేపథ్యంలోనే జనసేన కీలక నాయకుడు, సీబీఐ మాజీ జేడీ వి.వి.లక్ష్మీనారాయణ పార్టీకి రాజీనామా చేశారు. పూర్తి సమయం రాజకీయాలకే వెచ్చిస్తానని, ప్రజా సేవకే జీవితం అంకితం అని చెప్పిన పవన్.. మళ్లీ సినిమాల్లో నటిస్తున్నారనే కారణంతో రాజీనామా చేస్తున్నట్టు జేడీ లక్ష్మీనారాయణ తన రాజీనామా లేఖలో తెలిపారు. దీంతో ఆయనకు సమాధానమిచ్చే క్రమంలోనే పవన్ కీలక విషయాలు వెల్లడించేశారు. సినిమాలు చేయడం తప్పనిసరి అని ప్రకటించేశారు.ప్రశ్నిస్తానంటూ 2014లో జనసేన పార్టీ నెలకొల్పిన పవన్ కళ్యాణ్ ఆ ఎన్నికల్లో టీడీపీ, బీజేపీ కూటమి మద్దతిచ్చి వారి విజయానికి దోహదపడ్డారు. అనంతరం రెండు పార్టీలతో విడిపోయి 2019 ఎన్నికల్లో ఉభయ కమ్యూనిస్టు పార్టీలు, బీఎస్పీలతో కలిసి పోటీ చేశారు. ఆ ఎన్నికల్లో పార్టీ ఘోర పరాజయం తర్వాత పార్టీ నుంచి కీలక నేతలు వైదొలిగారు. పార్టీ అధికార ప్రతినిధులు, ప్రజల్లో కాస్త గుర్తింపు ఉన్న నాయకులు రాజీనామా చేశారు.రాష్ట్రంలోని ప్రభుత్వ పాఠశాలల్లో ఇంగ్లిష్ మీడియం ప్రవేశపెట్టబోతున్నట్లు వైసీపీ సర్కార్ ప్రకటించిన నేపథ్యంలో పవన్ కళ్యాణ్ పలు వివాదాస్పద వ్యాఖ్యలు చేశారు. వైసీపీ ప్రభుత్వం మత మార్పిళ్లను ప్రోత్సహిస్తోందని విమర్శించారు. ఆంగ్ల మాద్యమం ప్రవేశపెట్టడం ద్వారా తెలుగు సంస్కృతికి ముప్పు ఏర్పడుతుందని చెప్పారు. ఆ సమయంలో ‘మన నుడి, మన నది’ పేరుతో ఓ ఉద్యమం తీసుకొస్తానని చెప్పారు. హిందూ, ముస్లిం, క్రిస్టియన్ మతాల గురించి పలు వ్యాఖ్యలు చేశారు. ఈ నేపథ్యంలో పవన్ కళ్యాణ్ మత ప్రస్తావన లేని రాజకీయాలు అనే జనసేన సిద్ధాంతానికి వ్యతిరేకంగా పని చేస్తున్నారంటూ పార్టీ స్థాపన నుంచి పవన్ వెంటే ఉన్న, పార్టీ సిద్ధాంతకర్తగా ప్రచారమున్న రాజు రవితేజ్ రాజీనామా చేశారు.రాజు రవితేజ్ పార్టీకి రాజీనామా చేసిన తర్వాత పవన్ గురించి, ఆయన వ్యవహార శైలి గురించి పలు ఇంటర్వ్యూల్లో ఏకరువు పెట్టారు. అలాగే జనసేన ఏకైక ఎమ్మెల్యే రాపాక వరప్రసాద్ పార్టీలో మొదట్లో చురుగ్గా ఉన్నా, ఆ తర్వాత దూరం జరుగుతూ వచ్చారు. గత కొంత కాలంగా వైసీపీ ప్రభుత్వం తీసుకున్న ఇంగ్లిష్ మీడియం, మూడు రాజధానులు, మండలి రద్దు.. ఇలా ప్రతి నిర్ణయానికి రాపాక మద్దతు ప్రకటిస్తున్నారు. అసెంబ్లీలో వైసీపీకి వ్యతిరేకంగా పని చేయాలని నేరుగా పవన్ కళ్యాణ్ లేఖ రాసినా ఆయన పట్టించుకోకుండా రాష్ట్ర ప్రభుత్వానికి మద్దతు ప్రకటించారు.పార్టీ నాయకులు వరుసగా దూరమవుతున్న తరుణంలో రాజకీయంగా పవన్ అనూహ్య నిర్ణయం తీసుకున్నారు. వచ్చే స్థానిక సంస్థల ఎన్నికలు తప్ప వచ్చే నాలుగేళ్లలో ఎలాంటి కీలక ఎన్నికలు లేని సమయంలో బీజేపీతో పొత్తు పెట్టుకున్నారు. దీంతో మరికొంత మంది పార్టీ అభిమానులు జనసేనకు దూరమయ్యారు. కానీ, బీజేపీతో పొత్తుపై దూకుడుగా వెళ్లిన పవన్ రాజధాని అమరావతి విషయంలో పోరాడనున్నట్లు ప్రకటించారు. రాజకీయంగా పవన్ యాక్టివ్ అవుతారనుకుంటున్న సమయంలో పవన్ వరుస సినిమాలు ఒప్పుకుంటున్నారన్న వార్తలు వచ్చాయి. ఈ నేపథ్యంలోనే పవన్ సినిమాల్లోకి వెళ్లడం ఆయన నిలకడ లేమికి నిదర్శనమంటూ జనసేన నుంచి విశాఖ ఎంపీగా పోటీ చేసిన కీలక నాయకుడు వీవీ లక్ష్మీనారాయణ రాజీనామా చేశారు.లక్ష్మీనారాయణకు సమాధానమిచ్చే క్రమంలో తాను సినిమాలు చేయడం తప్పనిసరని పవన్ కళ్యాణ్ ప్రకటించారు. దీంతో రాబోయే స్థానిక సంస్థల ఎన్నికల్లో పార్టీ పరిస్థితి ఏంటనే ప్రశ్న వినిపిస్తోంది. పవన్ హిందీ ‘పింక్’ రిమేక్‌తో పాటు క్రిష్ దర్శకత్వంలో మరో సినిమా ఒప్పుకున్నారు. అలాగే మరో సినిమాకు కూడా సైన్ చేసినట్లు వార్తలు వస్తున్నాయి. ప్రస్తుత రోజులను బట్టి ఒక్కో సినిమాకు కనీసం ఆరు నెలల సమయం తీసుకున్నా పవన్ మూడు సినిమాలు పూర్తి చేయడానికి రెండేళ్ల సమయం పడుతుంది. ఈ నేపథ్యంలో మరికొద్ది రోజుల్లో రాబోయే స్థానిక సంస్థల ఎన్నికల్లో పోటీపై సందిగ్ధం నెలకొంది.2014 ఎన్నికల తర్వాత కూడా పవన్ కళ్యాణ్ ఏడాదికో సినిమా చొప్పున చేశారు. అజ్ఞాతవాసి సినిమా తర్వాత పూర్తిగా రాజకీయాలకే పరిమితమయ్యారు. 2019 ఎన్నికల సమయంలో ఇకపై సినిమాలు చేయబోనని, ప్రజా సేవకే జీవితం అంకితమని ప్రకటించారు. అయితే మళ్లీ సినిమాల్లో బిజీ కావాలని పవన్ నిర్ణయించుకోవడం గమనార్హం. అయితే సినిమాలు చేస్తూనే పార్టీని వదలబోనని పవన్ చెబుతున్నారు. తద్వారా ఈసారి కూడా ఓవైపు సినిమాలు, మరోవైపు రాజకీయాలతో రెండు పడవల చేయబోతున్నట్లు ప్రకటించేశారు. పవన్ సంచలన నిర్ణయాలతో జనసేన భవిష్యత్తు ఎలా ఉంటుందో కాలమే సమాధానం చెప్పాలి.