కరోనా వైరస్.. గాంధీలో పరీక్షలు
హైద్రాబాద్, ఫిబ్రవరి 3
కరోనా వైరస్ భయంతో హైదరాబాద్ విమానాశ్రయంలో హై అలర్ట్ విధించారు. విదేశాల నుంచి వచ్చే ప్రయాణికులను స్క్రీనింగ్ చేస్తున్నారు. హాంకాంగ్, స్విట్జర్లాండ్‌ల నుంచి వచ్చే విమానాలను రాజీవ్ గాంధీ ఇంటర్నేషనల్ ఎయిర్‌పోర్టులోకి అనుమతించడం లేదు. చైనా కనెక్టింగ్ విమానాలు హైదరాబాద్‌ విమానాశ్రయంలో ల్యాండింగ్‌కు పర్మిషన్ ఇవ్వడం లేదు. ఇవన్నీ ఢిల్లీ మీదుగా రాకపోకలు జరపనున్నాయి. ప్రపంచ ఆరోగ్య సంస్థ ఎమర్జెన్సీని ప్రకటించడంతో ఈ నిర్ణయం తీసుకున్నారు.కరోనా వైరస్ సోకకుండా ప్రతి ఒక్కరూ ముందు జాగ్రత్త చర్యలు తీసుకోవాలని ప్రభుత్వం వెల్లడించింది. కరోనా అనుమానితుల గురించి సమాచారం అందజేయడం కోసం 040-24651119 నంబర్‌తో ప్రత్యేకంగా కాల్ సెంటర్‌ను ఏర్పాటు చేసింది. వైరస్ సోకినట్టుగా అనుమానం ఉంటె వెంటనే వారిని ఎమర్జెన్సీ వార్డులో ఉంచి పరీక్షలు నిర్వహించేందుకు అన్ని ఏర్పాట్లు చేసింది.కేంద్రం అనుమతితో హైదరాబాద్‌లోని గాంధీ ఆస్పత్రిలో సోమవారం నుంచి కరోనా వైరస్ టెస్టులు చేస్తున్నారు. రోజూ 30 మందికి కరీనా పరీక్షలు నిర్వహిస్తారు. 10 గంటల్లోనే వ్యాధి నిర్ధారణ రిపోర్ట్ వస్తుంది. ఇప్పటి వరకూ కరోనా పరీక్షల కోసం శాంపిళ్లను పుణేకు పంపించారు. ఎవరికైనా దగ్గు, తుమ్ములు 10 నిమిషాలకు మించి ఉంటే... ముక్కు కారడం, జ్వరం, శ్వాస తీసుకోవడం కష్టంగా ఉండటం లాంటి లక్షణాలు కనిపిస్తే.. వెంటనే గాంధీలో పరీక్షలు చేయించుకోవచ్చు. కరోనా అనుమానితులకు చికిత్స అందించడం కోసం గాంధీ హాస్పిటల్‌తోపాటు ఫీవర్, ఛాతీ, సరోజినీ దేవి కంటి ఆసుపత్రుల్లో తాత్కాలికంగా 100 పడకలను ఏర్పాటు చేశారు.దేశంలో మూడో కరోనా వైరస్ కేసు నమోదైన సంగతి తెలిసిందే. కేరళలోనే ఈ కేసు వెలుగు చూసింది. కరోనా పరిణామాలతో కేంద్రం అప్రమత్తమైంది. చైనా వెళ్లొద్దని దేశ ప్రజలకు సూచించింది. పరిస్థితిని సమీక్షించడం కోసం టాస్క్ ‌ఫోర్స్‌ను ఏర్పాటు చేసింది.