20 ఏళ్ల క్రితం నాటి కృష్ణ జింకల వేట కేసు బాలీవుడ్ కండల వీరుడు సల్మాన్ ఖాన్ భవితవ్యం వచ్చే వారంలో తేలనుంది. కృష్ణ జింకలను వేటాడిన కేసులో ఏప్రిల్ 5న జోథ్‌పూర్ కోర్టు తీర్పును వెలువరించనుంది. ఈ కేసులో సల్మాన్ ఖాన్‌తో పాటు నటీనటులు సైఫ్ అలీఖాన్, నీలం, టబూ, సోనాలి బింద్రే, దుష్యంత్ సింగ్ నిందితులుగా ఉన్నారు. 1999లో సూరజ్ బర్‌జ్యాత్య చిత్రం 'హమ్ సాథ్ సాథ్ హై' షూటింగ్ సమయంలో రాజస్థాన్‌లోని కంకణి గ్రామంలో రెండు కృష్ణజింకలను వీరు వేటాడినట్టు ఆరోపణలున్నాయి. కృష్ణ జింకలను వేటాడటంపై స్థానిక బిష్ణోయ్ వర్గీయులు నిరసనలకు దిగడంతో సల్మాన్ తదితరులపై పోలీసులు కేసు నమోదు చేశారు.