భారత్ కు కరోనా ముప్పు
న్యూఢిల్లీ, ఫిబ్రవరి 11,
చైనాలో స్వైరవిహారం చేస్తున్న ప్రాణాంతక కరోనా వైరస్‌ ముప్పు భారత్‌కు కూడా పొంచి ఉందని ఓ అధ్యయనం వెల్లడించింది. కరోనా వైరస్ ముప్పు పొంచి ఉన్న దేశాల టాప్ 20 జాబితాలో భారత్ ఉన్నట్టు తెలిపింది. చైనాను కుదిపేస్తున్న కరోనా వైరస్.. ప్రపంచంలోని వివిధ దేశాలకు వ్యాప్తి చెందే అవకాశాలపై జర్మనీకి చెందిన హంబోల్ట్‌ యూనివర్సిటీ, రాబర్ట్‌ కోచ్‌ ఇనిస్టిట్యూట్‌లు సంయుక్తంగా ఈ అధ్యయనాన్ని నిర్వహించాయి. చైనా నుంచి ఇతర దేశాలకు ప్రయాణించేవారి సంఖ్య ఆధారంగా ఈ అధ్యయనంలో కరోనా ముప్పును అంచనా వేశారు. కరోనా వైరస్ ముప్పు పొంచి ఉన్న దేశాల్లో థాయ్‌లాండ్ ముందు వరుసలో నిలిచింది. చైనా నుంచి అత్యధికంగా ఈ దేశానికే వెళ్తున్నట్టు గుర్తించారు.థాయ్‌లాండ్ తర్వాతి స్థానాల్లో జపాన్, దక్షిణ కొరియా, హాంకాంగ్, తైవాన్, అమెరికా, వియత్నాం, మలేషియా, సింగ్‌పూర్, కాంబోడియా ఉన్నాయి. ఈ జాబితాలో భారత్ 17వ స్థానంలో నిలిచింది. తొలిస్థానంలో నిలిచిన థాయ్‌లాండ్‌కు 2.1 శాతం ముప్పు ఉంటే, 17వ స్థానంలో ఉన్న భారత్‌కు 0.2 శాతం ముప్పు ఉందని అధ్యయనం వెల్లడించింది.‘చైనాలోని హంగ్‌ఝూ విమానాశ్రయంలో రాకపోకలను ఉదాహరణగా తీసుకుందాం.. అక్కడి నుంచి వెయ్యి మంది బయలుదేరితే.. అందులో సగటున ఇద్దరు జర్మనీకి వెళ్లే అవకాశముంది. అంటే కరోనా వైరస్‌ జర్మనీకి వ్యాప్తి చెందే ముప్పు 0.2 శాతంగా ఉన్నట్లు నిర్ధారించాం’ అని పరిశోధకులు తెలిపారు. ఈ లెక్కన ఢిల్లీలోని ఇందిరాగాంధీ అంతర్జాతీయ విమానాశ్రయానికి 0.066 శాతం, ముంబయి ఛత్రపతి శివాజీ విమానాశ్రయానికి 0.034శాతం, కోల్‌కతా నేతాజీ సుభాష్‌ చంద్రబోస్‌ విమానాశ్రయానికి 0.024 శాతం ముప్పు ఉందని తెలిపారు. బెంగళూరు, చెన్నై, హైదరాబాద్‌, కోచి విమానాశ్రయాలకు కొంత ముప్పు ఉందని, మొత్తంగా చూస్తే కరోనా వ్యాప్తి చెందే అవకాశాలు ఎక్కువగా ఉన్న దేశాల జాబితాలో భారత్‌ 17వ స్థానంలో నిలిచిందని పేర్కొన్నారు.అంతర్జాతీయ స్థాయిలో కరోనా వైరస్ వ్యాప్తికి విమానయానం తొలి స్థానంలో నిలుస్తుందని అధ్యయనం స్పష్టం చేసింది. చైనాలోని అతిపెద్ద నగరాల్లో ఒకటైన వుహాన్‌ విమాన ప్రయాణానికి హబ్‌గా ఉంది. ఇక్కడ నుంచి అన్ని అంతర్జాతీయ విమానాశ్రయాలకు విమానాలు రాకపోకలు సాగిస్తున్నాయి. వైరస్ ముప్పు నేపథ్యంలో జనవరి 23 నుంచి ఈ ఎయిర్‌పోర్ట్‌ను మూసివేసినా అప్పటికే చైనాలోని మిగతా ప్రాంతాలు, ఇతర దేశాలకు వ్యాప్తిచెందిందని పేర్కొన్నారు.జపాన్‌లోని టోక్యో కంటే ఒసాకా అంతర్జాతీయ విమానాశ్రయానికి చైనా నుంచి రాకపోకలు ఎక్కువగా సాగుతున్నాయి కాబట్టి ఇక్కడ వైరస్ ముప్పు అధికంగా ఉన్నట్టు అంచనా వేశారు. భారత్ కంటే రష్యాకు కూడా ఎక్కువ ముప్పే ఉందని తెలిపింది. ప్రస్తుతం చైనా వెలుపల జపాన్ (45), సింగ్‌పూర్ (28), థాయ్‌లాండ్ (25), హాంకాంగ్ (24), దక్షిణ కొరియా (23) కేసులు నమోదయ్యాయి.