తెలంగాణ బీజేపీకి త్వరలో కొత్త సారథి.. 
 ఆరుగురు నేతల్లో ఎవరిని వరించేనో
హైద్రాబాద్, ఫిబ్రవరి 12 
తెలంగాణ బీజేపీకి అతి త్వరలో కొత్త అధ్యక్షుడిని ఎన్నుకునే అవకాశాలు కనిపిస్తున్నాయి. ఫిబ్రవరి నెలాఖరు లోగా, లేదా మార్చి మొదటి వారంలో బీజేపీ రాష్ట్ర శాఖకు కొత్త సారథి వచ్చే అవకాశం ఉంది. బీజేపీ అధ్యక్ష పదవికి అర డజనుకు పైగా నేతలు బరిలో ఉన్నట్లు తెలుస్తోంది. ప్రస్తుత అధ్యక్షుడు లక్ష్మణ్‌తో పాటు కరీంనగర్ ఎంపీ బండి సంజయ్, పార్టీ జాతీయ ప్రధాన కార్యదర్శి మురళీధర్‌ రావు, మాజీ ఎంపీ జితేందర్‌ రెడ్డి, మాజీ మంత్రి డీకే అరుణ పేర్లు వినిపిస్తున్నాయి.పార్టీ సీనియర్ నేత ఇంద్రసేనా రెడ్డి, నిజామాబాద్ ఎంపీ ధర్మపురి అర్వింద్ కూడా అధ్యక్ష పదవిని ఆశిస్తున్నట్లు తెలుస్తోంది. బీజేపీ అధినాయకత్వం మాత్రం ప్రస్తుత పార్టీ అధ్యక్షుడు లక్ష్మణ్‌ వైపే మొగ్గు చూపుతున్నట్లు సమాచారం. ఈ నేపథ్యంలో రాష్ట్ర పార్టీ అధ్యక్ష పదవిని ఎవరికి దక్కుతుందనేది ఆసక్తిగా మారింది.వాస్తవానికి ముందస్తు షెడ్యూల్‌ ప్రకారం బూత్, గ్రామ, మండల, జిల్లా కమిటీలకు ఇప్పటికే ఎన్నికలు నిర్వహించాల్సి ఉంది. ఆ తర్వాత రాష్ట్ర అధ్యక్షుల ఎన్నికలు, అనంతరం జాతీయ అధ్యక్షుడి ఎన్నిక నిర్వహించాల్సి ఉంది. అయితే.. రాష్ట్రంలో ప్రస్తుతం మండల కమిటీలకు కూడా పూర్తి స్థాయిలో ఎన్నికలు జరగలేదు. మరోవైపు జాతీయ అధ్యక్షుడి నియామకం పూర్తయింది. ఈ నేపథ్యంలో ఎన్నికలు కాకుండా సంప్రదింపులు జరిపి నియామకాలు చేపట్టేందుకు రాష్ట్ర పార్టీ కసరత్తు చేస్తున్నట్లు సమాచారం.పది రోజుల్లో అన్ని మండలాలకు, జిల్లాలకు కమిటీలను ప్రకటించే అవకాశం ఉంది. ఫిబ్రవరి నెలాఖరులో లేదా వచ్చే నెల మొదటి వారంలో పార్టీ రాష్ట్ర అధ్యక్షుడి నియమించే అవకాశం ఉందని పార్టీ వర్గాల ద్వారా తెలుస్తోంది.