తల్లీకూతుళ్ల అదృశ్యం కేసు విషాదాంతం
విశాఖపట్టణం, ఫిబ్రవరి 13,
విశాఖ జిల్లాలో తల్లీకూతుళ్ల అదృశ్యం కేసు మిస్టరీ విషాదాంతమైంది. రెండు రోజుల కిందట తల్లిని గుర్తించిన పోలీసులు చిన్నారి జాడ కోసం ముమ్మరంగా గాలింపు చర్యలు చేపట్టారు. సుమారు వంద మంది సిబ్బందితో గాలించి చిన్నారి మృతదేహాన్ని వెలికితీశారు. కొండపై ఓ చోట పాతిపెట్టిన చిన్నారి బాడీని స్వాధీనం చేసుకుని పోస్టుమార్టం కోసం ఆస్పత్రికి తరలించారు. బిడ్డను కన్నతల్లే చంపేసి పూడ్చిపెట్టిందా? లేక ఆహారం, నీళ్లు లేక పాప మరణిస్తే తల్లి ఖననం చేసిందా? అనే కోణంలో పోలీసులు దర్యాప్తు చేస్తున్నట్లు తెలుస్తోంది.విశాఖలోని పులగానిపాలెం ప్రాంతానికి చెందిన కుసుమలత కుటుంబ కలహాల కారణంగా ఈ నెల 6వ తేదీన తన కూతురు జ్ఞానసను తీసుకుని ఇంటి నుంచి వెళ్లిపోయింది. భార్య, కూతురు కనిపించకపోవడంతో పరిసర ప్రాంతాల్లో వెతికిన భర్త.. అదే రోజు సాయంత్రం పోలీసులకు ఫిర్యాదు చేశారు. అప్రమత్తమైన పోలీసులు తల్లీకూతుళ్ల జాడ కోసం ముమ్మరంగా గాలింపు చర్యలు చేపట్టారుఆమె ఆరో తేదీ సాయంత్రం ఇంటి నుంచి వెళ్లిపోగా.. మూడు రోజుల తరువాత కుసుమలత ఆచూకీని పోలీసులు గుర్తించగలిగారు. విశాఖలోని చినముషిడివాడ ప్రాంతంలో ఉన్న కాటమయ్య కొండపై మహిళ జాడ కనిపించిందని 10 వ తేదీన సమాచారం అందడంతో పోలీసులు ఆ ప్రాంతానికి చేరుకున్నారు. కొండపై ఉన్న మహిళను కుసుమలతగా గుర్తించారు. అయితే ఆమె వద్ద పాప కనిపించలేదు.కుసుమలత వద్ద చిన్నారి జ్ఞానస కనిపించకపోవడంతో చిన్నారి ఏమై ఉంటుందన్న ఆందోళన రేగింది. అప్పటికే ఆహారం, నీళ్లు లేక క్రుశించిపోయిన కుసుమలత నుంచి వివరాలు తెలుసుకునేందుకు పోలీసులు ప్రయత్నించారు. అయితే ఆమె పొంతన లేని సమాధానాలు చెప్పింది. తిండీనీళ్లు లేక పాప చనిపోయిందని.. ఆమెను కొండపై పొదల్లో పూడ్చిపెట్టానని చెప్పడంతో అంతా హతాశులయ్యారు.ఆకలి బాధతో చిన్నారి జ్ఞానస మరణించడంతో పూడ్చిపెట్టానని తల్లి చెప్పడంతో పోలీసులు కొండను జల్లెడపట్టారు. ఆ ప్రాంతాన్ని సరిగ్గా చెప్పలేకపోవడంతో వంద మంది సిబ్బందిని రప్పించి ముమ్మరంగా గాలించారు. కాలమయ్య కొండను అణువణువూ గాలించిన పోలీసులు ఎట్టకేలకు బుధవారం చిన్నారి మృతదేహాన్ని గుర్తించారు. కొండపై పొదల మధ్య మట్టితో అసంపూర్తిగా పూడ్చిన స్థితిలో ఉన్న చిన్నారి డెడ్‌బాడీని స్వాధీనం చేసుకున్నారు.తల్లి కుసుమలత చెప్పినట్లు చిన్నారి ఆహారం, నీళ్లు లేక చనిపోయిందా? లేక తల్లే చంపేసి తాను ఆత్మహత్య చేసుకునేందుకు యత్నించిందా? అన్న కోణంలో పోలీసులు దర్యాప్తు చేస్తున్నారు. కుసుమలత ఒంటిపై గాయాలు కూడా ఆమె ఆత్మహత్య చేసుకుని చనిపోయేందుకు యత్నించినట్లుగా తెలుస్తోంది. కూతురిని చంపేసి పూడ్చిపెట్టి.. తాను సూసైడ్ చేసుకోవాలని భావించి విఫలమైందా? అనే కోణంలోనూ విచారిస్తున్నారు. చిన్నారి పోస్టుమార్టం రిపోర్ట్ అందిన తర్వాత స్పష్టత వచ్చే అవకాశం ఉన్నట్లు తెలుస్తోంది.అయితే పోలీసు విచారణలో ఆసక్తికర విషయాలు వెలుగుచూస్తున్నాయి. కుసుమలత ఇంటి నుంచి వెళ్లిపోయే ముందు ఎన్ని రోజులు బతికి ఉండొచ్చని గూగుల‌్‌‌లో శోధించినట్లు చెబుతున్నారు. తన వయసు వ్యక్తులు తిండి, నీళ్లు లేకుండా ఎన్ని రోజులు బతికి ఉండే అవకాశం ఉందంటూ గూగుల్‌లో సెర్చ్ చేసిందన్న అభిప్రాయాలు వ్యక్తమవుతున్నాయి. గూగుల్ సెర్చ్ చేసి మరీ వెళ్తే బెదిరించేందుకు వెళ్లిందా? లేక బిడ్డను చంపేసి తాను కూడా చనిపోయేందుకు ప్రయత్నించిందా? అనే విషయాలపై స్పష్టత రావాల్సి ఉంది.