ఎంటర్ టైన్ మెంట్ క్లబ్స్ పేరుతో దందా
న్యూఢిల్లీ, ఫిబ్రవరి 15,
ఎంటర్‌టైన్‌మెంట్ క్లబ్బుల పేరుతో సెక్స్ రాకెట్ నిర్వహిస్తున్న దారుణ ఘటన వెలుగు చూసింది. విదేశీ యువతులను రప్పించి వారి వీసా, పాస్‌పోర్టులు లాగేసుకుని బలవంతంగా వ్యభిచారం చేయిస్తున్నారు. అందుకు నిరాకరించిన ఓ డ్యాన్సర్‌ నుంచి భారీగా తిరిగి డబ్బులు డిమాండ్ చేశారు. ఎలాగో వారి బారి నుంచి తప్పించుకున్న ఆమె.. పోలీసులకు ఫిర్యాదు చేయడంతో ఇద్దరు భారతీయ దంపతులను సింగపూర్ పోలీసులు అరెస్టు చేశారు.భారత్‌కు చెందిన అనంత్, ప్రియాంక రాజేశ్ దంపతులకు సింగపూర్‌లో రెండు హిందీ ఎంటర్‌టైన్‌మెంట్ క్లబ్బులు ఉన్నాయి. ఈ క్లబ్బుల్లో బంగ్లాదేశ్‌కి చెందిన ముగ్గురు డ్యాన్సర్లు పనిచేస్తూ వారితోనే కలిసి నివాసం ఉండేవారు. కనీసం విశ్రాంతి లేకుండా ముగ్గురు మహిళలతో క్లబ్బుల్లో డ్యాన్స్ చేయించేవారు. టార్గెట్లు ఇచ్చి అవి కాకుంటే జీతంలో కోత విధించి వేధింపులకు పాల్పడేవారని తెలుస్తోంది.కొద్దిరోజుల తర్వాత ఓ డ్యాన్సర్‌ని పిలిచిన ప్రియాంక.. కస్టమర్లతో వెళ్లాలని చెప్పడంతో ఆమె కంగుతింది. వ్యభిచారం చేయాలని ఒత్తిడి చేయడంతో ఆమె తిరిగి బంగ్లాదేశ్ వెళ్తానని చెప్పింది. దీనికి ఆగ్రహించిన ప్రియాంక 4 లక్షల బంగ్లా కరెన్సీ చెల్లించాలని డిమాండ్ చేసింది. డ్యాన్సర్ల పాస్‌పోర్టులు, ధ్రువపత్రాలు లాక్కుని అపార్ట్‌మెంట్ నుంచి బయటకు వెళ్లకుండా కట్టడి చేసింది.ఎలాగోలా వారి నుంచి తప్పించుకున్న బంగ్లా డ్యాన్సర్ క్లబ్ నుంచి పారిపోయింది. అనంతరం మిగిలిన ఇద్దరు డ్యాన్సర్లు కూడా అక్కడ పనిచేయడం మానేశారు. బంగ్లా డ్యాన్సర్లు ముగ్గురు కలిసి సింగపూర్ పోలీసులను ఆశ్రయించడంతో దంపతుల లీలలు బయటికొచ్చాయి. నిందితులు అనంత్, ప్రియాంకను పోలీసులు అరెస్టు చేశారు. దంపతులపై నేరం రుజువవ్వడంతో కోర్టు జైలుశిక్షతో పాటు జరిమానా విధించింది.