ఉచితంగా కటింగ్, షేవింగ్
హైద్రాబాద్, ఫిబ్రవరి 15 
తమ అభిమాన నేత ముఖ్యమంత్రి కేసీఆర్ పుట్టిన రోజు సందర్భంగా ఉచితంగా కటింగ్, షేవింగ్ చేస్తానంటూ ఓ నాయీ బ్రాహ్మణుడు ప్రకటించాడు. కేసీఆర్, కేటీఆర్ ఫోటోలతో ఏర్పాటు చేసిన బ్యానర్ ఆకర్షిస్తోంది. సోషల్ మీడియాలో ఇది చక్కర్లు కొడుతోంది. ఆ ఆఫర్ ప్రకటించిన సెలూన్ షాపు యజమాని.. హైదరాబాద్‌లోని ఖైరతాబాద్ నియోజకవర్గ పరిధికి చెందినవారుగా తెలుస్తోంది. ఫిబ్రవరి 17తో సీఎం కేసీఆర్ 66వ పడిలోకి అడుగుపెట్టబోతున్నారు.కేసీఆర్ పుట్టిన రోజు సందర్భంగా మొక్కలు నాటాలని టీఆర్‌ఎస్ పార్టీ కార్యకర్తలు, అభిమానులకు మున్సిపల్, ఐటీ శాఖ మంత్రి, టీఆర్‌ఎస్ వర్కింగ్ ప్రెసిడెంట్ కేటీఆర్ పిలుపునిచ్చారు. తెలంగాణ రాష్ట్రాన్ని హరిత రాష్ట్రంగా తీర్చిదిద్దాలనే లక్ష్యంతో సీఎం కేసీఆర్ ‘హరిత హారం’ కార్యక్రమాన్ని ప్రతిష్టాత్మకంగా తీసుకున్న విషయాన్ని ఆయన గుర్తు చేశారు. ఈ నేపథ్యంలో మొక్కలు నాటాలని పార్టీ నేతలు, కార్యకర్తలకు సూచించారు.గతేడాది సీఎం కేసీఆర్ బర్త్‌డే రోజున ఆయన అభిమానులు, పార్టీ నేతలు, కార్యకర్తలు శుభాకాంక్షలు తెలపడానికి క్యూ కట్టారు. దీంతో బేగంపేట, ఖైరతాబాద్, పంజాగుట్ట, సోమాజిగూడ తదితర ప్రాంతాల్లో భారీ ట్రాఫిక్ జాం ఏర్పడింది. ఈ నేపథ్యంలో కేటీఆర్ ట్వీట్‌కు ప్రాధాన్యం సంతరించుకుంది.