గూగుల్ పోయె... రైల్ వైర్ వచ్చే
చెన్నై, ఫిబ్రవరి 19
భారతదేశంలో 400 రైల్వే స్టేషన్లలో ఉచితంగా ఉండే గూగుల్ వైఫై ఇకపై ప్రయాణికులకు అందుబాటులో ఉండదు. వివిధ నివేదికల ప్రకారం గూగుల్ సంస్థ భారత దేశం అంతటా అందిస్తున్న ఉచిత వైఫై సేవలను మూసి వేయనున్నట్లు తెలుస్తుంది. అయితే ఇది కేవలం ఇండియాలో మాత్రమే కాదు ప్రపంచ వ్యాప్తంగా అనేక దేశాలైన బ్రెజిల్, సౌత్ ఆఫ్రికా, నైజేరియా, థాయ్ లాండ్, మెక్సికో, ఇండోనేషియా, వియత్నాం, ఫిలిప్పీన్స్ లో కూడా దీనిని అమలు చేస్తున్నారు.గూగుల్ సంస్థ ఇచ్చిన ఒక ప్రకటన ప్రకారం ఇంటర్నెట్ అనేది ఇప్పుడు చాలా చవకగా మారింది. ముఖ్యంగా భారతదేశంలో ఒక్క జీబీ మొబైల్ డేటా అతి తక్కువ ధరలోనే లభిస్తుంది. గత ఐదు ఏళ్లలో మొబైల్ డేటా ధరలు దాదాపు 95 శాతం తగ్గిపోయాయి. అంతే కాకుండా దీనిని స్థిరమైన వ్యాపారంగా మార్చడానికి సంస్థ కొన్ని ఇబ్బందులను ఎదుర్కొంటుంది. భారత దేశంలో రైల్ టెల్, ఇండియన్ రైల్వేస్, ఇతర దేశీయ సంస్థలతో కలిసి ఇండియాలోని అనేక రైల్వే స్టేషన్లలో గూగుల్ ఉచిత వైఫై సేవలను అందిస్తుంది. ప్రతి నెలా సగటున భారతీయులు 10 జీబీ ఇంటర్నెట్ ను వినియోగిస్తున్నట్లు గూగుల్ ఆ ప్రకటనలో తెలిపింది.ఈ కార్యక్రమాన్ని గూగుల్ 2015 లో భారతదేశంలో మొట్టమొదట ప్రారంభించింది. ఇండియాలోని రద్దీగా ఉండే రైల్వే స్టేషన్లలో ఈ ఇంటర్నెట్ సౌకర్యాన్ని ప్రయాణికులు బాగా వినియోగించుకోవడం మొదలు పెట్టారు. గత ఐదు ఏళ్లుగా భారతదేశంలో 400 రైల్వే స్టేషన్లు గూగుల్ చే ఏర్పాటు చేయబడిన ఈ ఉచిత సేవలను వినియోగించుకున్నాయి. బిఎస్ఎన్ఎల్ సహకారంతో పూణే, బెంగళూరు సహా కొన్ని ప్రదేశాల్లో ఈ ప్రాజెక్టు నడుస్తుంది.మెక్సికో, దక్షిణాఫ్రికా, బ్రెజిల్ లోని గూగుల్ సేవలు కూడా భారతదేశం తరువాత వచ్చాయి. ఇప్పుడు అక్కడ కూడా ఈ సదుపాయం నిలిచిపోతుంది. కానీ  దీని కారణంగా మనకు పెద్దగా ఇబ్బంది ఏర్పడే పరిస్థితి లేదు. ఎందుకంటే ప్రస్తుత రోజుల్లో ప్రతి ఒక్కరి స్మార్ట్ ఫోన్స్ లో సరిపడేంత డేటా తప్పకుండా ఉంటుంది. ఏదేమైనా భారతదేశంలో పెద్ద సంఖ్యలో అట్టడుగు ప్రజలు కూడా ఉన్నారు. వారు ఈ రైల్వే స్టేషన్లలో రోజువారీ జీవితంలో ఉచిత వైఫైను ఎంతో వినియోగించుకునేవారు. అయితే ఇప్పుడు ఆ అవకాశం ఇక ముగిసినట్లే. కానీ రైల్ టెల్ మాత్రం ఉచిత వైఫై సేవలు కొనసాగిస్తామని చెబుతుంది. గూగుల్ సహకారం లేకుండా దీనిని ఎలా అమలు పరుస్తారో చూడాలి.