మద్యంలా మారుతున్న మూత్రం
న్యూయార్క్, ఫిబ్రవరి 27
ఓ మహిళ చిత్రమైన పరిస్థితి ఎదుర్కొంటోంది. ఎప్పుడు టాయిలెట్‌కు వెళ్తున్నా మద్యం వాసన వస్తోంది. తనకు మద్యం అలవాటు లేకపోయినా.. ఆ వాసన ఎక్కడ నుంచి వస్తుందో తొలుత అర్థం కాలేదు. అది తన మూత్రం నుంచే వస్తోందని తెలిసిన తర్వాత ఆమె ఆశ్చర్యపోయింది. ఏం జరుగుతుందో అర్థం కాలేదు. తనకు మద్యం అలవాటు లేకున్నా.. మూత్రం నుంచి మద్యం ఎందుకు వస్తుందో తెలియక గందరగోళానికి గురైంది. ఈ చిత్రమైన పరిస్థితికి నవ్వాలో ఏడ్వాలో తెలియక.. డాక్టర్లను ఆశ్రయించింది.పెన్సిల్వినియాలోని యూనివర్శిటీ ఆఫ్ పిట్స్‌బర్గ్ మెడికల్ సెంటర్ ప్రెస్బేటెరియన్ హాస్పిటల్ వెల్లడించిన వివరాల ప్రకారం.. 61 ఏళ్ల మహిళ (పేరు గోప్యంగా ఉంచారు) ఇటీవల మూత్రం పోస్తుంటే మద్యం వస్తోంది. ఆమెకు మద్యం అలవాటు లేకున్నా.. అదెలా సాధ్యమని వైద్యులు ఆశ్చర్యపోయారు. ఈ సందర్భంగా ఆమెకు వైద్య పరీక్షలు నిర్వహించారు. ఆమె రిపోర్టులను పరిశీలించిన వైద్యులు ఆమె మూత్రం మద్యంలో ఎందుకు మారిందో తెలుసుకున్నారు.బాధితురాలు మధుమేహ వ్యాధితో బాధపడుతోంది. కాలేయ సిరోసిస్ (కాఠిన్యత) వ్యాధికి గురైంది. ఆమెకు గతంలో వైద్య పరీక్షలు నిర్వహించిన డాక్టర్లు కాలేయ మార్పిడి చేయాలని సూచించారు. ప్రస్తుతం ఆమె కాలేయాన్ని దానం చేసే దాతలు కోసం ఎదురుచూస్తోంది. అయితే, ఆమె మద్యం అతిగా సేవించడం వల్లే కాలేయం పాడైందని వైద్యులు భావించారు. ఈ సందర్భంగా మద్యం అలవాటు మాన్పించే చికిత్సను సూచించారు. అయితే, వైద్య పరీక్షల్లో ఆమె మద్యం బానిస కాదని తేలింది. ఆమె రక్తంలో ఎక్కడా మద్యం నమూనాలే లేవని రిపోర్టులు పేర్కొన్నాయి.ఈ కేసును పరిశీలించిన వైద్య నిపుణులు కాండిడా గ్లాబ్రాటా (ఇది హాప్లోయిడ్ ఈస్ట్ జాతికి చెందిన సూక్ష్మజీవి) అధిక స్థాయిలో ఉన్నట్లు కనుగొన్నారు. ఈ ఈస్ట్ ప్రతి ఒక్కరి శరీరంలోనూ ఉత్పత్తి అవుతోందని, ఆమెలో షుగర్ స్థాయిలు ఎక్కువగా ఉండటం వల్ల అవి పేగుల్లో తిష్టవేశాయని తెలిపారు. బీరు తయారీలో ఉపయోగించే ‘బ్రూవర్స్’ అనే ఫంగస్‌‌లా ఇవి పనిచేస్తాయన్నారు. బీరు తయారీకి వాడే గింజల్లోని కార్బోహైడ్రేట్లను ఆల్కహాల్‌గా మార్చేందుకు ఈ ఫంగస్‌ను వాడతారని, ఆమెలో కూడా ఇలాంటి ప్రక్రియే జరిగి మూత్రానికి బదులు కడుపులో మద్యం తయారవుతోందని పేర్కొన్నారు.ఈ ప్రకియ అంతా ఆమె కడుపులోని ప్రేగుల్లోనే జరుగుతోందని నిపుణులు తెలిపారు. అయితే, ఇది చాలా అరుదుగా జరిగే ప్రక్రియ అని, మొదట్లో వైద్యులు ఆమె నిజాన్ని దాస్తోందని, మద్యం అలవాటును మానుకోలేక మోసం చేస్తుందని భావించారని తెలిపారు. ఆమె రక్తంలో మద్యం నమూనాలు లేకపోవడంతో మరింత లోతుగా ఈ కేసును పరిశీలిచామన్నారు. ఈ సమస్యను ‘యురినరీ ఆటోబ్రేవరీ సిండ్రోమ్’ అంటారని తెలిపారు. ఇకపై రోగులు ఎవరైనా తమకు మద్యం అలవాటు లేకపోయిన.. మూత్రం మద్యం వాసన వస్తుందంటే నిర్లక్ష్యం చేయొద్దని వైద్యులకు సూచించామన్నారు. ప్రస్తుతం బాధితురాలికి చికిత్స అందిస్తున్నామని తెలిపారు. న్యూయార్క్‌కు చెందిన ఓ వ్యక్తి కూడా గతంలో ఇలాంటి సమస్యే ఎదుర్కొన్నాడు.