ఏప్రిల్ 16నే పెళ్లికొడుకులు అవుతోన్న నితిన్, నిఖిల్!
హైద్రాబాద్, ఫిబ్రవరి 27
టాలీవుడ్‌కు పెళ్లి సీజన్ వచ్చింది. ఒకేసారి ఇద్దరు హీరోలు పెళ్లిపీటలు ఎక్కుతున్నారు. ఈ వేసవిలో తన బ్యాచ్‌లర్ లైఫ్‌కి టాటా చెప్పి దాంపత్య జీవితంలోకి అడుగుపెట్టబోతున్నారు. యంగ్ హీరోలు నితిన్, నిఖిల్ సిద్ధార్థ ఒకే రోజు నుంచి తమ దాంపత్య జీవితాన్ని మొదలుపెట్టబోతున్నారు. ఏప్రిల్ 16న వీరిద్దరూ పెళ్లికొడుకులుగా మారనున్నారు. తన పెళ్లి కోసం నితిన్ దుబాయ్ వెళ్తుండగా.. నిఖిల్ మాత్రం హైదరాబాద్‌లోనే పెళ్లి వేడుక చేసుకోనున్నారు.ఇదిలా ఉంటే, గత కొన్నాళ్లుగా భీమవరం అమ్మాయి డాక్టర్ పల్లవి వర్మతో ప్రేమలో ఉన్న నిఖిల్ ఆమెతో ఫిబ్రవరి 1న నిశ్చితార్థం చేసుకున్నారు. గోవాలో కుటుంబ సభ్యుల సమక్షంలో వీరి నిశ్చితార్థం వైభవంగా జరిగింది. గోవాలోనే పల్లవి వర్మకు తన లవ్‌ను ప్రపోజ్‌ చేశారట. అందుకే, అక్కడే నిశ్చితార్థం వేడుకను జరుపుకున్నారు. వీరి వివాహం ఏప్రిల్ 16న హైదరాబాద్‌లో జరగనుంది.మరోవైపు, నితిన్ పెళ్లి ప్రకటన అందరికీ ఒక సర్‌ప్రైజ్. ఎందుకంటే, నితిన్‌ది ప్రేమ వివాహం. కానీ, ఈ విషయాన్ని చాలా రహస్యంగా ఉంచారాయన. కొన్నేళ్లుగా ప్రేమిస్తోన్న అమ్మాయినే ఆయన పెళ్లిచేసుకుంటున్నారు. నాగర్ కర్నూలుకు చెందిన షాలిని కందుకూరిని ఏప్రిల్ 16న నితిన్ పెళ్లాడబోతున్నారు. దుబాయ్‌లో ఏప్రిల్ 15న నిశ్చితార్థం.. 16న కొద్దిమంది సన్నిహితులు, స్నేహితుల సమక్షంలో వీరి పెళ్లి జరగబోతోంది. 21న హైదరాబాద్‌లో గ్రాండ్ రిసెప్షన్ ఏర్పాటు చేస్తున్నారు. మొత్తానికి యూత్‌లో మంచి క్రేజ్ ఉన్న ఇద్దరు టి-టౌన్ బోయ్స్ ఓకేరోజు పెళ్లికొడుకులు అవుతున్నారు.