జగన్ సర్కార్ కు మంత్రి షాక్
న్యూఢిల్లీ, ఫిబ్రవరి 28 
జగన్ సర్కార్‌కు కేంద్రమంత్రి పీయూష్ గోయల్ కొత్త కష్టాలు తెచ్చిపెట్టారు. పీపీఏల విషయంలో ఆయన చేసిన వ్యాఖ్యలు ప్రభుత్వానికి ఇబ్బందిగా మారాయి.. ప్రతిపక్షం టీడీపీకి ఆయుధంగా మారాయి. అదేంటని ఆశ్చర్యపోతున్నారా.. నిజమే. పీయూష్ ఢిల్లీలో జరిగిన సదస్సులో పీపీఏల పునఃసమీక్షపై స్పందించారు. ఆ సదస్సులో పీయూష్ గోయల్ చేసిన వ్యాఖ్యలకు సంబంధించిన ఈ వీడియో సోషల్ మీడియాలో బాగా వైరల్ అవుతోంది. టీడీపీకి ఆయుధంగా మారింది.. జగన్ సర్కార్‌ను టార్గెట్ చేస్తోంది.ఏపీ సర్కార్‌పైనే పీయూష్ గోయల్ మండిపడ్డారని.. జగన్ సర్కార్ తీరుతో దేశంలో పరువు పోయిందని టీడీపీ నేతలు, తెలుగు తమ్ముళ్లు సోషల్ మీడియాలో హోరెత్తిస్తున్నారు. గత రెండు రోజులుగా వీడియోను వైరల్ చేస్తున్నారు. తాజాగా మాజీ మంత్రి నారా లోకేష్ కూడా పీయూష్ గోయల్ వీడియోను ట్వీట్ చేశారు. ఏపీ ప్రభుత్వంపై విరుచుకుపడ్డారు. బలమైన నేత కనుకే ట్రంప్ తో విందుకి పిలవలేదు అని రాష్ట్ర మంత్రి అంటే నమ్మలేకపోయాను అన్నారు లోకేష్. దేశాన్ని నాశనం చేసే అంత బలం, కరోనా కంటే బలమైన వైరస్ అని కేంద్ర మంత్రి మాటలు విన్న తరువాత అసలు విషయం అర్ధం అయ్యింది అంటూ పీయూష్ గోయల్.. ఆ పక్కనే మంత్రి బొత్స సత్యనారాయణ మాట్లాడిన వీడియోను కలిపి ట్వీట్ చేశారు లోకేష్.కేంద్రమంత్రి పీయూష్ గోయల్ ఆ వీడియోలో.. జగన్ సర్కార్ పేరు ఎత్తకుండానే కీలక వ్యాఖ్యలు చేశారు. దక్షిణాదిలోని ఓ రాష్ట్రం పీపీఏల పునఃసమీక్షకు ప్రయత్నం చేసిందని పరోక్షంగా ప్రస్తావించారు. ఈ సమస్యకు పరిష్కరించే పనిలో ఉన్నామని చెప్పుకొచ్చారు. ప్రభుత్వాలు మారినా, నేతలు మారినా కాంట్రాక్టులు, వాటికి సంబంధించిన.. నిబంధనలు మారకుండా ఉండేలా కేంద్రం, రాష్ట్రాలు కలిసి ఓ చట్టం లాంటిది రూపొందించాల్సిన అవసరముందని అభిప్రాయపడ్డారు కేంద్రమంత్రి.ఏదైనా రాష్ట్రం ఒప్పందాలను పునఃసమీక్షిస్తే ఆ రాష్ట్రానికి విడుదల చేసే నిధుల్లో రిజర్వు బ్యాంకు కోత విధించి.. ఆ మొత్తాన్ని కాంట్రాక్టు సంస్థకు చెల్లించేలా ఉండాలని పీయూష్ అన్నారు. మొత్తం దేశ ఖ్యాతిని నాశనం చేసే పరిస్థితికి అవకాశం కల్పించొద్దని.. ఏదైనా తప్పు జరిగితే.. అది చేసిన వ్యక్తిపై చర్యలు తీసుకోవాలి.. కానీ దేశ ప్రగతిగాథను చంపేయకండి అన్నారు. కొన్ని రాష్ట్రాలు కేంద్రం ఏం ప్రతిపాదించినా దానిని కచ్చితంగా వ్యతిరేకించాలన్నట్లుగా వ్యవహరిస్తున్నాయని పీయూష్ వ్యాఖ్యానించారు. మరి టీడీపీ చేస్తున్న విమర్శలపై ఏపీ ప్రభుత్వం ఎలాంటి క్లారిటీ ఇస్తుందో చూడాలి మరి.జగన్ సర్కార్ అధికారంలోకి వచ్చిన తర్వాత పీపీఏలను పున: సమీక్షకు సిద్ధమైంది. గత ప్రభుత్వ హయాంలో భారీగా అవకతవకలు జరిగాయంటోంది. దీంతో వెంటనే కంపెనీలు హైకోర్టును ఆశ్రయించగా.. కోర్టు ఈ నిర్ణయాన్ని తప్పుబట్టింది. తర్వాత ప్రతిపక్షం టీడీపీ జగన్ సర్కార్‌ను టార్గెట్ చేసింది. అప్పట్లో ఈ పీపీఏల పున: సమీక్ష నిర్ణయం పెద్ద దుమారమే లేపింది. అయితే సమీక్ష విషయం కేంద్రం దృష్టికి వెళ్లింది.. తాజాగా పీయూష్ గోయల్ చేసిన వ్యాఖ్యలతో ఈ వ్యవహారం మళ్లీ తెరపైకి వచ్చింది.