సగానికి తగ్గిన చికెన్ వ్యాపారం
హైద్రాబాద్,ఫిబ్రవరి 28 
కెన్ తింటే కరోనా వైరస్ సోకుతుందంటూ సామాజిక మాధ్యమాల్లో విపరీతంగా ప్రచారం జరుగుతోంది. కొన్ని ప్రాంతాల్లో కోళ్లకు ఏదో జబ్బు చేసి చనిపోయిన ఫోటోలను సోషల్ మీడియాలో పోస్ట్ చేసి, అవి కరోనా వైరస్ వల్లే చనిపోయాయని కొందరు వైరల్ చేస్తున్నారు. ఈ ప్రభావం తెలంగాణ, ఏపీలో కోళ్ల పరిశ్రమను కోలుకోలేని దెబ్బతీస్తోంది. కొద్ది రోజుల ముందు వరకూ కూడా సాధారణ డిమాండ్ ఉన్న చికెన్‌కు ఇప్పుడు డిమాండ్ గణనీయంగా తగ్గిపోయింది. కరోనా వైరస్ వార్తలు వచ్చాక కూడా పౌల్ట్రీ పరిశ్రమ బాగానే ఉండేదని, వైరస్ వల్ల కోళ్లు చనిపోతున్నాయని ప్రచారం జరగడం మొదలు పెట్టాక పరిశ్రమ మరింత క్షీణించిందని విశ్లేషకులు చెబుతున్నారు. 15 రోజుల క్రితం వరకూ కూడా తెలంగాణలో స్థిరంగా ఉన్న పౌల్ట్రీ పరిశ్రమ వ్యాపారం ఇప్పుడు సగానికిసగం తగ్గిపోయింది. రాష్ట్రవ్యాప్తంగా 6.50 కోట్ల కోళ్లతో కళకళలాడిన పరిశ్రమ ప్రస్తుతం 4 కోట్లకు పడిపోయింది. చికెన్‌ అమ్మకాల పతనం వల్ల రూ.200 కోట్లు, గుడ్ల అమ్మకాలు పడిపోవడం వల్ల మరో రూ.వంద కోట్ల మేర నష్టం వాటిల్లింది. ఏపీలోనూ ఇదే పరిస్థితి నెలకొంది. రెండు రాష్ట్రాల్లో కలిపి ఈ నకిలీ ప్రచారం వల్ల దాదాపు రూ.600 కోట్ల మేర నష్టం వాటిల్లినట్లు నిపుణుల అంచనా. ఈ పరిస్థితిని చక్కది ప్రజల్లో అవగాహన పెంచడానికి సంబంధిత సంస్థలు అవగాహన కార్యక్రమాలు చేపట్టాలని నిర్ణయించాయి.ఇందులో భాగంగా నేషనల్‌ ఎగ్‌ కో ఆర్డినేషన్‌ కమిటీ(నెక్‌), తెలంగాణ పౌల్ట్రీ ఫెడరేషన్‌, తెలంగాణ పౌల్ట్రీ బ్రీడర్స్‌ అసోసియేషన్‌ శుక్రవారం హైదరాబాద్‌లోని నెక్లెస్‌ రోడ్డులో ‘చికెన్‌ అండ్‌ ఎగ్‌’ మేళాను నిర్వహించాలని నిర్ణయించాయి. 6 వేల కేజీల చికెన్‌ ఫ్రైని మేళాలో ఉచితంగా పంచనున్నాయి.చైనాలో పక్షులు, జంతువుల మాంసం తినడం వల్లే కరోనా వ్యాపించిందంటూ, దీనివల్ల వేలాది మంది చనిపోయారనే వార్త సోషల్ మీడియాలో విపరీతంగా వైరల్ అవుతోంది. ఇక్కడ కూడా చికెన్‌ తింటే వైరస్ సోకడం పడకతప్పదంటూ కొంత మంది పుకార్లు రేపుతున్నారు. దీని ప్రభావం జనాలపై బాగా పడింది. ఆ నకిలీ వార్తల ధాటికి చికెన్‌ వినియోగం తగ్గి, ధర బాగా పడిపోయింది. కిలో చికెన్‌ ధర(స్కిన్‌తో కలిపి) రూ.80 నుంచి రూ.100 మాత్రమే ఉంది. స్కిన్ లెస్ చికెన్‌ అయితే రూ.100 నుంచి రూ.120 వరకూ అమ్ముతున్నారు. ఈ పుకార్ల వల్ల గడిచిన రెండు వారాల సమయంలో కోళ్ల ఫారాలు వెలవెలబోయాయి. హోటళ్లలో కూడా చికెన్‌ బిర్యానీలు, చికెన్‌ ఆధారిత ఆహార పదార్థాలు, ఇతర స్నాక్స్ అమ్మకాలు తగ్గాయికరోనా వైరస్ పుకారుకు తోడు మరో కోళ్లకు మరో సీజనల్‌ వైరస్‌ ఒకటి సోకింది. సాధారణంగా వేసవి కాలంలో కోళ్లకు ‘న్యూక్యాజిల్‌’ అనే వ్యాధి సోకుతుంది. అధిక ఉష్ణోగ్రతల వల్ల ఇది వ్యాప్తి చెందుతుంది. అధిక వేడికి తట్టుకోలేక కోళ్లు కుప్పకూలి పోతుంటాయి. అయితే ఈసారి ఎండలు ముదరకముందే న్యూకాజిల్‌ కొన్ని చోట్ల ప్రభావం చూపిస్తోంది. నాలుగు రోజుల క్రితం ఖమ్మం జిల్లాలో ఒక్కసారిగా 30 వేల కోళ్లు చనిపోయాయి. పశు సంవర్థక శాఖ అధికారులు అక్కడికి వెళ్లి నమూనాలు సేకరించి, ల్యాబ్‌లకు పంపించగా.. అవి ‘న్యూ కాజిల్‌’ వ్యాధితోనే మృతి చెందినట్లుగా తేల్చారు. ఉమ్మడి వరంగల్‌ జిల్లాలో కూడా ఈ వ్యాధి ప్రభావం కనిపించింది.మరోవైపు కోళ్లకు కొక్కెరతెగులు కూడా సోకినట్లుగా తెలుస్తోంది. వాతావరణంలో ఒక్కసారిగా వేడి రావడం, ఉష్ణోగ్రతలు 5 డిగ్రీల దాకా పెరగడంతో ఇది వ్యాప్తి చెందిందని అధికారులు చెబుతున్నారు. గడిచిన నాలుగు రోజుల్లో ములుగు, వెంకటాపూర్‌ మండలాల్లో సుమారు రెండు వేలకు పైగా కోళ్లు చనిపోయినట్లు తెలుస్తోంది. ములుగు జిల్లా వ్యాప్తంగా ఈ రెండు మండలాల్లో మాత్రమే ఎక్కువగా కోళ్ల ఫారాలుండగా, వీటి మరణానికి కొక్కెర తెగులు, ఆర్‌డీ అనే వైరస్‌ కారణమని పశు సంవర్థక శాఖ వైద్యులు తేల్చారు. సుమారు 10 వేల కోళ్లు మరణించాయి.వీటి ప్రభావంతో రైతులపై వ్యయ భారం పెరిగిందని పౌల్ట్రీ నిపుణులు నిపుణులు చెబుతున్నారు. బ్రాయిలర్‌ కోళ్లను రెండు కేజీల బరువు వచ్చే వరకూ ఉంచి తర్వాత విక్రయిస్తారు. రాష్ట్రంలో నెలకు 4 కోట్ల కిలోల మాంసం, రోజుకు 3.5 కోట్ల గుడ్లు ఉత్పత్తి అవుతున్నాయి. అయితే కరోనా వైరస్ వల్ల, చికెన్‌, గుడ్లకు ఏ మాత్రం సంబంధం లేదని.. వీటిని తినడం వల్ల కరోనా వైరస్‌ సోకదని కోళ్ల పరిశ్రమ పెద్దలు తెలిపారు.అయితే, ప్రస్తుతం ఆందోళన చెందాల్సిన స్థాయిలో కోళ్ల మరణాలు లేవని.. పరిస్థితి అదుపులోనే ఉందని పశు సంవర్థకశాఖ సంచాలకులు వెల్లడించారు. కోళ్లు పెంచే రైతులు వాటికి సీజనల్‌ వ్యాధులు రాకుండా టీకాలు వేయిస్తే సరిపోతుందని సూచించారు. కోళ్లకు ఇచ్చే దాణా మార్చి, నీళ్లు కూడా తరుచుగా మారుస్తూ ఉండాలని దిశా నిర్దేశం చేశారు. కోళ్లు తింటే కరోనా వైరస్‌ వ్యాపిస్తుందనేది పూర్తిగా అబద్ధమని, నిర్భయంగా చికెన్ తినొచ్చని స్పష్టం చేశారు.