రాహు హీరోయిన్ మిస్సింగ్
హైద్రాబాద్, మార్చ్ 2
రాహు’ మూవీ హీరోయిన్ కృతి గార్గ్‌ ఒక అజ్ఞాత వ్యక్తి ట్రాప్‌లో పడిపోయారు. ‘అర్జున్ రెడ్డి’ దర్శకుడు సందీప్ రెడ్డి వంగ పేరుతో కృతి గార్గ్‌కు ఒక వ్యక్తి ఫోన్ చేశాడు. ‘రాహు’ మీ నటన అద్భుతం అన్నాడు. మీలాంటి ప్రతిభ కలిగిన హీరోయిన్ దొరకడం మా అదృష్టం అన్నాడు. ప్రభాస్ పక్కన హీరోయిన్‌గా చేయాలని ఆమెను నమ్మించాడు. అంతేకాకుండా స్టోరీ వినడానికి ముంబైకి రమ్మని ఆమెను ఆహ్వానించాడు.అయితే, దీనిపై అనుమానం వ్యక్తం చేసిన కృతి గార్గ్.. విషయాన్ని ‘రాహు’ దర్శకుడు సుబ్బు వేదుల దృష్టికి తీసుకెళ్లారు. ఆయనతో కూడా ఆ అజ్ఞాత వ్యక్తి మాట్లాడాడు. కానీ, అతడి మాటలను సుబ్బు నమ్మలేదు. ఇదిలా ఉంటే, కృతి గార్గ్ ఆదివారం ముంబై బయలుదేరి వెళ్లారు. అయితే, సోమవారం ఉదయం నుంచి ఆమె ఫోన్ నంబర్ కలవట్లేదు. దీంతో కంగారు పడిన ‘రాహు’ దర్శకుడు సుబ్బు పోలీసులకు ఫిర్యాదు చేశారు. పంజాగుట్ట పోలీస్ స్టేషన్‌లో మిస్సింగ్ కేసు నమోదు చేశారు.సందీప్ రెడ్డి వంగ పేరుతో గత ఐదు రోజులుగా ఒక వ్యక్తి కృతికి ఫోన్ చేస్తున్నాడు. ‘రాహు’లో మీ నటన చాలా బాగుంది.. మీ లాంటి టాలెంటెడ్ హీరోయిన్ కోసమే వెతుకుతున్నాను.. ప్రభాస్ పక్కన హీరోయిన్‌గా మిమ్మల్ని తీసుకుంటాను అని చెప్పాడు. ఆమె కాన్ఫరెన్స్‌లో నన్ను కూడా కలిపింది. అతను నాతో రెండు గంటలపాటు మాట్లాడాడు. సందీప్ రెడ్డి నాతో రెండు గంటలు ఎందుకు మాట్లడతారు అని అప్పుడే నాకు అనుమానం వచ్చింది. కానీ, ఆయన మాటలు నేను ఎప్పుడూ వినలేదు. ఫోన్ పెట్టేసిన తరవాత యూట్యూబ్‌లో సందీప్ ఇంటర్వ్యూలు చూశాను. వాయిస్ అతనిది కాదని నిర్ధారించుకున్నాను’’ అని సుబ్బు చెప్పుకొచ్చారు.ముంబైలో ఉంటోన్న కృతి ఆదివారం అక్కడకు బయలుదేరి వెళ్లారని సుబ్బు చెప్పారు. అయితే, సోమవారం ఉదయం నుంచి కృతి ఫోన్ కలవడం లేదని.. అందుకే, భయమేసి పోలీసులకు ఫిర్యాదు చేశానని వెల్లడించారు. పోలీసులు ఆ అజ్ఞాత వ్యక్తి ఫోన్ నంబర్‌ను ట్రేస్ చేశారని.. అది అనంతపురానికి చెందిన నరేష్ అనే వ్యక్తి నంబర్‌గా చూపిస్తుందని తెలిపారు. ప్రస్తుతం పోలీసులు విచారణ జరుపుతున్నారని అన్నారు. అయితే, మహిళల సాధికారత కోసం తాను సినిమా చేస్తే.. తన సినిమాలో నటించిన అమ్మాయికే ఇలా కావడం చాలా బాధాకరమని సుబ్బు ఆవేదన వ్యక్తం చేశారు.