రేవంత్ రెడ్డిపై క్రిమినల్ కేసులు
ఆర్డీవో సంచలన నివేదిక
హైద్రాబాద్, మార్చి 3
టీపీసీసీ వర్కింగ్ ప్రెసిడెంట్ రేవంత్‌రెడ్డి, ఆయన సోదరుడు కొండల్‌రెడ్డి భూ ఆక్రమణల ఆరోపణలపై రెవెన్యూ అధికారుల విచారణ పూర్తయింది. హైదరాబాద్ శివారు గోపన్‌పల్లిలోని సర్వే నెంబర్‌ 127లో రేవంత్‌రెడ్డి, సోదరుడు కొండల్‌ రెడ్డి కలిసి అక్రమంగా మ్యుటేషన్‌లు, కబ్జాలకు పాల్పడ్డారని ఆరోపణలు వస్తున్న సంగతి తెలిసిందే. ఈ నేపథ్యంలో వారిపై వస్తున్న ఆరోపణలు నిజమేనని రెవెన్యూ అధికారులు గుర్తించారు. రేవంత్‌రెడ్డి ఆధీనంలో ఉన్న10.20 ఎకరాల భూమి ఆక్రమించినదే అని తేల్చారు. దీనితో పాటు సర్వే నెంబర్‌ 127లోనే మరో 5.5 ఎకరాలకు టైటిల్‌ లేనట్టు కనుగొన్నారు.రేవంత్ రెడ్డి, ఆయన సోదరుడిపై వస్తున్న భూ ఆక్రమణల గురించి ఆరోపణలపై విచారణ అనంతరం.. రాజేంద్రనగర్‌ ఆర్డీవో చంద్రకళ పూర్తి నివేదికను రంగారెడ్డి జిల్లా కలెక్టర్‌కు మంగళవారం అందజేశారు. ఈ నివేదికలో ఆర్డీవో చంద్రకళ పలు కీలక అంశాలను ప్రస్తావించారు. ఎకరం 36 గుంటల భూమిని అక్రమంగా మ్యుటేషన్‌ చేయించుకునట్లు ఆ నివేదికలో పేర్కొన్నారు. సుప్రీంకోర్టు మార్గదర్శకాలను, ఓల్టా చట్టన్ని ఉల్లంఘించినందుకు రేవంత్‌పై క్రిమినల్‌ కేసులు నమోదు చేయాలని ఆర్డీవో నివేదికలో సూచించారు. భూముల చుట్టూ నింబంధనలు ఉల్లంఘించి అక్రమంగా నిర్మించిన గోడలను కూడా కూల్చివేయాలని ఆదేశించారు.గోపన్ పల్లి గ్రామంలోని సర్వే నెంబర్‌ 127లో ఉన్న భూమిలో కొంత భాగాన్ని రేవంత్‌రెడ్డి ఆక్రమించారని స్థానికులు ఎప్పటినుంచో ఆరోపిస్తున్నారు. ఈ భూమిని ఓ వ్యక్తి నుంచి కొన్నట్టుగా నకిలీ పత్రాలు సృష్టించారని కొందరు, తమ పేరిట మ్యుటేషన్‌ చేసినందుకు డబ్బులిస్తామని చెప్పి రేవంత్ ఇవ్వలేదని కొందరు ఆరోపించారు. స్థానికులు కొందరు ఈ వ్యవహారంలో హైకోర్టును కూడా ఆశ్రయించారు. తర్వాత ఈ విషయంపై విచారణ జరిపిన రంగారెడ్డి జిల్లా కలెక్టర్‌, తప్పుడు పత్రాలు సృష్టించి, ఈ భూమి మ్యుటేషన్‌ జరిగిందని నిర్ధారించి సీఎస్‌కు నివేదిక ఇచ్చారు. తప్పుగా రికార్డుల్లో నమోదు చేశారని, తప్పుడు మ్యుటేషన్లు చేశారని ఆ నివేదికలో కలెక్టర్‌ పేర్కొన్నారు.ఈ నేపథ్యంలో గోపన్ పల్లి భూ వ్యవహారంలో రేవంత్ రెడ్డి ఎదుర్కొంటున్న ఆరోపణలపై మళ్లీ ప్రత్యేక అధికారితో విచారణ జరిపించాలని ప్రభుత్వం కొద్ది రోజుల క్రితం నిర్ణయించింది.ఇందులో భాగంగానే ఆర్డీవో చంద్రకళ మంగళవారం తన విచారణ నివేదికను కలెక్టర్‌కు అందజేశారు.