బిగ్ బాస్ విజేత పై దాడి
హైద్రాబాద్, మార్చి 5, 
సింగర్, బిగ్‌బాస్-3 విజేత రాహుల్ సిప్లిగంజ్‌పై దాడి కలకలంరేపింది. బుధవారం రాత్రి హైదరాబాద్‌లోని ఓ పబ్‌లో ఆయన తలపై బీరు సీసాలతో కొట్టారు.  రాహుల్‌ సిప్లిగంజ్‌ తన స్నేహితులు, ఓ స్నేహితురాలితో కలిసి గచ్చిబౌలిలోని ఓ పబ్‌కు వెళ్లారు. కొంతమంది యువకులు రాహుల్‌ వెంట వచ్చిన యువతి పట్ల అసభ్యంగా ప్రవర్తించినట్లు తెలుస్తోంది.. రాహుల్‌ వారిని నిలదీయడంతో వాగ్వాదం జరిగిందని సమాచారం. అయితే మరో వెర్షన్‌ ప్రకారం.. రాహుల్ యువతిపట్ల అనుచితంగా ప్రవర్తించారని అందుకే గొడవ జరిగిందని చెబుతున్నారు.రాహుల్‌తో పాటూ అతని వెంట వెళ్లిన స్నేహితులు.. మరికొంతమంది  యువకులు రెండు గ్రూపులుగా విడిపోయి ఒకరిపై మరొకరు దాడులు చేసుకున్నారు. ఈ క్రమంలోనే రాహుల్‌పై బీరు సీసాలతో దాడి చేశారు. ఘటనలో  రాహుల్ సిప్లిగంజ్ తలకు తీవ్ర గాయమైంది. ఆయన్ను హుటా హుటిన గచ్చిబౌలిలోని ప్రైవేట్ ఆస్పత్రికి తరలించారు. కేసు నమోదు చేసిన పోలీసులు.. దర్యాప్తు ప్రారంభించారు. దాడికి పాల్పడిన వారిలో వికారాబాద్‌ జిల్లాకు చెందిన ఓ ఎమ్మెల్యే సోదరుడు ఉన్నట్లు సమాచారం. ఘటనకు సంబంధించి పూర్తి వివరాలు తెలియాల్సి ఉంది.