కోడలికి కన్వత్వ పరీక్షలు...
భోపాల్, మార్చి 9,
ఎన్నో ఆశలతో అత్తింట్లో అడుగుపెట్టిన ఆ కోడలికి షాకిచ్చింది అత్తగారు. భర్తతో హనీమూన్‌‌కి వెళ్లేందుకు అన్ని ఏర్పాట్లు చేసుకున్న తరుణంలో ఆమెకు కన్యో కాదో తెలుసుకోవడానికి పరీక్ష పెట్టింది. తనను అంతలా అవమానించినా సర్దుకుపోయి భర్తతో కాపురం చేస్తుంటే మరోసారి నరకం చూపించారు. దీంతో విసిగిపోయిన బాధితురాలు చివరికి పోలీసులను ఆశ్రయించింది.మధ్యప్రదేశ్‌లోని ఇండోర్‌కు చెందిన మహిళకు మహిళ(30)కు 2017, మే 4న ఓ వ్యక్తితో వివాహమైంది. అత్తింట్లో అడుగుపెట్టి రెండ్రోజులు సంతోషంగా గడిపిన ఆమె భర్తతో హనీమూన్ వెళ్లేందుకు సిద్ధమైంది. అదే సమయంలో అత్తగారు ఆమెను బాత్రూమ్‌కి పిలిచి బట్టలు విప్పమని చెప్పింది. దీంతో షాకైన ఆమె ఎందుకుని నిలదీయగా.. ‘నువ్వు కన్యవో? కాదో? తెలుసుకోవాలి’ అని చెప్పడంతో షాకైంది.ఈ విషయాన్ని ఆమె భర్తకు చెప్పగా.. ‘పెద్దవాళ్లు అన్నీ మన మంచికే చేస్తారు. మా అమ్మ మాటకు ఎదురుచెప్పకుండా నువ్వు కన్యవేనని నిరూపించుకో’ అని చెప్పడంతో షాకైంది. ఇష్టం లేకపోయినా సరే అత్తగారి ముందు నగ్నంగా నిలబడి కన్యత్వ పరీక్షలో నెగ్గి భర్తతో హనీమూన్‌కు వెళ్లింది. నాలుగు నెలల సాఫీగానే సాగిన వారి సంసారంతో మళ్లీ అలజడి మొదలైంది. ఆమెపై కన్నేసిన బావ(భర్తకు అన్న) తరుచూ అసభ్యంగా తాకుతూ లైంగిక వేధింపులకు పాల్పడేవాడు. ఈ విషయాన్ని బాధితురాలు అత్తగారికి చెప్పగా పట్టించుకోలేదు.ఈ క్రమంలోనే 2017, అక్టోబర్ 27వ తేదీన గది శుభ్రం చేసే నెపంతో అత్తగారు ఆమె పెద్ద కొడుకు గదిలోకి పంపించింది. అదే అదనుగా భావించిన ఆ కామాంధుడు తలుపులు మూసేసి ఆమెపై అత్యాచారానికి పాల్పడ్డాడు. దీంతో బాధితురాలు తనకు జరిగిన అఘాయిత్యంపై అత్తగారికి ఫిర్యాదు చేయగా ఆమె చెప్పిన మాటలు మరింత బాధించాయి. ‘నా ఇద్దరు కొడుకులను సుఖపెట్టే అదృష్టం నీకొచ్చినందుకు సంతోషించు. ఇలాంటి చిన్న విషయాలను పెద్దవి చేసి సంసారాన్ని నాశనం చేసుకోకు’ అంటే హెచ్చరించింది.దీంతో విసిగిపోయిన బాధితురాలు  అక్టోబర్ 28వ తేదీన పుట్టింటికి వెళ్లిపోయింది. ఈ విషయాన్ని తల్లిదండ్రులకు చెప్పకుండా తనలో తానే కుమిలిపోయేది. కూతురు అత్తారింటికి తిరిగి వెళ్లడానికి నిరాకరిస్తుండటంతో అనుమానం వచ్చిన వారు ఏం జరిగిందని ప్రశ్నించగా అసలు నిజం చెప్పింది. దీనికి తోడు అత్తారింట్లో అదనపు కట్నం కోసం తనను వేధిస్తున్నారని తెలిపింది. తమ కూతురికి జరిగిన అన్యాయంపై రగిలిపోయిన తల్లిదండ్రులు వెంటనే ఆమెను వెంటబెట్టుకుని పోలీస్‌స్టేషన్‌కు వెళ్లి ఫిర్యాదు చేశారు. బాధితురాలి వాంగ్మూలాన్ని నమోదు చేసుకున్న ఆమె భర్త, బావ, అత్తపై వివిధ సెక్షన్ల కింద కేసులు నమోదు చేసి దర్యాప్తు చేపట్టారు.