రెండు కుటుంబాల మధ్య చిచ్చు పెట్టిన ప్రేమ
నల్గొండ, మార్చి 9 
ఒక ప్రేమ.. రెండు కుటుంబాల మధ్య చిచ్చు పెట్టింది. కుల రక్కసి కాటు వేయడంతో కూతురు ప్రేమను అంగీకరించలేని ఆ తండ్రి పరువుకోసం అత్యంత కిరాతకంగా అల్లుడ్ని నిండుగర్భిణి అయిన కూతురు ముందే నరికిచంపించాడు. చట్టంలో ఉన్న లొసుగుల్ని అతడు సరిగా ఉపయోగించుకోలేదో ఏమో కాని.. కటకటాల పాలయ్యాడు. కోట్ల ఆస్థికి వారసురాలైన ఆమె చిన్న తనంలోనే భర్తను పోగొట్టుకుని అత్తింటికే పరిమితం అయ్యింది. కడుపులో ఉన్న బిడ్డ బయటకు వచ్చేసరికి.. కనీసం తండ్రి ఎలా ఉంటాడో కూడా ఆ పసికందుకి తెలియదు.నూరేళ్లు జీవితం ఏడాదిలో ముగిసిందామెకు.. కళ్ల ముందే భర్తను పోగొట్టుకుంది. అల్లారు ముద్దుగా పెంచిన తండ్రి కటకటాల పాలయ్యాడు. తల్లి ప్రేమకు దూరమైంది. వీటన్నింటికీ ఒకటే కారణం అదే ప్రేమ.. ఆ ప్రేమ కారణంగా కూతుర్ని వదులుకోలేక ఆ తండ్రి తపన పడ్డాడు. మరోవైపు ప్రేమించి పెళ్లి చేసుకున్న భర్తను వదులుకోలేక ఆ కూతురు తండ్రి ప్రేమకే దూరమైంది. మారుతీరావు-అమృత ఇష్యూలో ఈ తండ్రీకూతుళ్లే కాదు.. కొడుకును పోగొట్టుకుని మనోవేదన అనుభవించిన పేరెంట్స్.. అన్న చావుతో గుండె రగిలిన తమ్ముడు.. తండ్రిలేక తల్లడిల్లిన పసి హృదయం.. ఒక వైపు కూతురు మరోవైపు భర్త ఎటూతేల్చుకోలేక ‘తల్లి’డిల్లిన కన్నపేగు.. ఆవేశంగా ఊగిపోయిన కుల సంఘాలు.ఎవరు ఎలా ఉన్నా.. మారుతీరావు-అమృత ధీనగాధలో నష్టపోయింది ఆ తండ్రికూతుళ్లే. చివరికి పగ, ప్రతీకారం కోరుకున్న ఆ తండ్రి కూతురుపై ఉన్న అమితమైన ఇష్టంతో చివరికి ప్రాణాలు తీసుకున్నారు. కన్న తండ్రి చివరిచూపుకు కూడానోచుకోలేకపోయింది అమృత. లోకం దృష్టిలో మరోసారి దోషిగా నిలబడింది. అప్పుడు భర్త చావుకు.. ఇప్పుడు తండ్రి చావుకు ఈ కూతురే కారణం అంటూ గుచ్చి గుచ్చి చంపేటందుకు సోషల్ మీడియాలో పచ్చి బూతులతో రెచ్చిపోతున్నారు. అమృతకు బతికి ఉండగానే నీచమైన పోస్ట్‌లతో పాడెకట్టేస్తున్నారు.ప్పుడు సోషల్ మీడియాలో ఎక్కడ చూసిన పెద్ద విలన్ ఎవరైనా ఉన్నారంటే అది అమృతే. ఈ ఇష్యూలో ఎవరి వాదన ఎలా ఉన్నా.. అమృతను ‘కరోనా’వైరస్ కంటే ప్రమాదకరంగా భావిస్తూ రకరకాల పోస్ట్‌లు పెడుతున్నారు.