కుమార్తె రాకపోవడంతోనే ఆత్మహత్య
హైద్రాబాద్, మార్చి 9
కుమార్తె తన దగ్గరకు రావట్లేదనే బాధతోనే అమృత తండ్రి మారుతీరావు ఆత్మహత్య చేసుకున్నారని సీనియర్ లాయర్ వెంకట సుబ్బారెడ్డి చెప్పారు. కూతురు గురించే ఎక్కువగా తనతో మాట్లాడుతూ ఉండేవాడని గుర్తు చేసుకున్నారు. పిరికితనంతో ఆత్మహత్య చేసుకొనే తత్వం మారుతీరావుకు లేదని అభిప్రాయపడ్డారు. గత ఏడేళ్ల నుంచి మారుతీరావుతో తనకు పరిచయం ఉందని వెంకట సుబ్బారెడ్డి గుర్తు చేసుకున్నారు. కూతుర్ని రప్పించుకొనేందుకు మధ్యవర్తుల్ని పంపితే కొత్త కేసులు పెట్టిందని మారుతీరావు ఆవేదన చెందేవారని చెప్పారు. ఈ కేసు విషయంలో తనను కలిసేందుకే మారుతీరావు తరచూ హైదరాబాద్ వచ్చేవారని చెప్పారు. ఓ మీడియా సంస్థతో సోమవారం వెంకట సుబ్బారెడ్డి మాట్లాడారు.‘‘ప్రణయ్ హత్య కేసు గురించి నాతో మారుతీరావు ఎప్పుడూ చర్చిస్తూ ఉండేవాడు. ప్రణయ్ తల్లిదండ్రులు ఎస్సీలు కాదని, కన్వర్టెడ్ క్రిస్టియన్స్ అని కొద్ది రోజుల క్రితం ఫోటోలు తీసుకొచ్చి నాకు ఇచ్చారు. శనివారం రాత్రి నేనే ఆయనకు ఫోన్ చేశాను. ఈ ఫోటోలకు బదులు క్రిస్టియన్‌గా కన్వర్ట్ అయిన దానికి సంబంధించి ఏమైనా పత్రాలు ఉంటే ఇవ్వాలని సూచించాను. మారుతీరావుపై ఎస్సీ, ఎస్టీ చట్టంపై కేసు పెట్టారు కాబట్టి.. ప్రణయ్ కుటుంబం ఎస్సీ కాదని నిరూపించేందుకు ఈ ఆధారాలను ఆయన సేకరిస్తున్నారు.’’మధ్యవర్తిత్వం ద్వారా తన కుమార్తె సమస్యను పరిష్కరించుకోవాలని మారుతీరావు ప్రయత్నించాడు. అయితే, తనను వేధిస్తున్నారని అమృత.. తండ్రికి వ్యతిరేకంగా కేసులు పెట్టింది. కానీ, కుమార్తె తన వద్దకు వస్తుందని మాత్రం మారుతీరావు బలంగా నమ్మేవాడు. నాకు మారుతీ రావు ఏడేళ్ల నుంచి తెలుసు. నాలుగేళ్ల క్రితం ఒకరోజు మారుతీరావు నా ఆఫీసులో కూర్చొంటే, అతనికి అమృత ఫోన్ చేసి మెక్‌డోనాల్డ్స్‌లో చికెన్ ఐటెమ్స్ తీసుకురావాలని కోరింది. కానీ, మారుతీ రావు కుటుంబం మాంసాహారం ముట్టరు. కేవలం కూతురు కోసమే మాంసాహార వంటకాలు ప్రత్యేకంగా తీసుకెళ్లేవారు. అమృతపై మారుతీరావుకు అంత ప్రేమ ఉండేది.’’ అని లాయర్ గుర్తు చేశారు.‘‘కేసు విచారణ చివరి దశకు వచ్చేసరికి తన కుమార్తె తన వద్దకు వచ్చేస్తుందని మారుతీరావు బలంగా నమ్మేవాడు. కానీ, ఆమె వచ్చే పరిస్థితి కనిపించలేదు. అంతేకాక, కోర్టులో సాక్ష్యం కూడా వ్యతిరేకంగానే చెప్తుందని భయపడి ఉంటాడు. బహుశా ఆశలు సన్నగిల్లడంతోనే మారుతీరావు ఆత్మహత్య చేసుకొని ఉంటాడు. ఆస్తులకు సంబంధించి తనకు ఆస్తుల తగాదాలు ఏం లేవు. తమ్ముడు శ్రవణ్ పైన కూడా ప్రేమ ఉండేది.’’ అని సీనియర్ లాయర్ వెంకట సుబ్బారెడ్డి చెప్పారు.