ఏపీలో మహిళలకు శానిటరీ న్యాపికిన్స్ మిషన్స్
విజయవాడ, మార్చి 10 
ఏపీలో మహిళల రక్షణకు పెద్ద పీట వేస్తున్న ఆంధ్రప్రదేశ్ ముఖ్యమంత్రి జగన్ మోహన్ రెడ్డి.. మహిళల కోసం మరో కొత్త పథకాన్ని ప్రవేశ పెట్టేందుకు సిద్ధమవుతున్నారు. రాష్ట్రవ్యాప్తంగా ఉన్న ప్రభుత్వ పాధమిక ఉన్నత పాఠశాలల్లో శానిటరీ నాపకీన్స్ వెండింగ్ మిషన్లు అందుబాటులోకి తీసుకురావాలని భావిస్తున్నారు. అయితే ఈ పథకాన్ని ప్రవేశ పెట్టే ముందు పైలట్ ప్రాజెక్ట్‌గా కొన్ని ప్రభుత్వ పాఠశాల్లో దీన్ని ఏర్పాటు చేయాలని భావిస్తున్నారు.ఆ తర్వాత దశల వారీగా రాష్ట్ర వ్యాప్తంగా అన్ని స్కూళ్లలోనే శానిటరీ నాపకీన్స్ వెండింగ్ మిషన్లు అందుబాటులోకి తీసుకురావాలని అనుకుంటున్నారు.నెలసరి సమస్యల విషయంలో స్కూల్ విద్యార్థులు తీవ్ర ఇబ్బందులు పడుతుంటారు. ఆ సమస్యతో చాలామంది అమ్మాయిలు స్కూళ్లకు వెళ్లలేక ఇంటికి పరిమితం అవుతారు. ప్రధానంగా ప్రభుత్వ స్కూళ్లలో చదువుతున్న విద్యార్థులకు ఈ సమస్య మరింత ఎక్కువగా ఉంటుంది. దీంతో అలాంటి విద్యార్థుల కోసం స్కూళ్లలో శానిటరీ నాపకీన్స్ వెండింగ్ మిషన్లు ఏర్పాటు చేసేందుకు ప్రభుత్వం సిద్ధమవుతోంది.హిందూస్తాన్ లివర్ కంపెనీ సహకారంతో జగన్ సర్కార్ ఈ వెండింగ్ మిషన్లను ఏర్పాటు చేయనున్నట్లు సమాచారం. ఇప్పటికే కేంద్రం చేపట్టిన ఈ పథకాన్ని రాష్ట్రవ్యాప్తంగా అమలు చేయాలని భావిస్తోంది. వెండింగ్ మిషన్లలో రూపాయి వేస్తే.. శానిటరీ నాప్‌కిన్ వచ్చేలా ఏర్పాటు చేయనున్నారు. ఇదిలా ఉంటే కేంద్రం ఏర్పాటు చేసిన జన ఔషధి దుకాణాల్లో ఈ నాప్‌కిన్స్ ధర 4 రూపాయలు కాగా.. ఏపీ సర్కార్ దీనికి ఒక్క రూపాయికే స్కూల్ విద్యార్థినులకు అందజేయాలని నిర్ణయించింది. త్వరలోనే ప్రారంభం కానున్న విద్యాసంవత్సరం నుంచి ఏపీలోని పలు ప్రభుత్వ పాఠశాలల్లో ఈ వెండింగ్ మిషన్లను ఏర్పాటు చేయాలని భావిస్తున్నారు. ఈ విషయమై మంత్రి ఆదిమూలపు సురేష్ ఇప్పటికే కేంద్రంతో చర్చలు జరిపినట్లు కూడా తెలుస్తోంది.మహిళ రక్షణ కోసం ఇప్పటికే ఏపీ వ్యాప్తంగా దిశ పోలీస్ స్టేషన్లను ఏర్పాటు చేసింది ప్రభుత్వం. ఆపద సమయాల్లో మహిళలకు అండగా నిలిచేలా దిశ యాప్‌ను కూడా అందుబాటులోకి తీసుకొచ్చింది. త్వరలో దిశ చట్టాన్ని కూడా అమలు పరచనుంది. పిల్లల చదువుల కోసం అమ్మ ఒడి పథకాన్ని కూడా జగన్ తీసుకొచ్చారు. ఈ పథకం కింద ప్రతీ తల్లికి ఏడాదికి రూ. 15వేలు అందిస్తున్నారు. జగన్.. మహిళల కోసం చేపడుతున్న వరుస సంక్షేమ పథకాలతో ఏపీ ప్రజలంతా హర్షం వ్యక్తం చేస్తున్నారు.