ఏపీలో ఎన్నికలు..
తెలంగాణలో భారీగా పెరిగిన మద్యం అమ్మకాలు
హైద్రాబాద్, మార్చి 11
ఆంధ్రప్రదేశ్‌‌‌‌లో త్వరలో స్థానిక సంస్థల ఎన్నికలు జరగనున్నందున కొద్ది రోజులపాటు మద్యం షాపులను మూసి ఉంచనున్నట్లు ప్రచారం జరుగుతున్న సంగతి తెలిసిందే. ఈ నేపథ్యంలో తెలంగాణ సరిహద్దులో వైన్ షాపులు కళకళలాడుతున్నాయి. ఈ ప్రాంతంలోని మద్యం వ్యాపారులు ఫుల్ ఖుషీగా ఉన్నారు. స్థానిక సంస్థల ఎన్నికలు ముగిసే వరకూ ‌‌‌మొత్తం 18 రోజుల పాటు ఏపీలో లిక్కర్ అమ్మకాలు ఆపేస్తామనే ప్రచారం నేపథ్యంలో ఈ పరిస్థితి నెలకొంది. ఎన్నికల ముందు మద్యం, డబ్బు పంపిణీలు అత్యధికంగా ఉంటాయి కాబట్టి.. వీటిని కట్టడి చేసేందుకు వైన్ దుకాణాలు మూసి ఉంచుతారని ప్రచారం జరుగుతోంది. అమ్మకాలు ఎక్కువగా ఉంటాయనే ఉద్దేశంతో‌ ఏపీ సరిహద్దులో ఉన్న మద్యం దుకాణాలకు ఇక్కడి వ్యాపారులు సరకును మరింతగా సరఫరా చేస్తున్నట్లు తెలుస్తోంది. దీంతో మన రాష్ట్రంలో అమ్మకాలు పెరిగి, ఎక్సైజ్‌‌‌‌ ఆదాయం పెరిగే అవకాశం ఉందని అధికారులు అంటున్నారు. అందుకే సరిహద్దు జిల్లాలకు కావాల్సినంత లిక్కర్‌‌‌‌ సరఫరా చేసేందుకు సిద్ధం అవుతున్నారు.పొరుగు రాష్ట్రం ఆంధ్రప్రదేశ్‌లో పంచాయతీ, జిల్లా పరిషత్, మున్సిపల్ ఎన్నికలకు షెడ్యూలు విడుదలైంది. ఎన్నికల ప్రక్రియ పూర్తయ్యే వరకు మద్యం అమ్మకాలపై అక్కడి సర్కారు నిషేధం విధించనుందని బాగా వార్తలు వస్తున్నాయి. ఇందులో భాగంగా ఈ నెల 12 నుంచి 29 వరకు లిక్కర్ అమ్మకాలను నిలిపివేయనున్నట్టు ప్రచారం జరుగుతోంది. ఎన్నికలు ప్రశాంతంగా నిర్వహించేందుకు ఈ నిర్ణయం తీసుకున్నట్టు తెలిసింది. ఖమ్మం, నల్గొండ, మహబూబ్ నగర్ ఉమ్మడి జిల్లాలోని వైన్ షాపులకు ప్రతి నెలా కేటాయించే కోటాకు రెండింతలు ఎక్కువగా లిక్కర్ సరఫరా అవుతున్నట్లు తెలిసింది.ఏపీ సరిహద్దుకు సమీపంలో ఉన్న తెలంగాణ జిల్లాల్లో దాదాపు 538 లిక్కర్ షాపులకు ఈ నెల రెట్టింపు మద్యాన్ని ఎక్సైజ్ అధికారులు సప్లై చేయనున్నట్టు తెలిసింది. కొత్త జిల్లాల పరంగా ఎనిమిది జిల్లాలు ఏపీకి సరిహద్దుగా ఉన్నాయి. ప్రతి నెల ఈ జిల్లాల నుంచి దాదాపు రూ.500 కోట్ల విలువైన మద్యం అమ్మకాలు నమోదవుతుంటాయి. ఏపీలో జరిగే స్థానిక సంస్థల ఎన్నికల దృష్ట్యా ఆదాయం ఈ సమయంలో రూ.వెయ్యి కోట్లు దాటొచ్చని అంచనా వేస్తున్నారు. ఏపీలో ఎన్నికల పక్రియ పూర్తయ్యే వరకు లిక్కర్ పంపిణీలో ఇబ్బంది లేకుండా స్పెషల్ టీమ్‌‌‌‌లు ఏర్పాటు చేసినట్టు తెలిసింది.తెలంగాణతో పోలిస్తే ఏపీలో మందు ధరలు ఎక్కువ. అక్కడా, ఇక్కడా ఫుల్ బాటిల్‌‌‌‌కు కనీసం రూ.100 తేడా ఉంటుంది. 180 ఎంఎల్‌‌‌‌కు రూ.15 నుంచి రూ.30 వరకు గ్యాప్‌‌‌‌ ఉంది. దీంతో ఇప్పటికే ఎక్కువ మంది సరిహద్దు దాటి వచ్చి మద్యం కొనుగోలు చేస్తున్నట్లు తెలుస్తోంది. ఒకేసారి కొనుగోలు చేసి ఇళ్లలో స్టాక్ పెట్టుకుంటున్నారు. మద్యం కోసం షాపులు తెరవగానే ఉదయాన్నే జనం క్యూలు కట్టారు. ఇప్పుడు సరిహద్దు ప్రాంతంలోని జిల్లాల్లో ఎక్కడ చూసినా మద్యం షాపుల దగ్గర బారులు తీరిన జనమే కనిపిస్తుండడం విశేషం.