. ఆలయాలపై కరోనా ప్రభావం
తిరుమల, మార్చి 13

కరోనా వైరస్ ప్రభావం కలియుగ ప్రత్యక్ష దైవం తిరుమల వేంకటేశ్వరుడిపైనా పడింది. కోవిడ్-19 కేసుల సంఖ్య పెరిగిపోతుండటంతో.. ప్రజలు ప్రయాణాలు చేయడానికి జంకుతున్నారు. కరోనా భయాందోళల కారణం ప్రజలు తిరుమలేశుడి దర్శనాన్ని సైతం వాయిదా వేసుకుంటున్నారు. దీంతో దర్శనం టికెట్లను రద్దు చేసుకునే అవకాశం కల్పించాలని కోరుతున్నారు. దీంతో రూ.300 ప్రత్యేక దర్శనం, ఆర్జిత సేవ, వసతి బుకింగ్‌లను రద్దు చేసుకునే అవకాశాన్ని టీటీడీ కల్పించింది. డబ్బును భక్తులకు తిరిగి ఇస్తామని టీటీడీ అధికారులు ప్రకటించారు. దర్శనాన్ని రద్దు చేసుకోవడంతోపాటు మే వరకు వాయిదా వేసుకునే సౌలభ్యాన్ని కూడా టీటీడీ కల్పిస్తోంది.టికెట్లను క్యాన్సిల్ చేసే విషయంలో అనుమానాలు   ఉన్నవారు dyeotemple@gmail.com కు మెయిల్ చేయాలని సూచించింది. శుక్రవారం నుంచి ఈ నిర్ణయం అమల్లోకి వస్తుందని పేర్కొంది. రద్దీ ఎక్కువగా ఉన్నప్పుడు రూ.300 టికెట్లను క్యాన్సిల్ చేసిన దాఖలు ఉన్నాయి. కానీ ఇన్ఫెక్షన్లకు భయపడి దర్శనం టికెట్లను క్యాన్సిల్ చేసుకునే అవకాశం కల్పించడం టీటీడీ చరిత్రలో ఇదే తొలిసారి కావడం గమనార్హం.కరోనా నేపథ్యంలో భారత్ వెలుపలి నుంచి వస్తున్న వారు మరో 28 రోజుల వరకు తిరుమలేశుడి దర్శనానికి రావొద్దని టీటీడీ సూచించింది. ఇప్పటికే కరోనా వైరస్ పట్ల యాత్రికులకు టీటీడీ అవగాహన కల్పిస్తోంది. అలిపిరి, శ్రీవారి మెట్టు, అలిపిరి టోల్ గేట్ వద్ద శుక్రవారం నుంచి కౌన్సెలింగ్ కేంద్రాలను ప్రారంభిస్తున్నట్లు టీటీడీ అడిషనల్ ఈవో ఏవీ ధర్మారెడ్డి తెలిపారు.దగ్గు, జలుబు, జ్వరం లాంటి లక్షణాలతో బాధపడుతున్న వారు తిరుమల రావొద్దని శ్రీవారి భక్తులకు ధర్మారెడ్డి సూచించారు. కరోనా లక్షణాలున్న వారిని అలిపిరి, శ్రీవారి మెట్టు వద్ద థర్మో స్క్రీనర్ల ద్వారా స్క్రీనింగ్ చేస్తామని.. అవసరమైతే వైద్య సాయం అందిస్తామన్నారు. గోకులం కాన్ఫరెన్స్ హాల్‌లో గురువారం నిర్వహించిన తిరుమల విభాగాధిపతులు అత్యున్నత స్థాయి సమావేశంలో ఈ మేరకు నిర్ణయం తీసుకున్నారు.కరోనాను అడ్డుకోవడం కోసం టీటీడీ సిబ్బందికి మాస్కుల వాడకం, శానిటైజర్ల గురించి అవగాహన కల్పించాలని ధర్మారెడ్డి హెచ్‌వోడీలకు సూచించారు. కరోనా అవగాహన, తీసుకోవాల్సిన జాగ్రత్తల గురించి ఎస్వీబీసీలో ప్రచారం చేయాలని సూచించారు.