ప్రభుత్వ కార్యక్రమాలకు 100 తక్కువకే సిమెంట్
విజయవాడ, మార్చి 16
ముఖ్యమంత్రి వైఎస్‌ జగన్మోహన్‌రెడ్డి విజ్ఞప్తి మేరకు సిమెంటు ధరలు తగ్గించాలని ఆయా కంపెనీలు నిర్ణయించాయి. సోమవారం తాడేపల్లి క్యాంపు కార్యాలయంలో ముఖ్యమంత్రి వైఎస్‌ జగన్‌ సిమెంట్‌ కంపెనీల యజమానులు, ప్రతినిధులతో సమావేశమయ్యారు. అనంతరం పేదలకు ఇళ్ల నిర్మాణం సహా ప్రభుత్వం చేపట్టే పనులు, పోలవరం ప్రాజెక్టు పనులకు ధరలు తగ్గిస్తున్నట్లు సిమెంటు కంపెనీలు ప్రకటించాయి. పొజొలానా పోర్టబుల్‌ సిమెంట్‌ (పీపీసీ) బస్తా ధర రూ.225, ఆర్డినరీ పోర్ట్‌ సిమెంట్‌ ధర రూ.235గా నిర్ణయించాయి. 2015– 16 నుంచి 2019– 2020 మధ్యకాలంలో ఏ సంవత్సరంతో పోల్చినా ఈ ధరలు తక్కువగా ఉన్నాయి. ప్రస్తుతం మార్కెట్లో సిమెంటు ధరలు రూ. 380 వరకు ఉన్నాయి.రాష్ట్ర ప్రభుత్వంలోని వివిధ శాఖలు చేపడుతున్న పనుల కోసం ఈ ఏడాది అవసరమైన సిమెంటు వివరాలను కంపెనీ ప్రతినిధులకు రాష్ట్ర ప్రభుత్వం తెలియజేసింది. వచ్చే ఆర్థిక సంవత్సరానికి సంబంధించి గృహ నిర్మాణ శాఖకు 40 లక్షల మెట్రిక్‌ టన్నులు, పంచాయతీరాజ్‌ శాఖకు 25 లక్షల మెట్రిక్‌ టన్నులు, జలవనరుల శాఖకు 16.57 లక్షల మెట్రిక్‌ టన్నులు, మున్సిపల్‌శాఖకు 14.93 మెట్రిక్‌ టన్నులు.. సహా ఇతర శాఖలకు కలిపి మొత్తంగా 1,19,43,237 మెట్రిక్‌ టన్నుల సిమెంటు అవసరమవుతుందని అధికారులు వివరించారు. ఇవన్నీ రాష్ట్ర ప్రభుత్వం చేపడుతున్న పనులని, అలాగే పేదలందరికీ ఇళ్ల నిర్మాణం రూపేణా గొప్ప సంకల్పంతో ముందుకెళ్తున్నామని తెలిపారు. సిమెంటు ఉత్పత్తి, పంపిణీలో ఎలాంటి ఇబ్బందులు రాకుండా చూడాలన్నారు.పేదలకు 26.6 లక్షల ఇళ్ల పట్టాలు ఇవ్వనున్నామని, వీరితో పాటు సొంతంగా స్థలాలు, పట్టాలు ఉన్న పేదలకు పెద్ద మొత్తంలో ఇళ్ల నిర్మాణం చేపట్టబోతున్నామని కంపెనీ ప్రతినిధులకు సీఎం జగన్‌ తెలిపారు. అత్యంత ప్రతిష్టాత్మకంగా ఈ కార్యక్రమం చేపడుతున్నామన్నారు. తక్కువ ధరలతో ఇచ్చే సిమెంటు బ్యాగ్ ప్రత్యేకంగా వేరొక రంగులో ఉండాలన్నారు. అలాగే ప్రభుత్వ విభాగాలు తమ అవసరాలను సంబంధిత జిల్లా కలెక్టర్‌కు నివేదిస్తాయని, కలెక్టర్‌ ద్వారా ఈ సిమెంటు పంపిణీ అవుతుందని సీఎం స్పష్టం చేశారు. నాణ్యత నిర్ధారణ అయ్యాకే చెల్లింపులు జరుగుతాయని సీఎం తెలిపారు.పేదలకు ఇళ్ల నిర్మాణం సహా, వివిధ ప్రభుత్వ పనులు, పోలవరం ప్రాజెక్టులకు సిమెంటు సరఫరాలో ఎలాంటి ఇబ్బందులు రాకుండా చర్యలు తీసుకుంటామని సిమెంటు కంపెనీ ప్రతినిధులు సీఎంకు చెప్పారు. ప్రభుత్వ అవసరాల మేరకు సిమెంటు పంపిణీ జరిగేలా తగు చర్యలు తీసుకుంటామని, సమస్యల పరిష్కారానికి కంపెనీల తరఫు నుంచి ఇద్దరు ముగ్గురితో సమన్వయ కమిటీ ఏర్పాటు చేసుకుంటామని కంపెనీల ప్రతినిధులు తెలిపారు. ఈ సమావేశంలో జువారి సిమెంట్స్, భవ్య, సాగర్, కేసీపీ, రైన్, భారతి, అల్ట్రాటెక్, జేఎస్‌డబ్ల్యూ, శ్రీ చక్ర, ఇండియా, మైహోం, రాంకో, పెన్నా, దాల్మియా, ఆదిత్యా బిర్లా, చెట్టినాడ్, పాణ్యం, పరాశక్తి, ఎన్‌సీఎల్‌ తదితర కంపెనీలకు సంబంధించిన ప్రతినిధులు పాల్గొన్నారు.