చైనాలో సాధారణ పరిస్థితులు
బీజింగ్, మార్చ్ 26
చైనాలో కరోనా వైరస్ తగ్గుముఖం పట్టడంతో రెండు నెలలుగా పలు ప్రావిన్సుల్లో కొనసాగుతున్న లాక్‌డౌన్ ఆంక్షలను తొలగించారు. ముఖ్యంగా కోవిడ-19 తొలిసారి వెలుగుచూసిన వుహాన్‌లో పరిస్థితులు చక్కబడుతున్నాయి. నగరం క్రమంగా కోలుకోవడంతో ఆంక్షలను సడలించారు. దీంతో గత రెండు నెలలుగా ఇక్కడ చిక్కుకున్న ఇతర ప్రాంతాలవారు స్వస్థలాలకు వెళ్లేందుకు పయనమయ్యారు. ప్రయాణికుల రద్దీతో రైల్వే స్టేషన్లు, విమానాశ్రయాలు కిటికిటలాడుతున్నాయి. అయితే, పాఠశాలలు మాత్రం ఇంకా తెరుచుకోలేదు. గత ఐదు రోజులుగా చైనాలో స్థానికులకు ఎవ్వరికీ కరోనా వైరస్ నిర్ధారణ కాలేదు.ఇదిలా ఉండగా.. జియాంగ్ నగరంలో ఆంక్షలు సడలించినా బయట ప్రాంతాలకు వెళ్లడానికి కొత్త ఆటంకాలు ఎదురవుతున్నాయి. తామకు కోవిడ్-19 లేదని నిరూపించుకోవాలని అధికారులు ఆదేశించారు. ఈ మేరకు పరీక్షలు చేయించుకుని, నివేదిక వెంట తెచ్చుకోవాలని సూచించారు. దీంతో వందలాది మంది నగరంలోని జియాంగ్ సెంట్రల్ హాస్పిటల్స్‌కు పరుగులు తీస్తున్నారు. కానీ, అక్కడ సిబ్బంది మాత్రం తాము న్యూక్లియక్ యాసిడ్ టెస్ట్‌లు గత కొద్ది రోజులుగా నిర్వహించలేదని, సమీపంలోని పట్టణాలు, గ్రామాల్లో పరీక్షలు చేయించుకోవాలని సలహా ఇస్తున్నారు.కరోనా వైరస్ నిర్ధారణ పరీక్షల్లో న్యూక్లియక్ యాసిడ్ టెస్ట్ నిర్వహిస్తే ఫలితాలు అతి కొద్ది గంటల్లోనే వస్తాయి. బాధితుడి గొంతు నుంచి ద్రవాన్ని సేకరించి పరీక్షిస్తారు. తమకు పరీక్షలు నిర్వహించకపోతే ఇక్కడ నుంచి వెళ్లలేమని షాంఘై మెట్రో ప్రాజెక్టులో పనిచేస్తున్న షెన్ జన్నింగ్ అనే వ్యక్తి ఆవేదన వ్యక్తం చేశాడు. ఇప్పటికే రైలు టిక్కెట్ రిజర్వేషన్ చేయించుకున్నానని వాపోయాడు. గురువారం తెల్లవారుజామున 4 గంటలకు జియాంగ్ సెంట్రల్ హాస్పిటల్‌కు వెళితే, అక్కడ పరీక్షలు నిర్వహించడంలేదని చెప్పారన్నారు. న్యూక్లియక్ యాసిడ్ టెస్ట్ చేయించుకోవాలంటే సమీపంలోని పట్టణాలు, గ్రామాల్లోని హాస్పిటల్స్‌కు వెళ్లాలని పేర్కొంటూ నోటీసు బోర్డులో అంటించారు.చైనాలోని మొత్తం కరోనా మరణాల్లో 96 శాతం, బాధితుల్లో 80 శాతం హుబే ప్రావిన్సుల్లోనే నమోదయ్యాయి. ఇక, వైరస్‌కు మూలకేంద్రమైన వుహాన్‌లో చైనాలోని మొత్తం కేసుల్లో 54 శాతం ఇక్కడ బయటపడటం గమనార్హం. ఈ నేపథ్యంలో వుహాన్ నగరంలో ఏప్రిల్ 8 వరకు లాక్‌డౌన్ కొనసాగుతుందని అధికారులు ప్రకటించారు.జియాంగ్ నగరానికి చెందిన ఓ వ్యక్తి గతవారం గుయాంగ్డో ప్రావిన్సులకు చేరుకోగా, అక్కడ నిర్వహించిన పరీక్షల్లో అతడికి కరోనా వైరస్ ఉన్నట్టు నిర్ధారణ అయ్యింది. దీంతో జియాంగ్ నగరం నుంచి బయటకు వెళ్లేవారు తప్పనిసరిగా కరోనా వైరస్ పరీక్షలు చేయించుకోవాలని ప్రభుత్వం ఆదేశాలు జారీచేసింది. జియాంగ్‌లో అనేక మంది రాయిటర్స్‌తో మాట్లాడుతూ.. లాక్‌డౌన్ ఎత్తివేయడం కొంత మోదం, కొంత ఖేదం కలిగిస్తోందని వ్యాఖ్యానించారు. విధుల్లో తక్షణమే చేరకపోతే తొలగిస్తామని యాజమాన్యాలు హుకుం జారీచేశాయని, ఇప్పుడు ఏంచేయాలో పాలుపోవడంలేదని వాపోతున్నారు