అమెరికాలో తీవ్రమౌతున్న కరోనా
న్యూయార్క్, మార్చి 27 
ప్రపంచవ్యాప్తంగా కరోనా వైరస్ తీవ్రత కొనసాగుతోంది. ఈ మహమ్మారి బారినపడి వేలాది మంది ఇప్పటికే ప్రాణాలు కోల్పోయారు. దాదాపు 300 కోట్ల మంది ప్రజలు నిర్బంధంలో కొనసాగుతున్నారు. ఐరోపా, అమెరికాలో కరోనా వైరస్ తీవ్రత మరింత అధికంగా ఉంది. ఇటలీ, స్పెయిన్, ఫ్రాన్స్, అమెరికాలో మృతుల సంఖ్య గంట గంటకూ పెరుగుతుండటంతో మరింత ఆందోళన వ్యక్తమవుతోంది. కరోనా వైరస్‌ను కట్టడిచేయడానికి చర్యలు తీసుకుంటున్నా వైరస్ మరణాలు, బాధితుల సంఖ్య మాత్రం తగ్గడంలేదు. ఇప్పటి వరకు కరోనా వైరస్ వల్ల ప్రపంచవ్యాప్తంగా 24,000 మందికి పైగా ప్రాణాలు కోల్పోగా, బాధితుల సంఖ్య 5.32 లక్షలు దాటింది. గత 24 గంటల్లోనే ప్రపంచవ్యాప్తంగా 2,600 మంది మృతిచెందారంటే భయానక పరిస్థితులకు అద్దం పడుతోంది.వైరస్ బారినపడ్డవారిలో దాదాపు 1,23, 942 మంది కోలుకున్నారు. మరో 3.64 లక్షల మందిలో స్వల్పంగా, 19,357 మంది పరిస్థితి మాత్రం ఆందోళనకరంగా ఉంది. అగ్రరాజ్యం అమెరికా సైతం కరోనా దెబ్బకు అల్లాడుతోంది. ఇప్పటి వరకూ చైనాలలోనే అత్యధికంగా 81వేల కేసులు నమోదు కాగా.. ఆ సంఖ్యను అమెరికా అధిగమించింది. ప్రపంచంలోనే అత్యధికంగా 85,435 కోవిడ్-19 కేసులు అమెరికాలో నమోదయ్యాయి. మొత్తం 1,300 మంది ప్రాణాలు కోల్పోయారు. గత రెండు రోజుల్లోనే 30వేల కేసులు అమెరికాలో నమోదయ్యాయి.కరోనా వైరస్ తీవ్రత అధికంగా న్యూయార్క్‌, కాలిఫోర్నియా, వాషింగ్టన్‌, లోవా, లూసియానా, ఉత్తర కరోలినా, టెక్సాస్, ఫ్లోరిడా రాష్ట్రాలు భారీ విపత్తుగా ప్రకటించాయి. దీనికి అమెరికా అధ్యక్షుడు డొనాల్డ్‌ ట్రంప్‌ ఆమోదముద్ర కూడా వేశారు. అమెరికా ఆర్థిక రాజధాని అయిన న్యూయార్క్‌లో పరిస్థితి మరింత ఘోరంగా ఉంది. ఈ 30వేల మందికి పైగా వైరస్ సోకగా.. 285 మంది ప్రాణాలు కోల్పోయారుకరోనా వైరస్ కారణంగా అత్యధిక మరణాలు ఐరోపాలో చోటుచేసుకుంటున్నాయి. ఇటలీ, స్పెయిన్, జర్మనీ, బ్రిటన్, నెదర్లాండ్ సహా ఐరోపా దేశాల్లో మొత్తం 17 వేల మంది మృత్యువాతపడ్డారు. కరోనా దెబ్బకు ఇటలీ, స్పెయిన్‌లు చిగురుటాకులా వణుకుతున్నారు. ఇటలీలో గురువారం మరో 700 మందికిపైగా ప్రాణాలు కోల్పోగా.. మరణాల సంఖ్య 8,215 దాటేసింది. కొత్తగా మరో 6,600 పాజిటివ్‌ కేసులు నమోదు కాగా, మొత్తం కేసుల సంఖ్య 80,580 దాటింది. కోవిడ్ విషయంలో ఇటలీ ప్రభుత్వం తొలుత నిర్లక్ష్యం చేయడంతోనే ఇంతటి విపత్తుకు  దారితీసిందనే విమర్శలువెల్లువెత్తుతున్నాయి.ఇటలీతోపాటు దానికి స్పెయిన్, ఫ్రాన్స్‌లో కరోనా కల్లోలం కొనసాగుతోంది. కరోనా మరణాల్లో స్పెయిన్ సైతం చైనాను అధిగమించి, ప్రపంచంలోనే రెండో స్థానంలో నిలిచింది.  అక్కడ 700 మంది మృతిచెందగా.. మొత్తం మరణాల సంఖ్య 4,365కి చేరింది. కొత్తగా 7,786 మందిలో వైరస్ నిర్ధారణ అయ్యింది. దీంతో స్పెయిన్‌లో కోవిడ్-19 బాధితుల సంఖ్య 57,786వేలకు చేరింది.వైరస్‌కు మూల కేంద్రమైన చైనాలో మరో ఆరుగురు చనిపోగా, 55 కొత్త కేసులు నమోదయ్యాయి. దీంతో ఆ దేశంలో మరణాల సంఖ్య 3,292కు చేరింది. ఇరాన్‌లో 2,234, ఫ్రాన్స్‌లో 1698 మంది, అమెరికాలో 1,295 మంది మృతిచెందారు. దక్షిణ కొరియాలో మాత్రం కరోనా వైరస్ నిలకడగా ఉంది. కరోనా కట్టడికి ఆ దేశం తీసుకున్న చర్యల సత్ఫలితాలను ఇస్తున్నాయి. ఇప్పటి వరకు అక్కడ 134 మంది ప్రాణాలు కోల్పోయారు. కొత్త కేసులు గురువారం 100లోపే నమోదుకావడంతో మొత్తం 9,200 మంది వైరస్ బారినపడ్డారు.