కొరియాను భయపెడుతున్న సూపర్ స్ప్రెడ్ ఆంటీ
న్యూఢిల్లీ, మార్చి 27)
ఇప్పుడు సౌత్ కొరియాలో ఆవిడ గురించే వినిపిస్తోంది... ఇంతకీ ఆవిడ ఎవరనే మీ డౌట్...  ఆవిడే. సూపర్ స్ప్రెడ్ ఆంటీ, కొరియా 31వ కరోనా కేసుగా వార్తల్లోకి ఎక్కింది. ఆవిడ వల్లే  దాదాపు ఐదు వేల మందికి కరోనా సోకింది. అలాంటి ప్రమాదం జరగకుండా ఉండాలంటే సెల్ఫ్ క్వారంటైన్ తప్పని సరి అంటున్నారు... లెట్స్ చెక్ ది డిటైల్స్...కరోనా వైరస్‌ను కట్టడి చేయడం కోసం ప్రపంచ దేశాలు కిందా మీదా పడుతున్నాయి. చైనాలోని వుహాన్‌లో పుట్టిన ఈ వైరస్ ఇప్పుడు ప్రపంచం మొత్తాన్ని వణికిస్తోంది. చైనా పొరుగున ఉన్న దక్షిణ కొరియాలోనూ కోవిడ్ విజృంభించింది. ఇప్పటి వరకూ కొరియాలో 9 వేలకుపైగా కరోనా కేసులు నమోదు కాగా.. 120 మంది ప్రాణాలు కోల్పోయారు. ఫిబ్రవరి చివర్లో కొరియాలో రోజుకు 900 కేసులు నమోదు కాగా.. ప్రస్తుతం రోజుకు వంద లోపే కేసులు నమోదు అవుతున్నాయి. కరోనా పట్ల అప్రమత్తంగా వ్యవహరించిన ఆ దేశం టెక్నాలజీ సాయంతో కోవిడ్ దూకుడుకు కళ్లెం వేసింది. ఏడు నిమిషాల్లోనే కరోనా నిర్ధారణ జరిపే ఫోన్ బూత్‌లను కొరియా డెవలప్ చేసుకుంది. వుహాన్‌లో కరోనా కేసులు తక్కువ సంఖ్యలోనే నమోదైన నాటి నుంచే కొరియా అప్రమత్తమైంది. మాస్కులు, ఇతర వైద్య పరికరాల తయారీలో నిమగ్నమైంది. కానీ ఓ చిన్న తప్పిదం కారణంగా కొరియాలో కోవిడ్ కేసులు అమాంతం పెరిగిపోయాయి. ఒకే ఒక్క మహిళ కారణంగా కొరియా మరో వుహాన్‌లా మారిపోయింది. చైనా పొరుగునే కొరియా ఉండటంతో ఇరు దేశాల మధ్య రాకపోకలు ఎక్కువే. ప్రయాణాలు చేసే వారి ద్వారా ఒక దేశం నుంచి మరో దేశంలోకి ప్రవేశించే కరోనా.. ఆ తర్వాత వారి ద్వారా మరొకరికి సోకుతుందని, తర్వాత ఆ రెండో వ్యక్తిని కలిసిన వాళ్లకు, తిరిగి వాళ్లను కలిసిన వాళ్లకు కరోనా సోకుతుంది. వీటినే క్లస్టర్లు అంటారు. ఇది సామూహిక వ్యాప్తికి దారి తీస్తుంది. ప్రపంచం వ్యాప్తంగా కరోనా ఇంత వేగంగా విస్తరించడానికి కారణం ఈ క్లస్టర్లే. కొరియాలోని డైగూ నగరంలోనూ ఇలాగే కరోనా వ్యాప్తి చెందింది. డైగూ నగరం మరో వుహాన్‌లా మారిపోయింది.కొరియాలో మొదటి కరోనా కేసును జనవరి 20న గుర్తించారు. వుహాన్ నుంచి సియోల్ వచ్చిన 35 ఏళ్ల చైనీస్ మహిళకు కోవిడ్ సోకినట్లు నిర్ధారించారు. వెంటనే అప్రమత్తమైన కొరియా ఆమెను ఐసోలేషన్‌లో ఉంచింది. అప్పటి నుంచి దాదాపు నెల రోజుల వరకు కొరియాలో 30 మాత్రమే కరోనా కేసులు నమోదయ్యాయి. కొరియాలో నమోదైన తొలి ఐదు కోవిడ్ కేసులు.. విదేశాల నుంచి, ముఖ్యంగా వుహాన్ నుంచి దిగుమతి అయినవే. ఆరో కేసు మాత్రం స్థానిక వ్యక్తికి సంబంధించింది. కోవిడ్ వారిన పడ్డ వీళ్లంతా ఎవర్ని కలిశారనే విషయాలను సేకరించడంలో కొరియా సఫలమైంది. ఫలితంగా కోవిడ్ వ్యాప్తి తక్కువగా ఉంది.ఇక కొరియాలో నమోదైన 31వ కరోనా పాజిటివ్ కేసు 60 ఏళ్ల మహిళ. ఆమె కారణంగా కొరియాలో కేసుల సంఖ్య అమాంతం పెరిగిపోయింది. పేషెంట్ 31గా పిలుచుకునే ఆమెకు కరోనా ఎలా సోకిందనేది కచ్చితంగా తెలీదు. కానీ జనసమ్మర్థం ఎక్కువగా ఉండే డైగూ, సియోల్ నగరాల్లో ఆమె తిరిగారు. ఫిబ్రవరి 6న ఆమె డైగూ సిటీలో ఓ చిన్న యాక్సిడెంట్‌కు గురయ్యారు. దీంతో తనంతట తానుగా ఆమె హాస్పిటల్‌లో చేరారు. ఆసుపత్రిలో చూపించుకుంటూనే.. ఫిబ్రవరి 9, 16 తేదీల్లో డైగూలోని షిన్‌చియాన్జీ చర్చ్‌కు ఆమె వెళ్లారు. కానీ ఫిబ్రవరి 15న ఆమెకు జ్వరం రావడంతో.. పరీక్షించిన డాక్టర్లకు అనుమానం వచ్చింది. కరోనా వైరస్ టెస్ట్ చేయించుకోవాలని సూచించారు. కానీ ఆమె వారి మాటలను పట్టించుకోలేదు.డాక్టర్ల సలహాను పెడచెవిన పెట్టి ఆమె ఫ్రెండ్‌తో కలిసి ఓ హోటల్‌లో బఫే లంచ్‌కు వెళ్లింది. కానీ మరోసారి ఆమె ఆరోగ్యం క్షీణించింది. దీంతో కరోనా పరీక్షలు చేయించుకోమని డాక్టర్లు ఆమెకు మరోసారి సూచించారు. ఫిబ్రవరి 17న ఆమె మరో హాస్పిటల్‌కు వెళ్లి కరోనా పరీక్షలు చేయించుకుంది. మరుసటి రోజు ఆమెకు కరోనా సోకిందని డాక్టర్లు నిర్ధారించారు. కొరియాలో నమోదైన 31వ కరోనా కేసు ఇది. కొద్ది రోజుల వ్యవధిలోనే కొరియాలో కరోనా కేసుల సంఖ్య వందల్లోకి చేరిపోయింది. షిన్‌చియాన్జీ చర్చ్‌కు వెళ్లిన వారు, ఆ పరిసర ప్రాంతాల్లోని వందలాది మంది కరోనా బారిన పడ్డారు.షిన్‌చియాన్జీ చర్చ్‌లో నిర్వహించిన కార్యక్రమాల్లో పాల్గొన్న 9300 మంది వివరాలను కొరియా ప్రభుత్వం సేకరించింది. వీరిలో 1200 మందిలో ఫ్లూ లక్షణాలు కనిపించాయి. ఈ చర్చికి సంబంధించే వేలాది మందికి కరోనా సోకినట్లు నిర్ధారించారు. మొత్తం 1160 మందిని పేషెంట్ 31 కలిసినట్లు గుర్తించారు. డైగూ నగరానికి సమీపంలో ఉండే చెంగ్డూలోనూ మరో కరోనా క్లస్టర్ ఏర్పడింది. ఈ క్లస్టర్‌తోనూ పేషెంట్ 31కు సంబంధం ఉందని భావిస్తున్నారు. మార్చి 18 నాటికి కొరియాలో నమోదైన కరోనా కేసుల్లో 60 శాతం షిన్‌చియాన్జీ చర్చ్ క్లస్టర్‌కు సంబంధించినవే కావడం గమనార్హం.షిన్‌చియాన్జీ చర్చ్ క్లస్టర్‌లో 5016 మందికి కరోనా నిర్ధారణ అయ్యింది. వీరిలో 4363 మంది చర్చ్ ఉన్న డైగూ ప్రావిన్స్‌కు చెందిన వారే. ఈ చర్చ్‌కు వచ్చిన వెళ్లిన వారి కారణంగా మిగతా ప్రావిన్స్‌ల్లోనూ చిన్నచిన్న క్లస్టర్లు ఏర్పడ్డాయి. అంటే ఈ చర్చికి వచ్చి వెళ్లిన వారి కారణంగా మిగతా ప్రావిన్సులకూ కరోనా విస్తరించింది. ఫలితంగా కొరియాలోని అన్ని ప్రాంతాలకూ కోవిడ్ విస్తరించింది. వెంటనే అప్రమత్తమైన ఆ దేశం డైగూ, నార్త్ గయాంగ్‌సాంగ్ ప్రావిన్సుల్లోని కొన్ని ప్రాంతాలను ప్రత్యేక విపత్తు ప్రాంతాలుగా గుర్తించింది. చర్చ్ సభ్యులతో కరోనా వ్యాప్తికి సంబంధం ఉందని గుర్తించి తగిన చర్యలు తీసుకున్న తర్వాత కొరియాలో కరోనా కేసుల సంఖ్య తగ్గింది.చర్చ్ సభ్యులతోపాటు వేలాది మందికి కొరియా కరోనా పరీక్షలు నిర్వహించింది. కోవిడ్ లక్షణాలేవీ బయటకు కనిపించనప్పటికీ... ఒకరి నుంచి మరొకరికి వ్యాపించే అవకాశం ఉండటంతో కొరియా పరీక్షలు నిర్వహించింది. ఫోన్లు, శాటిలైట్ టెక్నాలజీ ద్వారా దేశ ప్రజలను ఎప్పటికప్పుడు అప్రమత్తం చేసింది. ఈ ‘పేషెంట్ 31’ లాంటి ఘటన భారత్‌లో చోటు చేసుకుంటే.. కరోనాను కట్టడి చేయడం ఎంతో కష్టం. ఊహకు అందని రీతిలో ప్రాణ నష్టం చోటు చేసుకుంటుంది. కోట్లాది మంది ఈ మమ్మారి బారిన పడే అవకాశం ఉంది. అందుకే లాక్‌డౌన్‌కు ప్రజలు పూర్తిగా సహకరించాలి. విదేశాల నుంచి తిరిగొచ్చిన వారు తప్పనిసరిగా 14 రోజులపాటు క్వారంటైన్లో ఉండాలి. ఇష్టం వచ్చినట్టు తిరుగుతూ ఫంక్షన్లకు, వేడుకలకు హాజరైతే.. జరగబోయే నష్టం ఊహకు అందదు. తోటి వాడి అనుభవాల నుంచి పాఠాలు నేర్చుకుంటేనే.. విపత్తు బారి నుంచి మనల్ని మనం కాపాడుకోగలం లేదంటే మహావిషాదాన్ని కొనితెచ్చుకున్నట్లే.