అగ్రరాజ్యానికి ఏమైంది...
న్యూయార్క్, మార్చి 27
ప్రపంచవ్యాప్తంగా కరోనా వైరస్ కేసుల సంఖ్య  5 లక్షలు దాటింది. కోవిడ్ మహమ్మారి బారిన పడి ఇటలీ విలవిల్లాడుతుండగా.. స్పెయిన్, ఫ్రాన్స్, అమెరికాల్లోనూ కోవిడ్ కేసులు పెరుగుతున్నాయి. చైనా, ఇటలీ తర్వాత కరోనా కేసుల సంఖ్య ఎక్కువగా ఉన్న దేశంగా అమెరికా నిలిచింది. అగ్రరాజ్యంలో కరోనా బాధితుల సంఖ్య వేగంగా పెరుగుతోంది. అమెరికాలో 54 వేల మంది కోవిడ్ బారిన పడగా.. 784 మంది ప్రాణాలు కోల్పోయారు. కరోనా వ్యాప్తి అమెరికాలో ఊహించని స్థాయిలో ఉండటంతో ట్రంప్ సర్కారు ఆందోళనలో ఉంది. కరోనా కేసుల సంఖ్య ఇదే రీతిలో పెరిగితే.. త్వరలోనే ఆ దేశం చైనా, ఇటలీలను మించిపోతుందని భావిస్తున్నారు. మొదట కరోనాను తేలిగ్గా తీసుకోవడమే ఈ పరిస్థితికి దారి తీసిందనే భావన వ్యక్తం అవుతోంది. రోజురోజుకూ పరిస్థితి దిగజారుతుండటం అమెరికన్లను కలవరానికి గురి చేస్తోంది. చైనా వల్లే కరోనా వైరస్ వ్యాప్తి చెందిందని డొనాల్డ్ ట్రంప్ ఆరోపిస్తున్నారు. అమెరికాలోని కీలక నగరమైన న్యూయార్క్‌ కోవిడ్‌కు కేంద్ర స్థానంగా మారింది. న్యూయార్క్‌లో 25,600 మందికిపైగా కరోనా బారిన పడగా, దాదాపు 200 మంది చనిపోయారు. ఇక్కడ ప్రతి రెండు మూడు రోజులకు కరోనా బాధితుల సంఖ్య రెట్టింపు అవుతోంది. బుల్లెట్ ట్రైన్ స్పీడ్‌తో ఒక్క కోవిడ్ విజృంభిస్తోంది. పరిస్థితి ఇలాగే కొనసాగితే.. మరో రెండు మూడు వారాల్లో న్యూయార్క్‌లో పరిస్థితి చేజారిపోతుందనే ఆందోళన వ్యక్తం అవుతోంది. కోవిడ్ కట్టడి కోసం న్యూయార్క్ నగరాన్ని దాదాపుగా లాక్‌డౌన్ చేశారు. న్యూయార్క్‌కు వెళ్లి వచ్చిన వారు, ఆ నగరం నుంచి వెళ్తున్నవారు 14 రోజులపాటు క్వారంటైన్‌లో ఉండాలని అమెరికా ప్రభుత్వం సూచిస్తోంది. తెలుగు ప్రజలు ఎక్కువగా ఉండే న్యూజెర్సీలో 3675 కరోనా కేసులు నమోదు కాగా.. కాలిఫోర్నియాలో 2494, వాషింగ్టన్‌లో 2221, మిచిగాన్‌లో 1791, ఇల్లినాయిస్‌లో 1535, ఫ్లోరిడాలో 1412, లూసియానాలో 1388, మసాచు‌సెట్స్‌లో 1159, జార్జియాలో 1026, పెన్సిల్వేనియాలో 851, టెక్సాస్‌లో 826 కరోనా కేసులు నమోదయ్యాయి. కరోనా వైరస్ నియంత్రణలో ఉందని నెల క్రితం ట్రంప్ ట్వీట్ చేశారు. కానీ ఈ నెల రోజుల వ్యవధిలో కరోనా కట్టడి కోసం తగిన నియంత్రణలను అమెరికా చేపట్టలేదు. దీంతో 30 రోజుల్లో కరోనా కేసుల్లో అమెరికా మూడోస్థానానికి చేరుకుంది.కరోనా ప్రభావంతో అమెరికా ఆర్థిక వ్యవస్థ తీవ్రంగా ప్రభావితం అవుతోంది. ఆర్థిక మాంద్యం దిశగా అమెరికా మళ్లుతోంది. దీంతో ఆర్థిక పరిస్థితిని చక్కదిద్దేందుకు, నిరుద్యోగులు అవుతున్న కోట్లాది మందిని ఆదుకోవడం కోసం 2 ట్రిలియన్ డాలర్ల ఉద్దీపన ప్యాకేజీని ప్రకటిస్తోంది. చిరు వ్యాపారులను ఆదుకోవడం కోసం 367 బిలియన్ డాలర్ల రుణ కార్యక్రమాన్ని రూపొందిస్తోంది. పరిశ్రమలు, నగరాలు, రాష్ట్రాల కోసం 500 బిలియన్ డాలర్ల నిధిని ఏర్పాటు చేస్తోంది. ఒక్కో వ్యక్తికి 1200 డాలర్లు, పిల్లలకు 500 డాలర్ల చొప్పున అందిస్తారని సమాచారం. వ్యాపారవేత్తలతోపాటు కార్మికులు, వైద్యులకు కూడా భారీ మొత్తంలో ఆర్థిక సాయం అందనుంది.కరోనా వైరస్‌ను సాధారణ ఫ్లూ లా భావించిన డొనాల్డ్ ట్రంప్.. అదే తగ్గిపోతుందని తొలుత భావించారు. ప్రజలకు అవగాహన కల్పించడం మీద ఆయన శ్రద్ధ పెట్టలేదు. జూలై, ఆగష్టు నెలల్లో అమెరికాలో కరోనా వైరస్ కేసుల సంఖ్య పెరుగుతుందని ఆయన భావించారు. కరోనా విషయంలో తగిన రీతిలో స్పందించడంలో ట్రంప్ సర్కారు విఫలమైందనే భావన వ్యక్తం అవుతోంది. కరోనా పెద్ద సమస్యే కాదని తొలుత ఆయన భావించారు. అత్యవసర ఆరోగ్య సేవలు, పరిశోధనలకు నిధులను తగ్గించారు. కరోనాను ఎదుర్కోవడానికి అమెరికా తగిన రీతిలో సన్నద్ధం కాలేదు. అమెరికాకు కరోనా ముప్పు పొంచి ఉందని హెచ్చరించిన వాళ్లను ఓవరాక్షన్ చేస్తున్నారని విమర్శించారుఅమెరికాలో కరోనా ప్రబలుతున్న తీరు చూసిన తర్వాత 21 రోజులపాటు దేశంలో లాక్‌‌డౌన్ విధిస్తూ ప్రధాని మోదీ తీసుకున్న నిర్ణయం సరైందేనని చెప్పడంలో ఎలాంటి సందేహం లేదు. నెల రోజుల క్రితం ట్రంప్ ఉపేక్షించిన విధంగానే మోదీ కూడా వ్యవహరిస్తే.. మనదేశంలో కొన్ని కోట్ల మంది కరోనా బారిన పడేవారు. మరణాల సంఖ్య కూడా లక్షలను దాటి కోట్లలో ఉండేది. మన దగ్గర జనాభా, జనసాంద్రత ఎక్కువ కావడమే దీనికి కారణం. కానీ మోదీ సరైన సమయంలో సరైన నిర్ణయం తీసుకున్నారనే భావన వ్యక్తం అవుతోంది. ఈ 21 రోజులపాటు ప్రజలు లక్ష్మణ రేఖ దాటి బయటకు రాకుండా.. ఇళ్లలో ఉంటే చాలు.. దేశాన్ని కాపాడిన వాళ్లం అవుతాం