కరోనా వైరస్ జన్యువులలో వైరల్ ప్రొటీన్లు
న్యూఢిల్లీ, మార్చి 27
ప్రపంచానికి కంటిమీద కునుకులేకుండా చేస్తోన్న కరోనా వైరస్ మహమ్మారికి విరుగుడును కనుగొనే ప్రక్రియ ముమ్మరంగా సాగుతోంది. ఈ నేపథ్యంలో వైరస్‌‌పై దాదాపు 70 ఔషధాలు, సహా వాటి సమ్మేళనాలు చాలా ప్రభావవంతంగా పనిచేస్తాయని భారతీయ శాస్త్రవేత్తలతో కూడిన అంతర్జాతీయ బృందం మూడు రోజుల కిందట గుర్తించింది. ఇప్పటికే వాటిలో కొన్ని డయాబెటిక్, అధిక రక్తపోటు వ్యాధిగ్రస్తులకు ఉపయోగిస్తుండగా కరోనా వైరస్ చికిత్స కోసం తిరిగి తయారు చేయనున్నట్టు శాస్త్రవేత్తలు తెలిపారు. కోవిడ్-19కు వ్యాక్సిన్‌ అభివృద్ధి చేసే ప్రయత్నంలో వాటి తయారీ వేగంగా ఉండొచ్చని పరిశోధనలో తేలింది. మొత్తం 29 కరోనా వైరస్‌ జన్యువుల్లో 26 జన్యువులను పరిశోధించిన బృందం.. ఇవి వైరల్‌ ప్రోటీన్‌లను ప్రత్యక్షంగా ఉత్పత్తి చేస్తాయని గుర్తించారు.అయితే, శాస్త్రవేత్తల బృందం వైరల్‌ ప్రోటీన్‌లను కాకుండా అతిథేయాలను లక్ష్యంగా చేసుకుని మరో విధానాన్ని ఎంచుకుంది. ఇవి ఏ మానవ ప్రోటీన్‌లతో కలిసి పోతాయో తెలుసుకోవడానికి అధ్యయనం చేస్తున్నట్లు కాలిఫోర్నియా యూనివర్సిటీ తెలిపింది. ఈ వివరాలను బయోఆర్‌ఎక్సీవీ అనే వెబ్‌సైట్‌లో ప్రచురించారు. వందలాది మందితో కూడిన అంతర్జాతీయ శాస్త్రవేత్తల బృందం కరోనావైరస్ జన్యువులపై అసాధారణమైన అధ్యయనాన్ని ప్రారంభించారు. ఊపిరితిత్తులల్లోని కణాల్లోకి జన్యువులను చొప్పించడానికి కరోనా వైరస్ ప్రత్యక్షంగా ప్రొటీన్‌లను ఉత్పత్తి చేస్తుందని గురించారు.ఈ ప్రోటీన్లను ఉత్పత్తి ప్రారంభమైన తర్వాత మిలియన్ల కొద్దీ కొత్త వైరస్‌లను ఉత్పత్తి చేయడానికి ఉపయోగించుకుంటుందని నిర్ధారించారు. కొన్ని వైరల్ ప్రోటీన్లు కేవలం ఒక మానవ ప్రోటీన్‌ను లక్ష్యంగా చేసుకున్నట్లు గుర్తించినట్టు తెలిపిన శాస్త్రవేత్తలు.. ఇతర వైరల్ ప్రోటీన్లు డజన్ల కొద్ది మానవ కణజాల ప్రోటీన్లను లక్ష్యంగా చేసుకోగలవని తెలిపారు. మానవ కణాలలోకి ప్రవేశించిన కరోనా వైరస్, మానవ ప్రోటీన్లపై ప్రభావం చూపే ఔషదాలు అవసరమని పరిశోధకులు తేల్చారు.కేన్సర్, పార్కిన్సన్, రక్తపోటు వంటి వ్యాధులకు చికిత్స చేయడానికి ఫుడ్ అండ్ డ్రగ్ అడ్మినిస్ట్రేషన్ ఆమోదించిన 24 ఔషధాలు కరోనా వైరస్‌ను నియంత్రిస్తాయని ఈ బృందం చివరికి గుర్తించింది. టైప్-2 డయాబెటిస్ బాధితులు హలోపెరిడోల్, స్కిజోఫ్రెనియాకు ఉపయోగించే మెట్‌ఫార్మిన్ లాంటి ఔషధం కూడా ఈ జాబితాలో ఉంది. ప్రస్తుతం క్లినికల్ ట్రయల్స్‌లో ఉన్న వ్యాక్సిన్స్‌లు, పరిశోధనలు ప్రారంభ దశలో ఉన్న సమ్మేళనాలు, పరాన్నజీవులు, బ్యాక్టీరియాల వల్ల కలిగే వ్యాధులకు వినియోగించే ఔషధాలు, యాంటీబయాటిక్స్ కూడా ఇందులో ఉన్నాయి. వీటికి కొన్ని మానవ ప్రోటీన్లను జోడించి కొత్త అధ్యయనం చేస్తున్నారు.మలేరియాకు కారణమయ్యే పరాన్నజీవిపై హైడ్రాక్సీన్- క్లోరోక్విన్ దాడిచేసి దానిని నిర్మూలిస్తుంది. కరోనా వైరస్ బాధితులకు చికిత్సలో క్లోరోక్విన్‌ ఉపయోగించడం వల్ల ఫలితం ఉంటుందని ఇప్పటికే శాస్త్రవేత్తలు ప్రకటించారు. ఇదే విషయాన్ని అమెరికా అధ్యక్షుడు డొనాల్డ్ ట్రంప్ సైతం పలుసార్లు వెల్లడించారు. అలాగే, హైడ్రాక్సీ క్లోరోక్విన్‌ సమర్థంగా పనిచేస్తుందని ఇండియన్ కౌన్సిల్ ఆఫ్ మెడికల్ రిసెర్చ్ (ఐసీఎంఆర్‌) ఇటీవల వెల్లడించింది.