చైనా తప్పిదంతోనే పెద్ద ప్రమాదం
బీజింగ్, మార్చి 27
గతేడాది డిసెంబరు చివరిన చైనాలోని వుహాన్ నగరంలో తొలిసారి వెలుగుచూసిన కొత్తరకం ప్రాణాంతక కరోనా వైరస్ ప్రస్తుతం దాదాపు ప్రపంచంలోని అన్ని దేశాలకూ విస్తరించింది. దీని వల్ల ఇప్పటికే 24వేల మందికిపైగా ప్రాణాలు కోల్పోగా, 150కిపైగా దేశాల్లో తీవ్ర ప్రభావం చూపుతోంది. వైరస్ వెలుగుచూసిన తొలినాళ్లలోనే చైనా మరింత పారదర్శకంగా వ్యవహరించి ఉంటే ఈ దుస్థితి వచ్చుండేదికాదనే అభిప్రాయం వ్యక్తమవుతోంది. వుహాన్‌లోని తొలిసారి వెలుగుచూసిన కరోనా వైరస్ దెబ్బకు ఐదు లక్షల మంది బాధితులుగా మారారు. ఒక్క ఐరోపా ఖండంలోనే 15వేల మందికిపైగా ప్రాణాలు కోల్పోయారు. కోవిడ్-19కు ప్రస్తుతం యూరప్ ప్రధాన కేంద్రంగా మారిపోయింది. ఈ నేపథ్యంలో అమెరికాకు చెందిన నేషనల్ రివ్యూ అనే మ్యాగిజైన్ ప్రచురించిన కథనం చర్చనీయాంశమయ్యింది. కోవిడ్ -19-19-19 ప్రాణాంతకమైందని రుజువు చేసే సమాచారం గురించి చైనా వ్యవహరించిన తీరు.. సముద్ర ఉత్పత్తుల మార్కెట్‌లో వెలుగుచూసిన ఈ వైరస్ జంతువుల నుంచి మనిషికి సోకిన విషయాన్ని దాచిపెట్టిన విధానం ఈ కథనంలో వివరించింది.వుహాన్‌లోని సముద్ర ఉత్పత్తుల మార్కెట్‌లో పనిచేసే ఓ వ్యక్తిలో కరోనా వైరస్ లక్షణాలు తొలిసారి డిసెంబరు 1నే గుర్తించారు. అతడిలో వైరస్ లక్షణాలు బయటపడిని ఐదు రోజుల తర్వాత ఆయన భార్య కూడా అనారోగ్యానికి గురయ్యింది. వీరిలో న్యుమోనియా లక్షణాలు బయటపడటంతో హాస్పిటల్‌కు తరలించి ఐసోలేషన్‌లో ఉంచారు. కొత్తరకం వైరస్ వీరికి సోకినట్టు గుర్తించిన వుహాన్ వైద్యులు.. ఇది జంతువుల నుంచి మనుషులకు వ్యాపించినట్టు నిర్ధారించారు. అయితే, ఈ విషయం డిసెంబరు రెండో వారం వరకూ బయట ప్రపంచానికి చైనా తెలియనీయలేదు. డిసెంబరు 25న వుహాన్‌లోని రెండు హాస్పిటల్స్‌లోని వైద్య సిబ్బందిలో న్యుమోనియా లక్షణాలు బయటపడటంతో వారిని క్యారంటైన్‌లో ఉంచారు. ఇది జరిగిన మూడు రోజుల తర్వాత అనూహ్యంగా వేలాది మంది అనారోగ్యంతో హాస్పిటల్స్‌లో చేరారు.. కానీ, అప్పుడు కూడా చైనా దీని గురించి ఎలాంటి ప్రకటన చేయలేదు.అయితే, ఏడు కేసులను పరిశీలించిన డాక్టర్ లీ వెన్‌లీయాంగ్ ఇది 2003లో ప్రపంచాన్ని వణికించిన సార్స్ వైరస్‌‌గా భావించారు. డిసెంబర్ 30న చాటింగ్ సందర్భంగా తన సహచర డాక్టర్లను లీ హెచ్చరించారు. ఇన్ఫెక్షన్ సోకకుండా తగిన జాగ్రత్తలు తీసుకోవాలని సూచించారు. అప్పుడు ఇది కరోనా వైరస్ అని ఆయనకు తెలీదు. జనవరి 3న పబ్లిక్ సెక్యూరిటీ బ్యూరో అధికారులు లీని ఆయన్ను కలిశారు. తప్పుడు ప్రచారం చేస్తున్నారు.. ఇది తీవ్ర ఇబ్బందికరం అంటూ ఓ లెటర్ మీద సంతకం చేయించుకున్నారు. అంతేకాదు, అంతుచిక్కని ఈ వైరస్ గురించి ఎలాంటి సమాచారం వెల్లడించరాదని హాస్పిటల్స్‌కు చైనా జాతీయ హెల్త్ కమిషన్ ఆదేశాలు జారీచేసింది. ఈ వైరస్ ఒకరి నుంచి ఇంకొకరికి వ్యాప్తిచెందినట్టు, వైద్య సిబ్బంది ఎవరూ అనారోగ్యానికి గురైనట్టు ఎలాంటి ఆధారాలు లభించలేదని డిసెంబరు 31న వుహాన్ మున్సిపల్ హెల్త్ కమిషన్ ప్రకటించింది. అదే రోజున బాధితుల నుంచి సేకరించిన నమూనాలను పరీక్షించవద్దని, వాటిని ధ్వంసం చేయాలని వుహాన్ ప్రావిన్సుల ఆరోగ్య కమిషన్ ఆదేశించింది.ఇది ఒకరి నుంచి మరొకరికి సోకుతున్నట్టు ఎలాంటి ఆధారాలు లేవని తమ ప్రాథమిక విచారణలో వెల్లడయినట్టు మరోసారి వుహాన్ మున్సిపల్ హెల్త్ కమిషన్ ప్రకటించింది. ఇదో సార్స్ తరహా వైరస్ అని వైద్యులు గుర్తించిన మూడు వారాల తర్వాత ప్రపంచ ఆరోగ్య సంస్థను చైనా సంప్రదించింది. అయితే, వుహాన్‌లో న్యూమోనియా తరహా అనారోగ్యంతో 59 మంది హాస్పిటల్‌లో చేరినట్టు జనవరి 6న న్యూయార్క్ టైమ్స్ పత్రిక తెలిపింది. అదే రోజు చైనా సెంటర్ ఫర్ డిసీజ్ అండ్ ప్రివెంటివ్ సైతం లెవెల్ 1 ట్రావెల్ అడ్వైజరీ జారీచేసింది. వుహాన్‌కు వచ్చే పర్యాటకులు జంతువులు, జంతు ఉత్పత్తి మార్కెట్లు, అనారోగ్యానికి గురైనవారికి దూరంగా ఉండాలని సూచించింది. అనారోగ్యంతో చికిత్స పొందుతున్నవారి నమూనాల్లో వైరస్ ఉన్నట్టు గుర్తించామని జనవరి 8న చైనా మెడికల్ అధికారులు వెల్లడించారు. కానీ, అప్పుడు కూడా ఇది ఒకరి నుంచి ఇంకొకరికి సోకుతుందనేది స్పష్టతలేదని పేర్కొంది. జనవరి 11న కూడా వుహాన్ హెల్త్ కమిషన్ విడుదల చేసిన బులెటిన్‌లోనూ దాదాపు ఇలాంటి సమాచారమే ఉంది.కరోనా వైరస్ రోగులకు చికిత్స చేసిన డాక్టర్ లీకి జ్వరం, జలుబు, దగ్గు మొదలై జనవరి 12న అనారోగ్యంతో హాస్పిటల్‌లో చేరారు. తర్వాత ఆయన పరిస్థితి విషమించడంతో అత్యవసర విభాగంలో చేర్పించి చికిత్స అందజేశారు. జనవరి 13న చైనా వెలుపల థాయ్‌లాండ్‌లో తొలి కరోనా వైరస్ కేసు నమోదయ్యింది. జనవరి 5న వుహాన్‌లో పర్యటించిన తమ దేశానికి చెందిన మహిళకు వైరస్ సోకినట్టు థాయ్‌లాండ్ ఆరోగ్య శాఖ వెల్లడించింది. జనవరి 14న ప్రపంచ ఆరోగ్య సంస్థ వెల్లడించిన నివేదిక సైతం వుహాన్ నగరంలో వెలుగుచూసిన వైరస్ ఒకరి నుంచి మరొకరికి సోకుతున్నట్టు చైనా అధికారుల నిర్వహించిన ప్రాథమిక విచారణలో వెల్లడికాలేదని తెలిపింది. జనవరి 15న జపాన్‌లో తొలికేసు బయటపడింది. తమ దేశానికి చెందిన పౌరుడు సముద్ర ఉత్పత్తుల మార్కెట్‌ను సందర్శించకపోయినా వైరస్ బారినపడినట్టు జపాన్ తెలిపింది.అప్పటి వరకు మనిషి నుంచి మరో మనిషికి ఈ వైరస్ సోకదని వాదించిన చైనా.. స్వరం మార్చి సన్నాయి నొక్కులు నొక్కింది. ఒకరి నుంచి మరొకరికి సోకే అవకాశం ఉందని, ఇది ఖచ్చితంగా చెప్పలేమని వుహాన్ మున్సిపల్ హెల్త్ కమిషన్ ప్రకటించింది. ఇది అంటువ్యాధి అని వుహాన్ వైద్యులు గుర్తించినా, చైనా కొత్త సంవత్సర వేడుకలు జరుపుకోడానికి నగరంలోని 40,000 కుటుంబాలకు అధికారులు అనుమతించారు. అంతేకాదు, దీనిని నివారించి, నియంత్రించగలమని జనవరి 19న చైనా ప్రభుత్వం ప్రకటించింది. ఈ ప్రకటన వెలువడి మర్నాడే గుయాంగ్డోంగ్‌లో రెండు కేసులు వెలుగుచూడటంతో ఇది ఒకరి నుంచి ఇంకొకరికి వ్యాపిస్తుందని అంటువ్యాధిగా ప్రకటించింది.జనవరి 21న అమెరికాలో కరోనా వైరస్ తొలి కేసు నమోదయ్యింది. వైరస్ సోకిన బాధితుడు అప్పటికి ఆరు రోజుల కిందటే చైనా నుంచి వచ్చినట్టు సీడీసీ తెలిపింది. దీంతో జనవరి 22న ప్రపంచ ఆరోగ్య సంస్థ (డబ్ల్యూహెచ్ఓ) ప్రతినిధుల బృందం వుహాన్‌లో క్షేత్రస్థాయిలో పర్యటించి, పరిస్థితులపై అవగాహనకు వచ్చింది. అధ్యయనం చేసి, నిర్ధారణకు రావాలని జనవరి 22న ప్రపంచ ఆరోగ్య సంస్థ ప్రతినిధులు నిర్ణయించారు. ఈ వైరస్ ఒకరి నుంచి ఇంకొకరికి సంక్రమిస్తున్నట్టు తేల్చింది. వైరస్ వెలుగుచూసిన దాదాపు రెండు నెలల తర్వాత చైనా అధికారులు మేల్కొన్నారు. వుహాన్ నగరం పూర్తిగా నిర్బంధించారు. అయితే, అప్పటికే జరగాల్సిన నష్టం జరిగిపోయింది. వేలాది మంది ఈ నగరం నుంచి విదేశాలకు వెళ్లి వైరస్‌ను అంతటా వ్యాపింపజేశారు. వైరస్‌పై హెచ్చరించి చైనీయులతో జేజేలు అందుకున్న డాక్టర్ లీకి కరోనా వైరస్ సోకినట్టు ఫిబ్రవరి 1న నిర్ధారణ కాగా ఆయన ఫిబ్రవరి 7న మృతిచెందాడు.