బ్రిటన్ లో డేంజర్ బెల్స్
లండన్, మార్చి 28
కరోనా వైరస్ ప్రపంచ దేశాలను భయపెడుతోంది. ముందుగా చైనాను వణికించిన కోవిడ్ మహమ్మారి ఇప్పుడు దాదాపుగా ప్రపంచంలోని అన్ని దేశాలకు పాకింది. ఇటలీలో కరతాళ నృత్యం చేసిన కరోనా స్పెయిన్, ఇరాన్‌లోనూ వేలాది మందిని బలి తీసుకుంది. ఇటలీలో 8500 మందికిపైగా కరోనా బారిన పడి ప్రాణాలు కోల్పోగా.. స్పెయిన్‌లో కోవిడ్ మృతుల సంఖ్య 5 వేలకు చేరువలో ఉంది. ఇక కరోనా పేషెంట్ల సంఖ్యలో అమెరికా.. చైనా, ఇటలీలను దాటేసింది. ఈ మూడు దేశాల్లో... ఒక్కో దేశంలో 80 వేల మందికి కంటే ఎక్కువ మంది కరోనా బారిన పడ్డారు. ఫ్రాన్స్, జర్మనీల్లోనూ కోవిడ్ బాధితుల సంఖ్య పెరుగుతోంది.ప్రస్తుత పరిస్థితిని చూస్తుంటే బ్రిటన్ మరో ఇటలీలా మారుతుందేమో అనే భయాందోళనలు వ్యక్తం అవుతున్నాయి. యూకేలో ప్రధాని బోరిస్ జాన్సన్‌తోపాటు ఆరోగ్య మంత్రి కూడా కోవిడ్ బారిన పడ్డారు. ఆయన కేబినెట్లో మరెంత మందికి కరోనా సోకిందో అనే అనుమానాలు వ్యక్తం అవుతున్నాయి. అంతకు ముందే ప్రిన్స్ చార్లెస్‌కు కూడా కోవిడ్ సోకిందని తేలింది. బకింగ్‌హమ్ ప్యాలెస్ ఉద్యోగికి కరోనా సోకిందని నిర్ధారణ కావడంతో.. క్వీన్ ఎలిజబెత్ ప్యాలెస్‌ నుంచి మరో చోటుకు వెళ్లాల్సి వచ్చింది.బ్రిటన్‌లో కరోనా పేషెంట్ల సంఖ్య 14,579 దాటగా.. మృతుల సంఖ్య 759గా నమోదైంది. గురువారం ఒక్కరోజే బ్రిటన్లో 115 మంది కరోనా వల్ల ప్రాణాలు కోల్పోగా... శుక్రవారం ఏకంగా 181 మంది కోవిడ్‌కు బలయ్యారు. రాబోయే రోజుల్లో ఈ సంఖ్య మరింత పెరిగే అవకాశం ఉంది. కరోనా కేసుల సంఖ్య పెరుగుతుండటంతో.. బ్రిటన్‌లో అనుమానితులందరికీ పరీక్షలు నిర్వహిస్తున్నారు. ఈ టెస్టుల్లో దాదాపు లక్ష మందికి కరోనా నెగటివ్ అని వచ్చింది. ఒక్క రోజులోనే వేల్స్‌లో ఆరుగురు కరోనా కారణంగా మరణించగా.. స్కాట్లాండ్‌లో 8 మందిని కోవిడ్ బలి తీసుకుంది. ఎస్సెక్స్‌లో జనరల్ ఫిజిషియన్ అయిన డాక్టర్ హబీబ్ జైదీ (76) కరోనా లక్షణాలతో చనిపోయారని ఆయన కుటుంబ సభ్యులు తెలిపారు.కరోనా వైరస్ వ్యాప్తిని అరికట్టడం కోసం యూకే లాక్‌డౌన్ ప్రకటించింది. ఇద్దరు కంటే ఎక్కువ మంది గుమికూడటంపైనా నిషేధం విధించింది. ఏప్రిల్ చివరి వరకు లండన్ సిటీ ఎయిర్‌పోర్టును మూసివేశారు. మరోవైపు యూకేలో భాగమైన స్కాట్లాండ్‌లో కోవిడ్ బాధితుల సంఖ్య వేగంగా పెరుగుతోంది. అక్కడ కోవిడ్ బాధితుల సంఖ్య 165 నుంచి ఏకంగా 1059కి పెరిగింది. అంతే కాదు స్కాట్లాండ్‌లో 65 వేల మందికి పైగా కోవిడ్ ఇన్ఫెక్షన్ సోకిందని ఆ దేశ ఫస్ట్ మినిస్టర్ నికోలా స్టర్జియాన్, ఆరోగ్య మంత్రి జియానే ఫ్రీమాన్‌తో ఎడిన్ బర్గ్‌లో సమావేశమైన డాక్టర్ కేథరిన్ కాల్డర్‌వుడ్ తెలిపారు.అంతకు ముందు స్కాట్లాండ్‌లో 40 వేల నుంచి 50 వేల మందికిపైగా స్కాట్లాండ్ ప్రజలకు కరోనా సోకి ఉంటుందని చెప్పిన డాక్టర్ కేథరిన్.. రోజు రోజుకీ పరిస్థితి ప్రమాదకరంగా మారుతోందని.. స్కాట్లాండ్‌లో 65 వేల మందికి పైగా ఇన్ఫెక్షన్‌కు గురై ఉండొచ్చని అంచనా వేశారు. చాలా మంది ప్రజలకు తమకు ఇన్ఫెక్షన్ సోకిందని గ్రహించకపోవచ్చని.. లక్షణాలు బయటపడ్డాక సెల్ఫ్ ఐసోలేషన్‌లోకి వెళ్తుండొచ్చని ఆమె అభిప్రాయపడ్డారు. కరోనా వ్యాప్తి రేటు తక్కువగా ఉండొచ్చు. కానీ టైం వస్తుంది, అది కొద్ది వారాలు కూడా లేదు అని ఆమె హెచ్చరించారు.