కరోనా అనుమానంతో కొట్టి చంపారు
పట్నా మార్చ్ 31 
కరోనా వైరస్ ప్రపంచవ్యాప్తంగా కరాళ నృత్యం చేస్తోంది. చైనా నుంచి పాకిన ఈ వైరస్ వివిధ దేశాల్లో మరణ మృదంగం మోగిస్తోంది. ఈ మహమ్మారి ప్రభావంతో మనుషుల మధ్య మరింత దూరం పెరిగింది. తుమ్మినా దగ్గినా శతృవులా చూస్తున్నారు. ఆ వ్యాధి సోకిన వ్యక్తులను అంటరాని వాళ్లలా పరిగణిస్తున్న పరిస్థితులు దాపురించాయి. ఈ పరిస్థితుల్లో  పట్నాలో  దారుణం చోటుచేసుకుంది.  కరోనా ఉందన్న అనుమానంతో కొందరు యువకులు అతడిని కొట్టి చంపారు. ఘటన బిహార్లోని సీతామర్హి జిల్లాలో సోమవారం అర్థరాత్రి చోటుచేసుకుంది.పోలీసులు తెలిపిన వివరాల ప్రకారం బిహార్కు చెందిన ఓ కార్మికుడు ఉపాధి కోసం మహారాష్ట్ర వలస వెళ్లాడు. అయితే కరోనా వైరస్ వ్యాప్తి నివారణ చర్యల్లో భాగంగా దేశ వ్యాప్తంగా లాక్ డౌన్ విధించడంతో అక్కడే చిక్కుకుపోయాడు. మరోవైపు మహారాష్ట్రలో కరోనా కేసులు అత్యధికంగా నమోదవుతున్నాయి. ఈ క్రమంలోనే అతను కుటుంబంతో సహా.. స్వస్థలం బిహార్ కు చేరుకున్నాడు. ఈ నేపథ్యంలో ఇద్దరు స్థానికులు ఆ కార్మికుడిని స్వగ్రామంలోకి అనుమతించేందుకు నిరాకరించారు. ఈ తరుణంలోనే  వారిద్దరు అతని పై దాడి చేసి హతమార్చారు.