వూహాన్ లో కుప్పులు కుప్పులుగా శ్మశానాలు
బీజింగ్, మార్చి 31
ప్రపంచాన్ని వణికిస్తోన్న మహమ్మారి కరోనా వైరస్.. తొలిసారి చైనాలోని వుహాన్ నగరంలో గతేడాది డిసెంబరు చివరివారంలో వెలుగుచూసిన విషయం తెలిసిందే. చైనా లెక్కల ప్రకారం.. ఆ దేశంలో కరోనా వైరస్‌తో మొత్తం 3,305 మంది ప్రాణాలు కోల్పోగా, వుహాన్ నగరంలోనే 2,548 మరణాలు సంభవించాయి. అయితే, కరోనా మరణాల విషయంలో చైనా వెల్లడించిన వివరాలపై ముందు నుంచి అనుమానాలు వ్యక్తమవుతున్నాయి. వాస్తవాలను దాచిపెట్టి ప్రపంచదేశాలనూ డ్రాగన్ తప్పుదోవపట్టించదనే ప్రచారం జరుగుతోంది. ఈ ప్రచారానికి వుహాన్ నగరంలో తాజా పరిస్థితులు బలం చేకూరుస్తున్నాయి. రెండు నెలల తర్వాత ఆంక్షలు సడలించడంతో ప్రజలు ఇళ్ల నుంచి బయటకు వస్తున్నారు.వైరస్ బారినపడి ప్రాణాలు కోల్పోయిన తమవారికి సమాధులు నిర్మించడానికి కుటుంబసభ్యులు పెద్ద ఎత్తున తరలివస్తున్నారు. నగరంలోని మొత్తం ఎనిమిది శ్మశనాలకు గత రెండు రోజుల్లో వేలాది మంది రావడంతో కరోనా మరణాల విషయంలో చైనా చెబుతున్న సంఖ్యపై మరిన్ని అనుమానాలు వ్యక్తమవుతున్నాయి. ఈ అంశం ఇప్పుడు చైనా ప్రభుత్వానికి తలనొప్పిగా పరిణమించింది. దీనిపై అంతర్జాతీయ సమాజానికి ఏం సమాధానం చెప్పాలోనని మల్లగుల్లాలు పడుతోంది.అంత్యక్రియలు తర్వాత తమవారి అస్థికలను తీసుకెళ్లేందుకు గతవారం నుంచి అనుమతించారు. దీంతో ప్రజలు భారీగా తరలివచ్చిన ఫోటోలు ఇప్పుడు సోషల్ మీడియాలో వైరల్ అవుతున్నాయి. సమాధుల నిర్మాణం కోసం బుధ, గురువారాల్లోనే ఒక శ్మశానం వద్ద దాదాపు 2,500 శవపేటికలను తరలించినట్టు చైనా మీడియా కియాక్సిన్ తెలిపింది. అదే శ్మశానం ప్రాంగణంలో మరో 3,500 వరకు బాక్సులు ఉన్నట్టు పేర్కొంది. అయితే, ఇందులో ఎన్నింటిని వినియోగించారనే అంశంపై స్పష్టత లేదు. దీని గురించి సిబ్బందిని ఫోన్‌లో ప్రశ్నిస్తే తమకు పూర్తి వివరాలు తెలియదని ఆరు శ్మశానాల్లోని ఉద్యోగులు సమాధానం ఇచ్చారని, మిగతా రెండు చోట్ల స్పందించలేదని తెలిపింది. తమవారి అస్థికలను తీసుకోడానికి గంటల కొద్దీ నిరీక్షించామని పలువురు తెలిపారు.ఇటలీ, అమెరికా, స్పెయిన్‌లో వైరస్ కారణంగా వేలాది మంది ప్రాణాలు కోల్పోతుండగా, ఇందుకు సంబంధించిన ఫోటోలు, వీడియోలు పెద్ద ఎత్తున బయటకు వస్తున్నాయి. వైరస్ బారినపడ్డవారికి చికిత్స చేయడానికి హాస్పిటల్స్ చాలక, బయటే టెంట్లు వేసి వైద్యం చేస్తున్నారు. అలాంటిది వైరస్ వెలుగుచూసిన దేశంలో పరిస్థితి భిన్నంగా ఉంది. అయితే, దేశంలో వైద్య వ్యవస్థ, వైరస్ ప్రారంభ దశలో కప్పిపుచ్చడానికి ప్రభుత్వం చేసిన ప్రయత్నాలపై సందేహాలు వ్యక్తం చేస్తున్నారు.కరోనా వైరస్ లక్షణాలతో అనేక మంది మృతిచెందారు కానీ, వీరికి నిర్ధారణ పరీక్షలు నిర్వహించలేదని, కోవిడ్-19 మరణాల్లో వీరిని లెక్కించలేదని సియాక్సిన్ తన కథనంలో వివరించింది. అలాగే కరోనా వైరస్ బాధితులతో ఆసుపత్రులు నిండిపోవడంతో ఇతర వ్యాధులతో బాధపడే రోగులకు సరైన చికిత్స లేకపోవడం చాలా మంది ప్రాణాలు కోల్పోయారని పేర్కొంది.అయితే, వుహాన్ నగరంలో 2019 చివరి త్రైమాసికంలో మొత్తం 13,856 మందికి అంత్యక్రియలు నిర్వహించినట్టు బ్లూబర్గ్ నివేదిక తెలియజేస్తోంది. 2018 నాలుగో త్రైమాసికంతో పోలిస్తే ఇది 2,419 తక్కువ. మరోవైపు, ఏప్రిల్ 30 వరకు నగరంలోని సమాధుల వద్ద చేపట్టి కార్యక్రమాలను నిషేధిస్తున్నట్టు వుహాన్ ప్రభుత్వం గురువారం ఒక ప్రకటనను విడుదల చేసింది. దీంతో, ఏప్రిల్ 4న జరిగే చింగ్ మింగ్ ఫెస్టివల్ (సమాధుల వద్ద ప్రార్ధనలు) నిర్వహించలేరు.ఏటా ఏప్రిల్ 4న చైనాలో తమ పూర్వీకులను తలచుకుంటూ ఆ రోజున వారి సమాధుల వద్ద ప్రార్ధనలు నిర్వహిస్తారు. గ్వాంగ్జూ, జీజియాంగ్ సహా ఇతర ప్రావిన్సుల్లోనూ ఇలాంటి ఆంక్షలనే విధించారు. అంతేకాదు, వైరస్ వల్ల చనిపోయిన తమవారి గురించి సోషల్ మీడియాలో పోస్ట్‌లు పెడుతున్నవారికి పోలీసుల నుంచి బెదిరింపులు కూడా వస్తున్నాయి. వాటిని పోస్ట్ చేయవద్దని హుకుం జారీచేస్తున్నారు.