కశ్మీర్ పై పాక్ కు మళ్లీ షాక్
న్యూయార్క్, ఏప్రిల్ 2
ఐక్యరాజ్యసమితి భద్రతా మండలి అధ్యక్ష స్థానం నుంచి చైనా నిష్క్రిమించడానికి ముందు జమ్మూ కశ్మీర్‌ విషయంలో భారత్ తీసుకున్న నిర్ణయాన్ని, అక్కడ పరిస్థితులపై చర్చించాలన్న పాకిస్థాన్ చేసిన విజ్ఞప్తిని డ్రాగన్ విస్మరించింది. భారత్, చైనాలు సంయుక్తంగా కోవిడ్ -19 ను ఎదుర్కోవాలని భావిస్తున్నందున కశ్మీర్ విషయంలో పాకిస్థాన్ చేస్తున్న ఆరోపణలను పొరుగు దేశం పట్టించుకోలేదు. భారత్, చైనాల మధ్య ద్వైపాక్షిక సంబంధాలు మరింత బలపడతాయని విదేశాంగ మంత్రి జయశంకర్ గతవారం వ్యాఖ్యానించిన విషయం తెలిసిందే.భారత్, చైనా మధ్య ఎయిర్ ఇండియా ఒక కార్గో ఎయిర్ బ్రిడ్జిని ఏర్పాటు చేసిందని మంగళవారం కేంద్ర ప్రభుత్వం ప్రకటించింది. ఇది రెండు దేశాల మధ్య క్లిష్టమైన వైద్య పరికరాలు, సామాగ్రిని రవాణా చేయడానికి ఉపకరిస్తుందని తెలిపింది. ఐరాస భద్రత మండలి అధ్యక్షుడిగా ఉన్న చైనా నేత జాంగ్ జున్‌కు కశ్మీర్‌లోని పరిస్థితులను వివరిస్తూ మార్చి 9న పాకిస్తాన్ విదేశాంగ మంత్రి షా మెహమూద్ ఖురేషి ఓ లేఖ రాశారు. కశ్మీర్‌లో మానవ హక్కుల ఉల్లంఘన తీవ్రంగా ఉందని ఆ లేఖలో ఆరోపించారు. యూఎన్ఎస్‌సీకి లేఖ రాసిన విషయాన్ని పాకిస్థాన్ మార్చి 27 న ప్రకటించింది.కశ్మీర్ విషయంలో స్పష్టమైన చర్యలు తీసుకోవాలని మాత్రం ఐరాస భద్రత మండలికి రాసిన లేఖలో పాక్ పేర్కొలేదు. అయితే, ఐరాసలో పాకిస్థాన్ శాశ్వత ప్రతినిధి మునిర్ అక్రమ్ మాత్రం కశ్మీర్ విషయంలో అత్యవసరంగా చర్చించి, తగిన పరిశీలన చేయాలని జాంగ్ జూన్‌ను కోరినట్లు వెల్లడించింది. పాక్ విదేశాంగ మంత్రి రాసిన లేఖకు తోడు అంతర్జాతీయ శాంతి భద్రతకు ముప్పు కలిగించేలా జమ్మూ కశ్మీర్‌లో పరిణామాలు ఉన్నాయని పేర్కొంటూ మరో విన్నపాన్ని అక్రమ్ జతచేశాడు.జమ్మూ కశ్మీర్‌కు ప్రత్యేక హోదాను గతేడాది ఆగస్టులో రద్దుచేస్తూ భారత్ తీసుకున్న నిర్ణయాన్ని ఇటీవల వరకూ చైనా వ్యతిరేకిస్తూ వచ్చింది. ఈ విషయంపై భద్రతా మండలి అనధికారిక సమావేశం ఏర్పాటు చేయమని బలవంతం చేసింది. ఈ ఏడాది జనవరిలోనూ కశ్మీర్‌పై ఉన్నతస్థాయి భేటీ నిర్వహించాలని యుఎన్‌ఎస్‌సిపై ఒత్తిడి తీసుకొచ్చింది. కానీ, కౌన్సిల్‌లో మెజారిటీ సభ్యులు దీనిని వ్యతిరేకించడంతో చైనా ప్రతిపాదన కార్యరూపం దాల్చలేదు.అయితే, తాజాగా భద్రతా మండలి అధ్యక్ష హోదాలో ఉన్న చైనా.. పాకిస్థాన్ చేసిన విన్నపాన్ని పట్టించుకోకపోవడం విశేషం. ఇది భారత్ పట్ల చైనా వైఖరిలో వచ్చిన మార్పునకు సంకేతమని విశ్లేషకులు అభిప్రాయపడుతున్నారు. కరోనా వైరస్ నేపథ్యంలో జమ్మూ కశ్మీర్‌లో ఆంక్షలను తొలగించాలని, వైద్య, ఇతర అవసరమైన సామాగ్రిని తరలించాలని పాక్ తన లేఖలో పేర్కొంది. అయితే, కరోనా వైరస్‌పై భారత్‌తో కలిసి పోరాటం చేయాలని భావిస్తోన్న చైనా.. తన చిరకాల మిత్రుడు పాక్ ప్రతిపాదనను తిరస్కరించింది.