8 కోట్లు విరాళం ప్రకటించిన టీటీడీ
తిరుపతి, ఏప్రిల్ 7
కరోనా కోసం అంతా కదిలివస్తున్నారు. కేంద్ర రాష్ట్ర ప్రభుత్వాల పిలుపు మేరకు అంతా తమకు తోచిన సాయం చేస్తున్నారు. చిన్న పిల్లల నుంచి సెలబ్రిటీల వరకు విరాళాలు అందచేస్తున్నారు. తాజాగా ప్రముఖ పుణ్యక్షేత్రం తిరుమల తిరుపతి దేవస్థానం సైతం కరోనా కోసం ముందుకు వచ్చింది. ఏపీ ప్రభుత్వానికి భారీ విరాళాన్ని ప్రకటించింది. టీటీడీ తరఫున రూ. 19కోట్లు ఏపీ ప్రభుత్వానికి ఇస్తున్నట్లు టీటీడీ ఎగ్జిగ్యూటివ్ ఆఫీసర్ అనిల్ కుమార్ సింఘాల్ అన్నారు. ఇప్పటికే రూ.8కోట్లు చిత్తూరు జిల్లా అధికారులకు ఇచ్చామని ఆయన తెలిపారు. ఇప్పుడు మరో రూ.11కోట్లను త్వరలో ఏపీ ప్రభుత్వానికి అందజేస్తామని సింఘాల్ తెలిపారు. మరోవైపు లాక్‌డౌన్ నేపథ్యంలో నిరాశ్రయులు అయిన చాలామందికి టీటీడీ అండగా నిలిచింది. వలస కూలీలతో పాటు యాచకులను ఆదుకునేందుకు రోజుకు లక్షా 20వేల ఫుడ్ ప్యాకెట్లను టీటీడీ అధికారులు పంపిణీ చేస్తున్నారు. మధ్యాహ్నం, రాత్రి సమయాల్లో భోజన ప్యాకెట్లను పంపిణీ చేస్తున్నారు. లాక్‌డౌన్ ముగిసేవరకు తాము భోజన ప్యాకెట్లను పంపిణీ చేస్తామని టీటీడీకి సంబంధించిన అధికారులు తెలిపారు. అంతేకాదు తిరుమల కొండపై ఉన్న విశ్రాంతి గృహాల్లోనూ కొంతమంది నిరాశ్రయులకు కూడా ఆశ్రయం కల్పిస్తున్నామన్నారు.లాక్ డౌన్‌తో తిరుమల కొండపై దర్శనాలు నిలిపివేశారు. భక్తుల్ని ఎవరిని కూడా అనుమతించడం లేదు. ఇక తిరుమలపై వస్తోన్న అసత్య ప్రచారాలను నమ్మకండని సింఘాల్ భక్తుల్ని కోరారు. భక్తులకు మాత్రమే దర్శనం లేదని.. ఆగమ శాస్త్రం ప్రకారం శ్రీవారికి జరగాల్సిన అన్ని పూజలు జరుగుతున్నాయని ఆయన వివరించారు. అంతేకాదు ఆదివారం శ్రీవారికి వసంతోత్సవం కార్యక్రమం కూడా నిర్వహించినట్లు సింఘాల్ తెలిపారు.