కరోనాను తరమి కొట్టిన నగరం
స్పె యిన్, ఏప్రిల్ 8
కరోనా వైరస్ కారణంగా ప్రపంచం మొత్తం ఇప్పుడు పరీక్షా కాలాన్ని ఎదుర్కొంటుంది. ప్రపంచ వ్యాప్తంగా చాలా దేశాలు లాక్ డౌన్ లోకి వెళ్లాయి. కరోనా వైరస్ కు సంబంధించి అత్యధిక కేసులు నమోదవుతున్న దేశాల జాబితాలో స్పెయిన్ 2వ స్థానంలో ఉంది. అటువంటి స్పెయిన్ దేశంలో ఒక కొండ ప్రాంతపు దుర్గంలో ఉన్న ఈ పట్టణం కరోనా వైరస్ మహమ్మారి తాకకుండా ఎదుర్కోగలుగుతుంది.దక్షిణ స్పెయిన్ లోని 'జహారా డి లా సియెర్రా' బాహ్య ప్రపంచం నుండి పూర్తిగా దూరంగా ఉండడం వల కరోనా వైరస్ ను తమ పట్టణ సరిహద్దులు దాటి రాకుండా నిరోధించగలిగింది. మార్చి 14న కరోనా వైరస్ వ్యాప్తికి అరికట్టేందుకు స్పెయిన్ 'స్టేట్ ఆఫ్ అలారం' ప్రకటించినప్పుడు జహారా మేయర్ శాంటియాగో గాల్వన్ కోట పట్టణానికి ప్రవేశించే ఐదు ప్రవేశ ద్వారాలలో నాలుగు మూసి వేయాలని ఆదేశించారు.చైనా దేశంలోని ఊహాన్ ప్రావిన్స్ లో ఉద్భవించిన కరోనా వైరస్ కేవలం నెల రోజుల వ్యవధిలోనే యూరప్ దేశాల్లో తన నెల ప్రతాపాన్ని చూపింది. చూస్తుండగానే అన్ని దేశాలకు వ్యాపించి ప్రపంచ ఆర్ధిక వ్యవస్థను పతనం చేసింది. దీంతో ప్రపంచ ఆరోగ్య సంస్థ (WHO) దీనిని ప్రపంచవ్యాప్త మహమ్మారిగా ప్రకటించింది.కరోనా వైరస్ కేసులు స్పెయిన్ లో 1 లక్షకు పైగా నమోదు అయినప్పటికీ ఈ కోట పట్టణంలో మాత్రం ఒక్క కేసు కూడా నమోదు కాలేదు. కరోనా వైరస్ విజృంభిస్తున్న ప్రారంభ సమయంలోనే తగిన విధంగా ప్రతిస్పందించి సరైన సమయంలో జాగ్రత్తలు తీసుకోవడం, దూరంగా ఒంటరిగా ఉండడం వలన ఇక్కడ కరోనా సంక్రమణ జరగలేదని అధికారులు అభిప్రాయపడుతున్నారు.జహారా పట్టణం మేయర్ ఇచ్చిన సూచనలను అనుసరించడానికి ఏకగ్రీవంగా అంగీకరించడం ద్వారా వైరస్ ను అరికట్టగలిగింది. జహారా జనాభాలో మూడింట ఒక వంతు 65 ఏళ్లు పైబడిన వారు ఉన్నప్పటికీ ఎవరూ కరోనావైరస్ ప్రభావానికి గురి కాలేదు. జహారా ప్రసిద్ధ పర్యాటక కేంద్రం అయినప్పటికీ టూరిస్టులు, ప్రజల రాకపోకలు జరగకుండా కఠినమైన నిబంధనలను అనుసరించారు.పట్టణ మేయర్ గాల్వన్ అధికారులు అనుసరించిన చర్యలను ప్రస్తావిస్తూ... జహారాలోకి ప్రవేశించే ఏ వాహనమైన క్రిమిసంహారకం చేయబడుతుందన్నారు. దీని కోసం ఇక్కడ అనుమతించబడిన ఒక చెక్ పోస్ట్ వద్ద ఇద్దరు రక్షణ దుస్తులు ధరించిన వ్యక్తులు వచ్చే వాహనాలను పర్యవేక్షిస్తారని తెలిపారు. అదే విధంగా పట్టణంలోని వీధులు మరియు ఇతర ప్రదేశాలు 10 మంది బృందం కలిగిన టాస్క్ ఫోర్స్ ద్వారా వారానికి రెండు సార్లు శుభ్రపరచబడతాయన్నారు.నివాసితులకు కిరాణా, వైద్య సామాగ్రి మరియు ఇతర వస్తువులను సకాలంలో అందించే బాధ్యతను స్థానిక వ్యాపారులు పంచుకున్నారు. అలాగే ప్రజలు చెప్పిన సరుకులను సకాలంలో అందజేయడానికి కేవలం ఇద్దరు మహిళలను మాత్రమే నియమించారు. తద్వారా పట్టణం చుట్టూ తిరిగే వారి సంఖ్య తగ్గింది.కరోనా వైరస్ బారి నుండి తప్పించేందుకునేందుకు ప్రపంచ దేశాలు కష్టపడుతున్న తరుణంలో జహారా అనే ఈ చిన్న పట్టణం సామాజిక దూరాన్ని పాటిస్తూ ఈ ఘోరమైన వైరస్ పై పోరాడుతున్న తీరు అందరికీ స్ఫూర్తి నింపుతుంది.