అమెరికాకు భారత్ హైడ్రాక్సిక్లోరోక్విన్
న్యూయార్క్, ఏప్రిల్ 13
డొనాల్డ్‌ ట్రంప్‌ అభ్యర్థన మేరకు భారత్‌ పంపిన హైడ్రాక్సీక్లోరోక్విన్‌ సహా ఇతర ఔషధాలు అమెరికాకు చేరాయి. ప్రత్యేక కార్గో విమానంలో పంపిన ఈ ఔషదాలు శనివారం సాయంత్రం న్యూజెర్సీలోని నెవార్క్‌ అంతర్జాతీయ విమానాశ్రయానినికి చేరుకున్నట్లు అమెరికాలోని భారత రాయబారి తరణ్‌జిత్‌ సంధు వెల్లడించారు. కోవిడ్-19పై పోరులో భాగస్వామ్య దేశాలకు మద్దతుగా భారత్ పంపిన హైడ్రాక్సీ క్లోరోక్విన్ ఔషధాలు నెవార్క్ విమాశ్రయానికి చేరుకున్నాయని.. తరణ్‌జిత్ ట్విట్టర్‌లో వెల్లడించారు. కొవిడ్‌-19 చికిత్సలో క్లోరోక్విన్‌ మాత్రలు ఆశాజనక ఫలితాలు ఇస్తున్నాయని.. వీటిని రోగులు, వారికి దగ్గరగా ఉండేవారికి ఇవ్వొచ్చని ‘ఫుడ్‌ అండ్‌ డ్రగ్‌ అడ్మినిస్ట్రేషన్‌’‌(ఎఫ్‌డీఏ) సూచించిన విషయం తెలిసిందే.అమెరికాలో కరోనా విజృంభణ కొనసాగుతోంది. ఇప్పటి వకూ ఆ దేశంలో 5,33,259 మంది వైరస్‌ బారినపడగా.. వీరిలో 20,597 మంది ప్రాణాలు కోల్పోయారు రికార్డు స్థాయిలో అక్కడ మరణాలు చోటుచేసుకుంటున్నాయి. ఈ తరుణంలో హైడ్రాక్సీ క్లోరోక్విన్‌ అమెరికాకు చేరడం అక్కడి ప్రభుత్వానికి ఉపశమనం కలిగించే విషయమే. మొత్తం 35.82 లక్షల హైడ్రాక్సీ క్లోరోక్విన్ మాత్రలు, ఇతర ఔషధాలు మొత్తం 9 టన్నులు అమెరికాకు పంపింది.వాస్తవానికి హైడ్రీక్సీ క్లోరోక్విన్ ఔషధాల ఎగుమతులపై భారత్‌ నిషేధం విధించింది. కానీ, ప్రపంచ దేశాల నుంచి విజ్ఞ‌ప్తులు పెరగడంతో మానవతా దృక్పథంతో వ్యహరించి నిషేధాన్ని భారత్ పాక్షికంగా ఎత్తివేసింది. భారత అవసరాలకు సరిపడా నిల్వలు ఉంచుకొని మిగతావి ఆయా దేశాలకు సరఫరా చేస్తోంది. మలేరియా చికిత్సలో వాడే హైడ్రాక్సీ క్లోరోక్విన్‌ను భారత్ పెద్ద సంఖ్యలో ఉత్పత్తి చేస్తోంది. ప్రపంచంలోని దాదాపు 70 శాతం భారత్‌లో ఉత్పత్తి అవుతున్నాయి. ఏప్రిల్ 7 ఈ ఔషదాల ఎగుమతులపై భారత్ నిషేధం ఎత్తివేసింది.భారత్ పెద్ద మనసుతో తమకు సంజీవని లాంటి క్లోరోక్విన్‌ను పంపడం ఎన్నటికీ మరిచిపోలేమని అమెరికన్లు హర్షం వ్యక్తం చేస్తున్నారు. తమ పట్ల భారత్ చూపిన మానవత్వాన్ని అమెరికా ఎప్పుడూ మరచిపోదు.. అధ్యక్షుడు డొనాల్డ్ ట్రంప్, ప్రధాని నరేంద్ర మోదీల నాయకత్వంలో ప్రపంచంలోనే రెండు అతిపెద్ద ప్రజాస్వామ్య దేశాలు కలిసి సాగుతున్నాయని ఓ అమెరికన్ ట్విట్టర్‌లో వ్యాఖ్యానించారు. స్నేహితుల అవసరం కోసం భారత్ గొప్ప ఉదారతను చాటుకుందని ప్రశంసలు కురిపిస్తున్నారు.ఇక, ఫ్రెంచ్ పరిశోధనల ప్రకారం.. 1061 మంది కరోనా వైరస్ బాధితులకు హైడ్రాక్సీ క్లోరోక్విన్ ఔషధాలు, యాంటీ బయోటిక్స్‌తో కలిసి ఇవ్వగా 10 రోజుల్లోనే దాదాపు 92 శాతం మంది, 15 రోజుల్లో 96 శాతం మంది కోలుకున్నారు. మరోవైపు, కరోనా రోగులకు హైడ్రాక్సీ క్లోరోక్విన్ మందు వాడకంపై ఇండియన్ కౌన్సిల్ ఆఫ్ మెడికల్ రీసెర్చ్(ఐసీఎమ్ఆర్) ఇటీవల కీలక సూచన చేసింది. దీనిపై జరుగుతున్న అధ్యయనం తాలూకు ఫలితాలు వచ్చే వరకూ కరోనా రోగులకు ఈ ఔషధం ఇవ్వక్కర్లేదని సూచించింది. అయితే, పలు దేశాల్లో బాధితులకు చికిత్సలో ఉపయోగిస్తుండగా.. మంచి ఫలితాలు వస్తున్నాయి.