25 జిల్లాల్లో కరోనా తగ్గుముఖం
న్యూఢిల్లీ, ఏప్రిల్ 14  
గతంలో కరోనా వైరస్ కేసులు నమోదైన 25 జిల్లాల్లో గత రెండు వారాల్లో ఒక్క కేసు కూడా నమోదు కాలేదని కేంద్ర ఆరోగ్య, కుటుంబ సంక్షేమ శాఖ ప్రకటించింది. దేశవ్యాప్తంగా కరోనా కేసులు పెరిగినా 25 జిల్లాల్లో కరోనా తగ్గుముఖం పట్టడం ఆహ్వానించదగ్గ పరిణామమని పేర్కొంది.ఈ మేరకు వైద్య, కుటుంబ సంక్షేమ శాఖ జాయింట్ సెక్రటరీ లవ్ అగర్వాల్ చెప్పారు.దేశంలో 15 రాష్ట్రాల్లోని 25 జిల్లాల్లో ఒక్క కేసు కూడా నమోదు కాలేదన్నారు. వీటిలో కర్ణాటకలో అత్యధికంగా నాలుగు జిల్లాల్లో కేసులు నమోదు కాలేదన్నారు. అలాగే మహారాష్ట్ర, చత్తీస్‌గఢ్, గోవా, కేరళ, మణిపూర్, జమ్మూ కశ్మీర్, మిజోరాం, పుదుచ్చేరి, పంజాబ్, బిహార్, రాజస్థాన్, హర్యానా, ఉత్తరాఖండ్, తెలంగాణ రాష్ట్రాలు ఉన్నాయని వెల్లడించారు.ఆయా జిల్లాల్లో తీసుకుంటున్న కట్టుదిట్టమైన చర్యలే కేసులు నమోదు కాకపోవడానికి కారణమని లవ్ అగర్వాల్ పేర్కొన్నారు. కాగా, దేశంలో  గడిచిన 24 గంటల్లో దేశంలో కొత్తగా 905 కేసులు నమోదు కాగా, 51 మరణాలు సంభవించాయని కేంద్ర వైద్య ఆరోగ్య శాఖ వెల్లడించింది. దీంతో ఇప్పటి వరకు దేశంలో మరణించిన వారి సంఖ్య 324కు పెరిగింది. అలాగే మొత్తం కేసుల సంఖ్య 9,352కు చేరింది. ప్రస్తుతం వివిధ ఆస్పత్రుల్లో 8,048 మంది చికిత్స పొందుతుండగా.. 979 మంది డిశ్చార్జి అయ్యారని పేర్కొంది. దేశంలో ముఖ్యంగా మహారాష్ట్రలో కరోనా వైరస్‌ తీవ్రత ఎక్కువగా ఉంది. మహారాష్ట్రలో ఇప్పటికే దాదాపు 2 వేల మంది కరోనా బారిన పడ్డారు.