ప్రపంచ ఆరోగ్య సంస్థకు ట్రంప్ షాక్..
న్యూఢిల్లీ, ఏప్రిల్ 15
అమెరికాలో కరోనా వైరస్ విజృంభిస్తోంది. ఇప్పటికే అక్కడే వైరస్ బారిన పడి వేలమంది చనిపోయారు. దీంతో ట్రంప్ గత కొన్ని రోజులుగా ప్రపంచ ఆరోగ్య సంస్థపై విమర్శలు చేస్తూ వస్తున్నారు. ఈ నేపథ్యంలోనే ఆయన మరో కీలక నిర్ణయం తీసుకున్నారు. ప్రపంచ ఆరోగ్య సంస్థ(WHO)కు నిధులు అందజేసే విషయంలో అమెరికా అధ్యక్షుడు డొనాల్డ్‌ ట్రంప్‌ అన్నంత పని చేశారు. తమ దేశం నుంచి సంస్థకు అందించే నిధుల్ని పూర్తిగా నిలిపివేయాలని అధికారుల్ని ఆదేశించారు. మరోవైపు కరోనా వైరస్‌ ముప్పుపై ప్రపంచాన్ని హెచ్చరించడంలో డబ్ల్యూహెచ్‌ఓ విఫలమైందన్న ఆరోపణలపై సమీక్ష నిర్వహిస్తున్నామన్నారు. తొలినాళ్లలో వైరస్‌ వ్యాప్తిని డబ్ల్యూహెచ్‌ఓ కావాలనే కప్పిపుచ్చిందన్నది ట్రంప్‌ ఆరోపిస్తున్నారు.కరోనా విషయంలో ప్రపంచ ఆరోగ్య సంస్థ చైనాకు పక్షపాతిగా వ్యవహరించిందని ఆయన మొదటి నుంచి ఆరోపిస్తున్నారు. డబ్ల్యూహెచ్‌ఓ బాధ్యతాయుతంగా నడుచుకునేలా ఆదేశించే హక్కు సంస్థకు అత్యధిక నిధులు అందిస్తున్న అమెరికాకు ఉందని ట్రంప్‌ వ్యాఖ్యానించారు. చైనా సహా ఇతర దేశాల ప్రయాణాలపై ఆంక్షలు విధించడాన్ని వ్యతిరేకించడం డబ్ల్యూహెచ్‌ఓ తీసుకొన్న 'అత్యంత వినాశకరమైన' నిర్ణయమన్నారు ట్రంప్.అమెరికా తీసుకున్న చాలా నిర్ణయాల్ని డబ్ల్యూహెచ్‌ఓ వ్యతిరేకించిందని ఈ సందర్భంగా ట్రంప్‌ చెప్పకొచ్చారు. కానీ, డబ్ల్యూహెచ్‌ఓతో ఏకీభవించని తాను చైనా ప్రయాణాలపై ఆంక్షలు అమలు చేశామని తెలిపారు. తద్వారా చెప్పలేనంత మంది ప్రాణాల్ని రక్షించామన్నారు. అంతర్జాతీయ స్థాయిలో అనారోగ్య ముప్పు తలెత్తినప్పుడు ప్రపంచ దేశాలూ సరైన సమాచారం కోసం డబ్ల్యూహెచ్‌ఓపై ఆధారపడతాయని గుర్తుచేశారు. కానీ, సంస్థ మాత్రం ఈ కనీస బాధ్యతను నిర్వర్తించడంలో విఫలమైందని ట్రంప్ ఆరోపించారు.