కరోనా వేళ ముద్దుల పోటీ
బీజింగ్, ఏప్రిల్ 21
ఓ వైపు కరోనా వైరస్ ప్రపంచంలో కరతాళ నృత్యం చేస్తుంటే.. మీకు ముద్దులు కావాల్సి వచ్చిందా? అంటూ ఆ పోటీలు నిర్వహించిన సంస్థను అంతా తిట్టిపోస్తున్నారు. ఔను నిజం, చాలా రోజులు లాక్‌డౌన్‌తో మూసి ఉన్న ఓ ఫర్నీచర్ ఫ్యాక్టరీని ఇటీవలే మళ్లీ తెరిచారు. ఈ సందర్భంగా ఆ సంస్థ తమ వినియోగదారులను ఆకట్టుకొనేందుకు ముద్దుల పోటీలను నిర్వహించింది.ఈ పోటీ గురించి వినగానే ప్రజలు ఆశ్చర్యపోయారు. కరోనా వైరస్ నేపథ్యంలో ప్రజలు భౌతిక, సామాజిక దూరాన్ని పాటిస్తుంటే.. ఇదేం పోయేకాలం అని తిట్టుకున్నారు. కొందరైతే ‘‘కరోనా లేదు కొత్తిమీర కట్టా లేదు’’ అనుకుంటూ ఈ పోటీల్లో పాల్గొన్నారు. ఏ మాత్రం సంకోచం లేకుండా తమ మూతికి ఉన్న మాస్కును పక్కకు తీసి తమ పార్టనర్ అదరాలను అందుకున్నారు. తనివితీరా ముద్దుపెట్టుకున్నారు. కానీ, ఇక్కడే ఓ ట్విస్టు ఉంది.కరోనా వైరస్ నేపథ్యంలో దగ్గినా, తుమ్మునా వైరస్ సెకన్లలో ఇతరులకు సోకుతుందనే విషయం తెలిసిందే. మరి ముద్దు పెట్టుకుంటే అంతకంటే వేగంగానే శరీరంలోకి వెళ్లిపోతుంది. మరి, ఆ పోటీలో ముద్దు పెట్టుకున్నవాళ్లకు కరోనా సోకదా అనే సందేహం మీకు వచ్చే ఉంటుంది. పైగా, అలాంటి పోటీలు పెడితే పోలీసులు కూడా చుక్కలు చూపిస్తారు. అందుకే, ఆ ముద్దుల పోటీల నిర్వాహకుడు ఓ షరతు విధించాడు.ఆ జంటల మధ్యలో ఓ అద్దాన్ని పెట్టి ఒకరినొకరు తాకకుండా ముద్దులు పెట్టుకోవాలని సూచించాడు. దీంతో ఆ జంటలు నేరుగా పెదాలను తాకకుండా మధ్యలో ఉన్న అద్దానికే ముద్దు పెట్టారు. సుజౌవూలోని ‘యూయా’ అనే ఫర్నీచర్ ఫ్యాక్టరీలో జరిగిన ఈ ముద్దుల పోటీల్లో 10 జంటలు పాల్గొన్నాయి. ఇందులో ఆ ఫ్యాక్టరీ ఉద్యోగులు, భార్యభర్తలు పాల్గొన్నారు.ఈ సందర్భంగా ఫ్యాక్టరీ యజమాని మా మాట్లాడుతూ.. ‘‘కరోనా వైరస్ సోకకుండా పోటీదారుల మధ్యలో అద్దాన్ని పెట్టాం. ఇందులో పాల్గొన్న వారిలో ఎక్కువమంది మా ఫ్యాక్టరీలో పనిచేసే పెళ్లయిన ఉద్యోగులే. కరోనా వైరస్ వల్ల ప్రతి ఒక్కరూ భయాందోళనతో గడిపారు. ఇలాంటి పోటీలు పెట్టడం వల్ల వారిలో ధైర్యం కలిగి, ఎలాంటి ఒత్తిడి లేకుండా పని చేస్తారనే ఉద్దేశంతోనే ఈ పోటీ నిర్వాహించాం’’ అని తెలిపాడు. అయితే, ఈ ఫొటోలు చూసిన చాలామంది ఇలా చేయడం మంచిది కాదని మండిపడుతున్నారు.