ర్యాపిడ్ టెస్ట్ లలో తప్పుడు ఫలితాలు
నిలిపివేయాలని ఆదేశం
న్యూఢిల్లీ, ఏప్రిల్ 21
హాట్‌‌స్పాట్‌లలో కరోనా కేసులను త్వరిగతిన గుర్తించడం కోసం ఏపీ, ఛత్తీస్‌గఢ్ తదితర రాష్ట్రాలు ర్యాపిడ్ టెస్టింగ్ కిట్లను భారీ స్థాయిలో కొనుగోలు చేస్తున్నాయి. రాజస్థాన్ ప్రభుత్వం కూడా శుక్రవారం నుంచి ర్యాపిడ్ టెస్టింగ్ కిట్ల వాడాకాన్ని ప్రారంభించింది. కానీ తప్పుడు ఫలితాలు వస్తుండటంతో వాటి వాడకాన్ని రాజస్థాన్ నిలిపేసింది. ర్యాపిడ్ కిట్లు సరైన ఫలితం ఇవ్వడం లేదని ఇండియన్ మెడికల్ కౌన్సిల్ ఆఫ్ మెడికల్ రీసెర్చ్ (ఐసీఎంఆర్)కు ఆ రాష్ట్రం సమాచారం ఇచ్చింది. దీంతో ఐసీఎంఆర్ ర్యాపిడ్ టెస్టు కిట్లను రెండు రోజులు వాడొద్దని సూచించింది.ర్యాపిడ్ కిట్లు 90 శాతం కచ్చితమైన ఫలితాన్ని ఇస్తాయని అంచనా వేస్తుండగా.. కేవలం 5.4 శాతం మాత్రమే కచ్చితమైన ఫలితాన్ని ఇస్తున్నాయని రాజస్థాన్ ఆరోగ్య మంత్రి రఘు శర్మ తెలిపారు. ర్యాపిడ్ కిట్ల కచ్చితత్వం గురించి రాజస్థాన్ ప్రభుత్వం మెడిసిన్, మైక్రోబయాలజీ విభాగాధిపతులతో ఓ కమిటీని ఏర్పాటు చేసింది. సవాయ్ మాన్‌సింగ్ ప్రభుత్వ హాస్పిటల్‌లోని కిట్లను పరిశీలించిన ఈ కమిటీ వాటి ఫలితాలు 5.4 శాతం మాత్రమే కచ్చితత్వంతో ఉన్నాయని తెలిపింది. ఈ కమిటీ సలహా మేరకు ర్యాపిడ్ టెస్టింగ్ కిట్ల వాడకాన్ని ఆపేశామని రాజస్థాన్ మంత్రి తెలిపారు.ర్యాపిడ్ టెస్టింగ్ కిట్ల ద్వారా 168 పరీక్షలు నిర్వహించాయని మంత్రి చెప్పారు. కరోనా వచ్చిందని పీసీఆర్ బేస్డ్ టెస్టుల్లో తేలిన వారికి ర్యాపిడ్ కిట్లను ఉపయోగించి పరీక్షలు నిర్వహించగా.. నెగటివ్ అని రిపోర్ట్ వచ్చింది. దీంతో రాజస్థాన్ ప్రభుత్వ వర్గాలు షాకయ్యాయి. ఐసీఎంఆర్ స్పందన తమకు అనుకూలంగా వస్తే.. వాటిని వెనక్కి పంపిస్తామని రాజస్థాన్ ప్రభుత్వం తెలిపింది.రాజస్థాన్‌లో ముందుగా జైపూర్ నుంచి ర్యాపిడ్ కిట్ల వాడకాన్ని ప్రారంభించారు. రక్త నమూనాలను సేకరించి ర్యాపిడ్ టెస్టింగ్ కిట్ల ద్వారా పరీక్షలు నిర్వహిస్తారు. హాట్ స్పాట్‌లలో అనుమానితులకు ర్యాపిడ్ కిట్ల ద్వారా టెస్టులు చేయడం ద్వారా స్క్రీనింగ్ తేలికవుతుంది. ర్యాపిడ్ టెస్టుల్లో పాజిటివ్ అని తేలిన వారికి పీసీఆర్ టెస్టు చేసి మరోసారి ధ్రువీకరించుకోవాల్సి ఉంటుంది.