మళ్లీ డ్రాగన్ పై ట్రంప్ ఫైర్ఁ
న్యూయార్క్, ఏప్రిల్ 22
కరోనా వైరస్ విషయంలో ముందు నుంచీ చైనాపై కారాలు మిరియాలు నూరుతున్న అమెరికా అధ్యక్షుడు డొనాల్డ్ ట్రంప్.. డ్రాగన్‌కు మరోసారి ఘాటు హెచ్చరికలు పంపారు. తమతో కుదుర్చుకున్న తొలిదశ వాణిజ్య ఒప్పందానికి కట్టుబడి ఉండాలని ఉద్ఘాటించారు. కరోనా వైరస్‌ వ్యాప్తి నెపంతో తప్పించుకుంటే ఒప్పందాన్ని పూర్తిగా రద్దుచేసుకుంటామని హెచ్చరించారు. ఏడాదిన్నర పాటు ఇరుదేశాల మధ్య జరిగిన వాణిజ్య యుద్ధానికి జనవరిలో తెరదించుతూ తొలిదశ వాణిజ్య ఒప్పందంపై చైనా, అమెరికాలు సంతకం చేసిన విషయం తెలిసిందే. దీంతో అగ్రరాజ్యాలు పోటాపోటీగా పెంచిన సుంకాల పరంపరకు తెరపడింది.కానీ, కొవిడ్‌-19 విజృంభణ నేపథ్యంలో లాక్‌డౌన్‌లు విధించడంతో ప్రపంచవ్యాప్తంగా ఆర్థిక వ్యవస్థలు కుప్పకూలుతున్నాయి. చైనా సైతం తీవ్ర సంక్షోభాన్ని ఎదుర్కొంటోంది. దీంతో ఒప్పందం అమలును చైనా జాప్యం చేసే అవకాశం ఉందని భావించిన ట్రంప్‌ ఆ దేశానికి ముందుగానే హెచ్చరికలు జారీ చేశారు. కరోనా వైరస్‌ వ్యాప్తి విషయంలో అమెరికా, చైనాల మధ్య మాటల యుద్దం కొనసాగుతోన్న విషయం తెలిసిందే.వుహాన్ ల్యాబ్‌లోనే కరోనా వైరస్ పురుడుపోసుకుందని అమెరికా ఆరోపిస్తే.. అమెరికా సైనికుల ద్వారానే తమ దేశంలోకి కోవిడ్-19 ప్రవేశించిందని డ్రాగన్ సైతం ఓ దశలో ఆరోపించింది. వుహన్ ల్యాబ్‌లోనే పుట్టిందనేది నిజమైతే చైనాపై చర్యలు తీసుకోడానికి వెనుకాడబోమని ట్రంప్ వార్నింగ్ ఇచ్చారు. ఈ తరుణంలో ట్రంప్‌ వాణిజ్య ఒప్పందాన్ని తెర మీదకు తీసుకురావడం ప్రాధాన్యత సంతరించుకుంది. ఒకవేళ ఒప్పందమే రద్దయితే తిరిగి వాణిజ్య యుద్ధం మళ్లీ ప్రారంభమవుతుందనే అభిప్రాయాలు వ్యక్తమవుతున్నాయి.ఒప్పందం ప్రకారం.. 200 బిలియన్‌ డాలర్ల విలువచేసే అమెరికా ఉత్పత్తుల్ని చైనా కొనుగోలు చేయాల్సి ఉంది. దీన్ని తప్పకుండా కొనసాగించాలని ట్రంప్‌ కోరుతున్నారు. కానీ, కరోనా వైరస్ సంక్షోభం నేపథ్యంలో ఒప్పందంలోని ఓ కీలక నిబంధనను చైనా తెర మీదకు తెచ్చే అవకాశం ఉందని ‘యూఎస్‌-చైనా ఎకనామిక్‌ అండ్‌ సెక్యూరిటీ రివ్యూ కమిషన్‌’ ఓ నివేదికలో అభిప్రాయపడింది.ఆ నిబంధన ప్రకారం.. ప్రకృతి విపత్తు లేదా అనుకోని సంక్షోభం ఎదురైతే తిరిగి కొత్త వాణిజ్య ఒప్పందానికి ప్రతిపాదించొచ్చు. కానీ, అదే జరిగితే ఒప్పందాన్నే రద్దు చేసుకుంటామని ట్రంప్‌ హెచ్చరిస్తున్నారు. ఒకవేళ అదే జరిగితే వాణిజ్య ఒప్పందాన్నే రద్దు చేసుకుని ఏం చేయాలో అది చేస్తాం. చైనాపై నా కంటే కఠినంగా ఎవరూ వ్యవహరించలేరని ట్రంప్‌ ఘాటు వ్యాఖ్యలు చేశారు.తొలి ఏడాది 200 బిలియన్ డాలర్లు, తర్వాత 300 బిలియన్ డాలర్లు, 400 బిలియన్ డాలర్లు, 500 బిలియన్ డాలర్ల విలువైన ఉత్పత్తులను కొనుగోలుచేయాలి.. దీనిపై చైనాతో ఒప్పందం కుదిరింది. చైనాతో 2018లో ట్రంప్ వాణిజ్య యుద్ధానికి తెరతీశారు. అమెరికా నుంచి తమ దిగుమతులను 2017 స్థాయితో పోల్చితే కనీసం 20 వేల కోట్ల డాలర్లు పెంచేందుకు చైనా అంగీకరించింది. వ్యవసాయ రంగ కొనుగోళ్లు 3200 కోట్ల డాలర్లు, తయారీరంగంలో 7,800 కోట్ల డాలర్లు, ఇంధన రంగంలో 5,200 కోట్ల డాలర్లు, సేవారంగ దిగుమతులు 3,800 కోట్ల డాలర్లకు పెంచుతామని చైనా చెప్పింది.