బుద్ధపౌర్ణమి రోజున సూపర్ మూన్
హైద్రాబాద్, మే 5
ఈ ఏడాది ఖగోళ విశేషాల పరంపర కొనసాగుతోంది. ఇప్పటికే మూడు సార్లు దర్శనమిచ్చిన ‘సూపర్‌ మూన్‌’.. మరో రెండు రోజుల్లో నాలుగోసారి కనువిందు చేయనుంది. మే 7న బుద్ధ పూర్ణిమ రోజు భారత కాలమాన ప్రకారం సాయంత్రం 4.15 గంటల సమయంలో చందమామ భూమికి మరింత చేరువగా రానుంది. నాసా వివరాల ప్రకారం.. మే 5 నుంచి 8వ తేదీ ఉదయం వరకు చంద్రుడు పూర్తిగా దర్శనమిస్తాడు. ఈ ఫుల్‌ మూన్‌ను సూపర్‌ ఫ్లవర్‌ మూన్‌, కార్న్‌ ప్లాంటింగ్‌ మూన్‌, మిల్క్‌ మూన్‌, ది వేశాక్‌ ఫెస్టివల్‌ మూన్‌గానూ పిలుచుకుంటారు. ఈ ఏడాదిలో ఇదే చివరి సూపర్‌ మూన్‌ అని శాస్త్రవేత్తలు చెబుతున్నారు. తిరిగి 2021 ఏప్రిల్ 27 సూపర్ పింక్ మూన్‌ దర్శనం ఇవ్వనుంది.సూపర్ మూన్ అంటే భూమికి చంద్రుడు అత్యంత సమీపంగా రావడం. గత నెలలో సూపర్ పింక్ మూన్ (భారీ గులాబీ చందమామ) కనువిందు చేసింది. చంద్రుడు.. భూమికి అత్యంత సమీపంగా రావడంతో ఇలాంటి అద్బుతాలు చోటుచేసుకుంటాయి. సాధారణంగా భూమికీ.. చందమామకీ మధ్య దూరం 384,000 కిలోమీటర్లు. కొన్ని సందర్భాల్లో ఈ దూరం తగ్గుతుంది. ఈ ఏడాది ఏప్రిల్‌లో ఏర్పడిన సూపర్ పింక్ మూన్ సందర్భంగా.. భూమికి, చంద్రుడికి మధ్య దూరం 356,000 కి.మీ.గా ఉంది.భూమికి చాలా దగ్గరగా రావడంతో చంద్రుడు అత్యంత ప్రకాశవంతంగా కనిపిస్తాడు. ఇలాంటి పింక్ మూన్... ఈ ఏడాది వరుసగా నాలుగుసార్లు దర్శనం ఇవ్వడం విశేషం. ఫిబ్రవరి, మార్చి, ఏప్రిల్‌లో వచ్చింది. ఇలాంటి సమయంలో చంద్రుడు 14 శాతం పెద్దగా కనిపిస్తాడు. అలాగే రోజూ కంటే... 30 శాతం ఎక్కువ ప్రకాశవంతంగా ఉంటుంది. యూనివర్సిల్ సమయం ప్రకారం.. మే 7 ఉదయం 10.45 గంటలకు చంద్రుడు.. భూమికి అత్యంత సమీపంగా రానున్నట్టు ఖగోళ శాస్త్రవేత్తలు తెలియజేశారు. సాయంత్రం వేళ నారింజ వర్ణంలో చంద్రుడు దర్శనమిస్తాడు.చంద్ర గ్రహణం, బ్లడ్ మూన్, సూపర్ మూన్.. ఈ మూడూ ఒకేరోజు వస్తే దాన్నే సూపర్ బ్లూ బ్లడ్ మూన్ అని పిలుస్తారు. ఒకే నెలలో రెండుసార్లు పౌర్ణమి వస్తే దాన్ని బ్లూమూన్ అంటారు. భూమికి దగ్గరగా చంద్రుడు వస్తే దాన్ని సూపర్ మూన్ అంటారు. చందమామ సాధారణం కంటే 7 శాతం పెద్దగా, 15 శాతం ప్రకాశవంతంగా కనిపిస్తే దాన్ని సూపర్ మూన్‌ అంటారు. 2018 జనవరిలో సూపర్ బ్లడ్ మూన్ వచ్చింది. అప్పుడు తెలుగు రాష్ట్రాల ప్రజలు కూడా చాలామంది దీన్ని చూశారు