పెట్టుబడుల వేటలో కేటీఆర్
హైద్రాబాద్, మే 7
టీఎస్‌ ఐపాస్‌ ద్వారా సులభతర వాణిజ్యంలో తెలంగాణలో నిర్దిష్ట ప్రమాణాలు నెలకొల్పామని మంత్రి కేటీఆర్ అన్నారు. ఆయన గురువారం ఐరోపా దేశాల రాయబారులతో వీడియో కాన్ఫరెన్స్‌ నిర్వహించారు. ఐరోపాలోని వివిధ దేశాల రాయబారులు, ప్రముఖ కంపెనీల సీనియర్‌ ప్రతినిధులు ఈ సమావేశంలో పాల్గొన్నారు. కరోనా వైరస్ అనంతరం పరిశ్రమలపై పడే ప్రభావం, భవిష్యత్తు అవకాశాలపై ఈ భేటీలో చర్చించారు. తెలంగాణలోని ప్రగతిశీల పారిశ్రామిక విధానాన్ని ఈ సందర్భంగా మంత్రి వారికి వివరించారు. తెలంగాణలో పారిశ్రామిక అనుకూల వాతావరణం ఉందని.. రాష్ర్టాల్లోని అనుకూల పరిస్థితులను గమనించాలని వారిని కోరారు. విదేశీ పెట్టుబడులు ఆకర్షించేందుకు పారిశ్రామిక వర్గాలతో మంత్రి ఈ సమావేశం నిర్వహించారు.గత ఐదు సంవత్సరాల్లో టీఎస్ ఐపాస్ విధానం ద్వారా సుమారు 13 వేల కంపెనీలకు అనుమతులు ఇచ్చినట్లు కేటీఆర్ గుర్తు చేశారు. ఇక్కడి ప్రభుత్వ పరిపాలన, విధానాల వల్ల ప్రస్తుతం తెలంగాణ దేశంలోనే అత్యుత్తమ పెట్టుబడి గమ్యస్థానాల్లో ఒకటిగా ఉందని చెప్పారు. ఇన్నోవేషన్ ఈకో సిస్టమ్ కోసం టీ హబ్, వి హబ్, టీ వర్క్స్ వంటి వాటిని ప్రారంభించామని, తెలంగాణ అకాడమీ ఆఫ్ నాలేజ్ అండ్ స్కిల్ (టాస్క్) ద్వారా నైపుణ్య శిక్షణ అభివృద్ధి కోసం తెలంగాణ ప్రత్యేక విధానంలో ముందుకు పోతున్నామని స్పష్టం చేశారు. తెలంగాణలో ప్రస్తుతం అగ్రస్థానంలో ఉన్న ఫార్మా, లైఫ్ సైన్సెస్, ఐటీ, డిఫెన్స్ అండ్ ఏరోస్పేస్, టెక్స్‌టైల్ వంటి రంగాల్లో పెట్టుబడి అవకాశాలను పరిశీలించాలని వివిధ పరిశ్రమల ప్రతినిధులను మంత్రి కోరారు.పారిశ్రామిక విధానంలో తెలంగాణ ప్రభుత్వ విధానాలు ప్రపంచ ప్రమాణాలకు ఏమాత్రం తీసిపోవని, గత ఐదేళ్లుగా ఇక్కడి ప్రభుత్వం సాధించిన విజయాలను ప్రపంచవ్యాప్తంగా వినిపించాల్సిన అవసరం ఉందని మంత్రి అభిప్రాయపడ్డారు. తమ విధానాల ద్వారా పారిశ్రామిక అనుమతుల విషయంలో అవినీతి లేకుండా పూర్తి స్థాయి పారదర్శకతకు అవకాశం లభించిందని మంత్రి అన్నారు