వూహాన్ లో కోటి మందికి కరోనా పరీక్షలు
బీజింగ్, మే 13,
ప్రపంచంలోనే తొలిసారిగా కరోనా వైరస్ చైనాలోని హుబే ప్రావిన్సుల్లోని వుహాన్ నగరంలో వెలుగుచూసింది. డిసెంబరులో మొల్లగా మొదలైన మహమ్మారి ప్రపంచంలోని 212 దేశాలకు ప్రస్తుతం వ్యాపించింది.కరోనా వైరస్‌కు మూల కేంద్రమైన చైనాలోని వుహాన్ నగరంలో మహమ్మారిని కట్టడిచేయడానికి 76 రోజుల పాటు లాక్‌డౌన్ విధించగా.. ఏప్రిల్ 8న దీనిని ఎత్తివేసిన విషయం తెలిసిందే. ఆంక్షల సడలించిన తర్వాత కొన్ని వారాలు కొత్తగా పాజిటివ్ కేసులు నమోదుకాలేదు. అయితే, ఆదివారం, సోమవారం రెండు రోజుల్లో కొత్తగా ఆరుగురికి వైరస్ నిర్ధారణ కావడంతో మరోసారి కలవరం మొదలయ్యింది. దీంతో నగరంలోని మొత్తం జనాభాకు కరోనా వైరస్ నిర్ధారణ పరీక్షలు చేయనున్నట్టు చైనా అధికారికి మీడియా  ప్రకటించింది.నగరంలోని 11 మిలియన్ల మంది ప్రజలకు న్యూక్లియిక్ యాసిడ్ పరీక్షలను నిర్వహించడానికి తగిన ప్రణాళికలను సిద్ధం చేసి, సమర్పించాలని అధికారులను ప్రభుత్వం ఆదేశించింది. ప్రతి జిల్లాలోనూ 10 రోజుల్లోగా ప్రతి ఒక్కరికీ కరోనా నిర్ధారణకు న్యూక్లియక్ యాసిడ్ పరీక్షల ప్రణాళిక, ఏర్పాట్లును చేయాలని నోటీసులో పేర్కొన్నారు. అయితే, ఈ పరీక్షలను ఎప్పుడు ప్రారంభిస్తారో మాత్రం స్పష్టత లేదు.డాంగ్జూహు జిల్లాల్లో కొత్తగా ఆరుగురు వైరస్ బారినపడ్డారు. అయితే, కరోనా నిర్ధారణ పరీక్షల నిర్వహణకు సంబంధించిన ఎలాంటి ఆదేశాలు, ఉత్తర్వులు అందలేదని ఆ జిల్లా అధికార యంత్రాంగం పేర్కొంది. అయితే, వుహాన్‌లోని ప్రతి ఒక్కరికీ కరోనా నిర్దారణ పరీక్షలు నిర్వహించాల్సిన అవసరంలేదని చైనా సెంటర్ ఫర్ డిసీజ్ కంట్రోల్ అండ్ ప్రివెంటివ్ చీఫ్ ఎపిడిమియాలజిస్ట్ వు జున్‌యూ వ్యాఖ్యానించారు. కేసుల్లేని ప్రాంతాల్లోని వ్యక్తులకు పరీక్షలు అవసరంలేదని పేర్కొన్నారు.కరోనా వైరస్‌కు మూలకేంద్రమైన చైనా.. మహమ్మారి అదుపులోకి తెచ్చింది. అయితే, దేశవ్యాప్తంగా లాక్‌డౌన్‌లు, ఆంక్షలను ఎత్తివేసినందున రెండో దశలో మహమ్మారి పంజా విసిరే పరిస్థితి నెలకుందని చైనా భావిస్తోంది. రష్యా సరిహద్దులోని ఈశాన్య ప్రావిన్సులైన జిలిన్, హీలాంగ్జియాంగ్లీ కరోనా క్లస్టర్స్ ఇటీవలి వెలుగుచూశాయి. పలు దేశాలలో వైరస్ తీవ్రత ఎక్కువగా ఉండటంతో విదేశీయులు దేశంలోకి ప్రవేశించడాన్ని చైనా నిషేధించింది.కొత్తరకం ప్రాణాంతక కరోనావైరస్ గతేడాది డిసెంబరులో తొలిసారి వుహాన్ నగరంలో వెలుగుచూడగా.. అక్కడ 3,869 మంది ప్రాణాలు కోల్పోయారు. చైనాలో అత్యధికంగా ఇక్కడే మరణాలు చోటుచేసుకున్నాయి. నగరంలో సముద్ర ఉత్పత్తుల మార్కెట్‌లోనే వైరస్ జంతువుల నుంచి మానవులకు వ్యాపించినట్టు శాస్త్రవేత్తలు భావిస్తున్నారు