జూన్ 3 నుంచి ఇంటర్ పరీక్ష
హైద్రాబాద్, మే 14,
కరోనా, లాక్‌డౌన్‌ కారణంగా స్కూళ్లు, కాలేజీలు, పరీక్షలు వాయిదా పడిన సంగతి తెలిసిందే. అయితే ఇప్పుడిప్పుడు పరిస్థితులు కొంచెం కుదుట పడిన నేపథ్యంలో వాయిదా పడిన పరీక్షలను నిర్వహించడానికి సంబంధిత బోర్డులు సిద్ధమవుతున్నాయి. ఈ నేపథ్యంలో తెలంగాణలో వాయిదా పడిన రెండు  ఇంటర్మీడియట్‌ పరీక్షలను నిర్వహించడానికి తెలంగాణ ఇంటర్మీడియట్‌ బోర్డు ఏర్పాట్లు చేస్తోంది. ఈరోజు తేదీలను కూడా ప్రకటించింది.జూన్‌ 3న ఇంటర్మీడియట్‌ రెండో సంవత్సరం జాగ్రఫీ, మోడరన్‌ లాంగ్వేజ్‌ పరీక్షలు జరుగుతాయని ఇంటర్ బోర్డు కార్యదర్శి జలీల్‌ ఓ ప్రకటనలో తెలిపారు. 3వ తేదీ ఉదయం 9 గంటల నుంచి 12 గంటల వరకు పరీక్షలు ఉంటాయని వెల్లడించారు. పాత హాల్‌టికెట్లతోనే.. గతంలో కేటాయించిన పరీక్ష కేంద్రాల్లోనే పరీక్షలు జరుగుతాయని తెలిపారు. వాస్తవానికి ఈ పరీక్షలు మార్చి 23న జరగాల్సి ఉండగా కరోనా, లాక్‌డౌన్‌తో ఈ పరీక్షలు వాయిదా పడ్డాయి.856 మంది ఇంటర్మీడియెట్‌ విద్యార్థులకు రెండు పరీక్షలు మిగిలిపోయాయని వాటి తేదీలను త్వరలో ప్రకటిస్తామని ఇటీవల తెలంగాణ విద్యాశాఖ మంత్రి సబితా ఇంద్రా రెడ్డి తెలిపిన విషయం తెలిసిందే. పదో తరగతికి సంబంధించిన 8 పరీక్షల నిర్వహణ కోసం కోర్టు అనుమతి తప్పనిసరి అని, అందుకు కోర్టుకు అఫిడవిడ్‌ దాఖలు చేస్తామని కూడా ఆమె తెలిపారు. పదో తరగతి విద్యార్థులు పరీక్షలకు సిద్ధంగా ఉండాలని తెలిపారు