జూన్ 15 నుంచి ఐస్లాండ్ టూర్
న్యూఢిల్లీ, మే 20
వేసవిలో ప్రపంచ వ్యాప్తంగా చాలా మంది పర్యాటకులు ఐస్లాండ్ దేశానికి వెళ్లాలని అనుకుంటారు. ఎందుకంటే అక్కడ సూర్యుడు అస్తమించని రోజులను చూడవచ్చు. పర్యాటకులకు ఈ అద్భుతమైన అవకాశాన్ని అందించేందుకు ఆ దేశ ప్రభుత్వం కూడా అన్ని ఏర్పాట్లు చేస్తుంది.కరోనా వైరస్ మహమ్మారి కారణంగా ప్రపంచ వ్యాప్తంగా అన్ని దేశాల్లో పర్యాటక పరిశ్రమ తీవ్రంగా దెబ్బతిన్న విషయం తెలిసిందే. ఈ వైరస్ బారి నుండి ఇప్పుడిప్పుడే కోలుకుంటున్న దేశాలు మరలా పర్యాటక రంగాన్ని ప్రోత్సహించే దిశగా అడుగులు వేస్తున్నాయి. ఈ జాబితాలో ఐస్లాండ్ దేశం కూడా ఉంది. జూన్ 15 లోగా సరిహద్దులను తెరిచి పర్యాటకులను స్వాగతించాలని యోచిస్తున్నట్లు ఆ దేశ ప్రభుత్వం ప్రకటించింది. యూఎస్ఏ తో సహా ప్రపంచవ్యాప్తంగా ఉన్న ప్రయాణీకులను స్వాగతించడానికి ఐస్లాండ్ సన్నద్ధమవుతుంది. అంతేకాకుండా విమానాశ్రయానికి వచ్చిన తరువాత ప్రయాణికులకు కరోనా వైరస్ పరీక్షలు కూడా నిర్వహించేందుకు అన్ని ఏర్పాట్లు చేయాలని నిర్ణయించినట్లు ఆ దేశ ప్రధాని చెప్పారు.పరీక్షల తరువాత నెగిటివ్ రిజల్ట్స్ వచ్చిన వారు దేశంలోకి ప్రవేశించడమే కాకుండా ఐస్లాండ్ యొక్క అందాలను ఆస్వాదించవచ్చు. కానీ పాజిటివ్ వచ్చిన పర్యాటకులు మాత్రం 14 రోజుల పాటు స్వీయ నిర్బంధానికి వెళ్లాల్సి ఉంటుంది. ఏదేమైనా ప్రతి పర్యాటకుడు కూడా ఇక్కడికి పర్యటనకు వచ్చేటప్పుడు రాక్నింగ్ సి-19 అనే ట్రేసింగ్ యాప్ ను తమ స్మార్ట్ ఫోన్లలో డౌన్ లోడ్ చేసుకోవాల్సి ఉంటుంది. ఇది మరిన్ని కేసులను నిరోధించడంలో సహాయపడుతుంది. అదే విధంగా అత్యవసర పరిస్థితుల్లో అధికారులు కూడా వీరిని సంప్రదించేందుకు వీలుగా ఉంటుంది.దేశంలో అంతర్జాతీయ పర్యాటకుల రాకపోకలను పరిమితం చేసిన రెండు నెలల లోపే పర్యాటకాన్ని తిరిగి అనుమతించేందుకు ప్రకటన ఇవ్వడం విశేషం. ఇక్కడ పాజిటివ్ కేసుల సంఖ్య తక్కువగా ఉన్నందున ఐస్లాండ్ దేశం పర్యాటక కార్యకలాపాలను తిరిగి ప్రారంభించేందుకు నిర్ణయం తీసుకుంది. ఐస్లాండ్ యొక్క విదేశీ వ్యవహారాల మంత్రిత్వ శాఖ ప్రకారం మే నెలలో పరిస్థితిని క్షుణ్ణంగా పరిశీలించి జూన్ 15 లోగా అన్ని పర్యాటక గమ్యస్థానాలను సురక్షితంగా మార్చి టూరిస్టులను ఆహ్వానించేందుకు కసరత్తు చేస్తున్నారు.ప్రయాణ పరిమితులు జూన్ 15 వరకు ఉంటాయని, మే 15 నుండి ఐస్లాండ్ చేరుకున్న శాస్త్రవేత్తలు, చిత్ర నిర్మాతలు, మరియ అథ్లెట్లతో సహా కొంత మంది నిపుణులు సవరించిన నిర్భందానికి అర్హులు అని ప్రధాని తన ప్రకటనలో తెలిపారు. అధికారిక వైద్య పత్రాలతో తాము ఆరోగ్యంగా ఉన్నామని నిరూపించగలిగే వ్యక్తులు మరో కరోనా వైరస్ పరీక్ష చేయించుకోవాల్సిన అవసరం లేదని ప్రభుత్వం తెలిపింది.అన్నీ సక్రమంగా జరిగితే వేసవిలో ఈ దేశాన్ని చూడాలనుకునే, నిజంగా పర్యటించాలనుకునే టూరిస్టులకు ఒక గొప్ప అవకాశం లభించినట్లే అని ఐస్లాండిక్ ట్రావెల్ ఇండస్ట్రీ అసోసియేషన్ ఛైర్మన్ జార్న్ హీర్ హాల్స్డోట్టిర్ అభిప్రాయపడ్డారు.ప్రస్తుతానికి ఐస్లాండ్ దేశ జనాభా 3,54,000 కోట్లుగా ఉంటుంది. ఇందులో 1803 మందికి కరోనా వైరస్ పాజిటివ్ కేసులు నమోదు కాగా ఇప్పటి వరకూ 1786 మంది కోలుకున్నారు. వైరస్ కారణంగా 10 మంది ప్రాణాలు కోల్పోయారు.