ఏపీకి షాకేలే... షాకులు
హైద్రాబాద్, మే 20
పోతిరెడ్డిపాడు సామర్థ్యం పెంచే విషయంలో జగన్ సర్కారు పట్టుదలతో ఉండటం.. ఏపీ, తెలంగాణ మధ్య నీటి వివాదానికి దారి తీసిన సంగతి తెలిసిందే. గోదావరి నుంచి జలాలను తరలించుకెళ్లి.. రాయలసీమ కరువు తీర్చాలని కేసీఆర్ సూచిస్తున్నారు. కానీ జగన్ మాత్రం పోతిరెడ్డిపాడు ద్వారా శ్రీశైలం జలాలను భారీ ఎత్తున తీసుకెళ్లి సీమ గొంతు తడపాలని చూస్తున్నారు. ఇది నచ్చని తెలంగాణ సర్కారు కృష్ణా బోర్డును ఆశ్రయించింది. దీంతో ఏపీ సర్కారు కూడా కాళేశ్వరం ప్రాజెక్ట్, కృష్ణా నది మీద తెలంగాణ చేపడుతున్న ఇతర ప్రాజెక్టులపై ఫిర్యాదు చేసింది.రెండు రాష్ట్రాల మధ్య పోరు కారణంగా కృష్ణా నదీ జలాలను పరిమితికి మించి వాడుకున్నారని.. ఇక వాడుకొవద్దని ఏపీకి సూచించిన బోర్డు.. మీరు చేపడుతున్న ప్రాజెక్టులకు సంబంధించి డీపీఆర్‌లను అందజేయాలని తెలంగాణ సర్కారును ఆదేశించింది.తెలంగాణ బీజేపీ అధ్యక్షుడు బండి సంజయ్ కేంద్ర జల్ శక్తి మంత్రికి పోతిరెడ్డిపాడు ప్రాజెక్టు విషయమై లేఖ రాయగా.. ఆయన స్పందించారు. ఏపీ సర్కారు ఈ ప్రాజెక్టు విషయమై ముందుకెళ్లకుండా చూడాలని కృష్ణా బోర్డును ఆదేశించారు.తాజాగా నేషనల్ గ్రీన్ ట్రైబ్యునల్ కూడా జగన్ సర్కారుకు షాకిచ్చింది. పోతిరెడ్డిపాడు లిఫ్ట్ ఇరిగేషన్‌ ప్రాజెక్టుపై స్టే విధించింది. ప్రతిపాదిత ప్రాజెక్టుపై అధ్యయనానికి కమిటీ ఏర్పాటు చేసింది. రెండు నెలల్లో నివేదిక అందజేయాలని.. అప్పటి వరకూ ప్రాజెక్ట్ పనులు ప్రారంభించొద్దని ఆదేశించింది. నారాయణపేటకు చెందిన శ్రీనివాస్ అనే వ్యక్తి ఫిర్యాదు మేరకు ఎన్జీటీ ఈ నిర్ణయం తీసుకుంది.అటు కేంద్రం నిర్ణయం, ఇటు హరిత ట్రైబ్యునల్ స్టే విధించడం రెండూ.. తన ప్రమేయం లేకుండానే జరగడం కేసీఆర్‌కు ఆనందం కలిగించే విషయాలే. మరి తెలంగాణ సర్కారు చేపట్టే ప్రాజెక్టుల విషయంలో ఏపీ ప్రభుత్వం చేస్తున్న ఫిర్యాదుల వల్ల ఏవైనా ఆటంకాలు తలెత్తుతాయేమో చూడాలి.