మహిళల ప్రేమ పేరుతో వల
నెల్లూరు, మే 26
తన ఫ్రెండ్స్ ద్వారా పరిచయమైన మహిళలకు ప్రేమ వల విసిరి వారి వ్యక్తిగత ఫోటోలు సేకరించి బ్లాక్‌మెయిల్ చేస్తున్న ప్రశాంత్ అనే యువకుడిని నెల్లూరు పోలీసులు అరెస్ట్ చేశారు.మీరు అందంగా ఉన్నారంటూ మాటలు కలుపుతాడు. ప్రేమిస్తున్నానంటూ మాయ మాటలు చెప్పి వ్యక్తిగత చిత్రాలు సేకరిస్తాడు. ఆ ఫోటోలను మార్ఫింగ్ చేసి బ్లాక్‌మెయిల్‌ చేస్తాడు. తన ఉచ్చులో బిగించి వారితో తన కోరికలు తీర్చుకుంటాడు. ఇలా టెన్త్, ఇంటర్మీడియట్‌, డిగ్రీ, పీజీ చదివే పదుల సంఖ్యలో అమ్మాయిలు ఆ కామాంధుడి వలలో పడి మోసపోయారు. ఫ్రెండ్స్ ద్వారా పరిచయమైన అమ్మాయిలను టార్గెట్ చేసుకుని సాగిస్తున్న ఆ సెక్స్ దందాకు నెల్లూరు మహిళా పోలీసులు చెక్ పెట్టారు. అతడి మాటల్లో పడి మోసపోయిన ఓ భాధితురాలు ధైర్యం చేసి ఫిర్యాదు చేయడంతో నెల్లూరు పోలీసులు రంగంలోకి దిగారు. దర్యాప్తులో ఎన్నో షాకింగ్ విషయాలు బయటపడటంతో పోలీసులే ఆశ్చర్యానికి గురయ్యారు. చివరికి ఫోన్ ద్వారా సాగుతున్న ఈ వ్యవహారాన్ని దిశ స్టేషన్‌ డీఎస్పీ నాగరాజు ఆధ్వర్యంలో పక్కా ఆధారాలతో చేధించి నిందితుడిని అరెస్ట్ చేశారు. న్యాయస్థానం అతడికి 14రోజుల రిమాండ్ విధించడంతో జైలుకు తరలించారు.నెల్లూరు జిల్లా వింజమూరుకు చెందిన ప్రశాంత్‌ ఎమ్మెస్సీ పూర్తి చేశాడు. సోషల్‌‌మీడియాలో ఆరితేరిన అతడు అమాయక బాలికలు, యువతులతో ఛాటింగ్ చేస్తూ వారిపై ప్రేమ వల విసిరి నిలువునా మోసగిస్తున్నాడు. తన ఫ్రెండ్స్, తెలిసిన వారి ద్వారా విద్యార్థినులు, పెళ్లయిన మహిళలతో చాటింగ్‌ చేస్తూ ఆకట్టుకునేలా మెసేజ్‌లు పంపుతూ ప్రేమ ముగ్గులోకి దించుతున్నాడు. ప్రేమలో తనకు చాలా అనుభవం ఉందంటూ మాయ మాటలు చెబుతూ వారి ఫోటోలు సేకరించి బ్లాక్‌ మెయిలింగ్‌కు పాల్పడుతున్నాడు. తాను చెప్పిన చోటికి రావాలని, తన కోరిక తీర్చాలని వేధిస్తున్నాడు. తాను చెప్పింది చేయకపోతే ఆ ఫోటోలను సోషల్‌మీడియాలో పోస్ట్ చేస్తాడని బెదిరిస్తు్నాడు.అతడి వలలో పడి మోసపోయిన ఓ యువతి ధైర్యం చేసి నెల్లూరు దిశ మహిళా పోలీసు స్టేషన్‌ డీఎస్పీకి ఫిర్యాదు చేశారు. ముందుగా దీన్ని సాధారణ కేసు భావించిన పోలీసులు అతడి ఫోన్‌ తీసుకుని చెక్ చేయగా షాకింగ్ విషయాలు వెలుగులోకి వచ్చాయి. అతడి మెయిల్‌లోని సమాచారాన్ని పరిశీలిస్తే అందులో కేవలం అమ్మాయిల నగ్న చిత్రాలు, చాటింగ్‌ స్క్రీన్‌ షాట్‌లు, వీడియోలు కనిపించాయి. ఎనిమిది మంది అమ్మాయిలను మోసం చేసిన ఆధారాలు పోలీసులకు దొరికాయి. ఇవే కాకుండా అతడి వలలో పడి మోసపోయిన బాధితులు పదుల సంఖ్యలో ఉంటారని పోలీసులు అనుమానిస్తున్నారు. జిల్లాలోని కావలి, ఉదయగిరి, వింజమూరు, గూడూరుతో పాటు తిరుపతిలోనూ అతని బారిన పడి అనేక మంది యువతులు మోసపోయినట్లు పోలీసులు గుర్తించారు.ప్రశాంత్‌కు చెందిన ఫోన్‌ను ఫోరెన్సిక్‌ ల్యాబ్‌కు పంపిస్తున్నట్లు పోలీసులు తెలిపారు. ఎవరి ఆధారాలు లేకుండా ఫోన్ ద్వారా అతడు చేసిన చాటింగ్‌, కాల్స్‌, వీడియో కాల్స్‌ను పరిశీలించేందుకే ఇలా చేసినట్లు పోలీసులు తెలిపారు. ఎంతో మంది అమాయక మహిళల జీవితాలను నాశనం చేసిన ప్రశాంత్‌కు బెయిల్‌ లేకుండా జైలుకు పంపించామని నెల్లూరు దిశ మహిళా పోలీసు స్టేషన్‌ డీఎస్పీ ఉప్పుటూరి నాగరాజు తెలిపారు. ప్రశాంత్‌ లాంటి మోసగాళ్లతో యువతులు జాగ్రత్తగా ఉండాలని, ఫోన్ ఉందని చాటింగ్‌లు, వ్యక్తిగత చిత్రాలు ఇతరులకు షేర్‌ చేస్తే ఇలాంటి పరిణామాలే ఎదుర్కోవాల్సి వస్తుందని హెచ్చరించారు. మహిళల నుంచి ఫోటోలు సేకరిస్తున్న మోసగాళ్లు వాటితోనే బ్లాక్‌మెయిల్ చేసి వారి జీవితాలను నాశనం చేస్తున్నారని చెబుతున్నారు.